« 2–8 nō Tītema. 1–3 Ioane ; Iuda: ’E aroha ho’i te Atua’ » Mai pe’e mai—nō te Ha’api’ira’a Sābati : Faufa’a ’Āpī 2019 (2019)

« 2–8 nō Tītema. 1–3 Ioane ; Iuda », Mai pe’e mai—nō te Ha’api’ira’a Sābati : 2019

Te aroha hau roa i te maita’i roa, nā Del Parson

2-8 nō Tītema.

1–3 Ioane ; Iuda

« E aroha ho’i te Atua »

E aha te mau parau tumu ’e te mau hōho’a tā ’outou i ’ite i roto i tā ’outou tai’ora’a i te 1–3 Ioane ’e Iuda ? Nāhea e nehenehe ai ’ia ’outou ’ia fa’a’ohipa i te reira nō te tauturu i tā ’outou mau pīahi ?

Pāpa’i i tō ’outou mau mana’o

Ani ’ia fa’a’ite mai i te mau mana’o

’A ani i te mau pīahi ’ia fa’a’ite mai i te mau tumu parau ’aore rā mau parau mau ta’a ’ē tā rātou i ’ite ’a tai’o ’ai rātou i te mau ’epitetole a Ioane ’e a Iuda. E aha ïa te mau pōro’i nō roto mai i teie mau ’episetole faufa’a rahi nō rātou ’e tō rātou mau ’utuāfare ?

Ha’api’i i te ha’api’ira’a tumu

1 Ioane 1:5–10 ; 2:3–11 ; 3:1–3 ; 4:7–21 ; 5:1–3

Te Metua i te Ao ra ’e Iesu Mesia e mau hōho’a maitai roa ïa nō te māramarama ’e te aroha.

Nāhea e nehenehe ai ia ’outou ’ia tauturu i tā ’outou mau pīahi ’ia ’ite i te māramarama ’e te aroha o te Metua i te Ao ra i roto i tō rātou orara’a ? E nehenehe tā ’outou e ha’amata ma te pāpa’i i te mau tā’o māramarama ’e aroha i ni’a i te ’iri pāpa’ira’a. ’A ani i te mau pīahi ’ia fa’a’ite mai i te mau tā’o mātāmura tei tae mai i roto i tō rātou mau mana’o ’a feruri ai rātou i teie nā tā’o e piti. E nehenehe tā ’outou e vāhi i te piha i roto i te mau pupu ’e ’ia fa’ata’a nō te pupu tāta’itahi te hō’ē o teie mau pāpa’ira’a mo’a: 1 Ioane1:5–10 ; 2:3–11 ; 3:1–3 ; 4:7–12 ; 4:16–21 ; 5:1–3. E nehenehe tā te mau pupu e ’imi i roto i teie mau ’īrava te mau tāpa’o fa’a’ite nō te māramarama ’e te aroha o te Atua ’e nō te mau mea tā tātou e nehenehe e rave nō te fa’a’ite i tō tātou here i te Atua ’e i tāna mau tamari’i. E nehenehe tā te mau melo nō te pupu tāta’itahi e fa’a’ite atu i te piha te mea tā rātou i ’ite. E nehenehe ato’a tā ’outou e ani i te mau pīahi ’ia fa’a’ite mai i te mau mea i tupu ’a ’ite ai rātou i te māramarama ’e te aroha o te Atua.
Nāhea e nehenehe ai ia ’outou ’ia tauturu i te mau pīahi ’ia feruri i te māramarama vārua i roto i tō rātou orara’a ? E nehenehe tā ’outou e ani i te mau pīahi ’ia hi’o i te hō’ē mori aroaro ’aore rā te hō’ē mori e tomo mai ra nā roto i te hō’ē ha’amāramarama ’e ’ia fa’a’ite mai e aha tā rātou i ’ite nō ni’a i te māramarama tino. Nāhea te māramarama tino e riro ai mai te māramarama vārua ? Penei a’e e nehenehe tā ’outou e ’imi i roto i te Salamo 27:1 ; Ioane 1:4–5 ; 1 Ioane 1:5–7 ; 3 Nephi 11:11 ; Te Parau Ha’api’ira’a ’e te mau Parau Fafau 88:6–13 ’e ’ia noa’a mai te tahi atu ā mau ’ite e nāhea tō te Atua ’e tāna Tamaiti hōro’ara’a mai i te māramarama i roto i tō rātou orara’a. E nehenehe ato’a i te mau pīahi ’ia fa’a’ite mai i te mau mea i tupu ’a ’imi ai ’e ’a fāri’i ai rātou i te māramarama vārua i roto i tō rātou orara’a.
E au ato’a paha i te mau pīahi ’ia hīmene ’āmui ’aore rā ’ia fa’aro’o i te hō’ē hīmene nō ni’a i te māramarama, mai « ’O te Fatu ra Tō’u Māramarama » (Te mau Hīmene, nūmera 43). E aha tā teie hīmene e ha’api’i mai nei e nāhea te Fatu i riro ai ’ei māramarama ? E nehenehe te video « Mā’iti i te māramarama » (LDS.org) ’e te fa’ahitira’a parau a Elder Robert D. Hales i roto i « Te tahi atu ā mau rāve’a tauturu » e hōro’a mai i te tahi atu ā mau ’ite e nāhea ’ia noa’a te māramarama rahi a’e i roto i tō tātou orara’a.

1 Ioane 2:18–23, 26–28 ; 4:3 ; 2 Ioane 1:7–11 ; 3 Ioane 1:9–11 ; Iuda

E ti’a ia tātou ’ia ha’apa’ari ia tātou iho i mua i te mau ha’api’ira’a hape.

Tē fifi ra paha te tahi ’o tā ’outou mau pīahi ’e ’aore rā te mau ta’ata i herehia e rātou i te fa’aruru atu i te mau ha’api’ira’a hape ’o te ha’aparuparu i tō rātou fa’aro’o. E riro paha ’ei tauturura’a ’ia ha’api’i mai e aha tā Ioane ’e Iuda i ha’api’i nō ni’a i te tāivara’a. ’A feruri i te ani i te ’āfara’a ’o te mau pīahi ’ia mā’imi i te mau fa’a’itera’a nō ni’a i te mau ha’api’ira’a hape ’aore rā tāivara’a i roto i te 1 Ioane 2:18–23, 26–28 ; 4:3 ; 2 Ioane 1:7–11 ; 3 Ioane 1:9–11 ’e te tahi ’āfara’a ’o te piha ’ia mā’imi ïa i taua mau fa’a’itera’a ra i roto ’ia Iuda. ’Aore rā e nehenehe tā rātou e ’imi i te mau pāhonora’a i te mau uira’a mai teie : Nāhea Ioane ’e Iuda i te fa’ata’ara’a mai i te hō’ē anetimesia ? (’a hi’o ato’a i te Arata’i i te mau Pāpa’ira’a Mo’a, « Anetimesia », scriptures.lds.org). Tē vai ra ānei i roto i teie mau ’īrava te tahi mea e nehenehe e fa’a’auhia i te mau tāmatara’a tā tātou e fa’aruru nei i teie mahana ? Nāhea e nehenehe ai ia tātou ’ia ha’apa’ari ia tātou i mua i te mau ha’api’ira’a hape ?
’Ua fa’a’ohipa Iuda i te hō’ē hōho’a maita’i nō te fa’a’ite i te mau ha’api’i ha’avare, ’aore rā te feiā « te fa’a’ino nei i te mau mea ’ite-’ore-hia e rātou ra » (Iuda 1:10). E nehenehe tā ’outou e ani i te tahi mau pīahi ’ia nīno’a i ni’a i te ’iri pāpa’ira’a i te tahi ’o te mau hōho’a tei fa’a’itehia i roto i te Iuda 1:12–13 ’a imi i te tahi atu mau pīahi e aha ïa te pereota tā te pīahi e nīno’a ra. Nāhea teie mau hōho’a e fa’ahōho’a ai i te mau ’orometua ha’avare ’e te mau anetimesia ? ’Ei hi’ora’a, nāhea te mau peu vi’ivi’i e fa’atupu ai i te mau « pora’o i tā [tātou] mau ’ōro’a nō aroha » ? Nāhea e nehenehe ai ia tātou ’ia ha’apa’ari atu i mua i te « feiā tahitohito » ? (’a hi’o Iuda 1:18–21). Nō te aha ïa Iuda i parau ai ē ’ia « aroha » (Iuda 1:22) i te feiā e tahitohito nei i te ’evanelia ?

1 Ioane 5

’Ia fa’a’ohipa ana’e tātou i te fa’aro’o i te Mesia ’e ’ia fānauhia tātou i te Atua, e nehenehe tā tātou e upo’oti’a i ni’a i te ao nei.

Tē parau nei te hō’ē o te mau ’ohipara’a nō teie hepetoma i roto Mai pe’e mai—nō te ta’ata hō’ē ’e te ’utuāfare ’ia mā’imi i roto i te 1 Ioane 5 nō te ’ite ē nāhea e nehenehe ai ia tātou ’ia upo’oti’a i ni’a i te ao nei. Penei a’e e nehenehe tā ’outou e ani i te mau pīahi ’ia fa’a’ite mai i te mea tā rātou i ’ite ’e ’ia pāpa’i atu te reira i ni’a i te ’iri pāpa’ira’a. (E hina’aro paha ’outou i te hōro’a i te tahi taime nō rātou i roto i te piha nō te tai’o-poto-fa’ahou mai i te pene.) ’Aore rā e nehenehe tā ’outou e ani i te mau pīahi ’ia tai’o mai i te mau tufa’a o te pōro’i a Elder Neil L. Andersen « ’Ia upo’oti’a i ni’a i te ao » (Ensign ’aore rā Liahona, Mē 2017, 58–62) ’e ’ia fa’a’ite mai i te mea tā rātou i ’āpo mai. ’Ei hi’ora’a, e aha ïa te mau ’ite tei noa’a mai ia rātou i roto i te mau ’ā’amu tā Elder Andersen i fa’a’ite mai nō ni’a i te peresideni David O. McKay ’e Elder Bruce D. Porter ? Penei a’e e nehenehe i te mau pīahi ’ia fa’a’ite mai i tā rātou iho mau hōho’a nō te mau ta’ata tā rātou i mana’o ē ’ua tauto’o rātou i te upo’oti’a i ni’a i te ao.

E nehenehe te ’evanelia a Iesu Mesia e tauturu ia tātou ’ia ’ite i te hau i roto i te hō’ē ao ’āhuehue

3 Ioane 1:1–4

E tae mai te ’oa’oa ’ia tauturu ana’e tātou ia vetahi ’ē ’ia « ha’apa’o i te parau mau ».

Tē vai ra paha te mau pīahi i roto i tā ’outou piha e nehenehe e tū’ati atu i te mana’o o Ioane ’a parau ai ’oia ē « ’aita atu e ’oa’oa rahi » maori rā ’ia fa’aro’o e ’ia ha’apa’o ’o Gaio (te hō’ē ’o tāna mau « tamari’i ») i te parau mau. E nehenehe te mau pīahi e fana’o i te fa’aro’ora’a i te mau ’ohipa tei tupu i te tahi atu mau pīahi. Penei a’e e nehenehe tā ’outou e ha’amata ma te tai’o ’āmuira’a i te 3 Ioane 1:1–4 ’e te mau pāpa’ira’a mo’a i roto i « Te tahi atu ā mau rāve’a tauturu ». E aha tā teie mau pāpa’ira’a mo’a e ha’api’i nei ia tātou nō ni’a i te tumu nō te ’oa’oa mau ? E nehenehe tā te mau pīahi e paraparau e aha ra tō rātou mau mana’o ’ei mau metua, mau misiōnare, feiā fa’atere ’o te ’Ēkālesia, ’aore rā ’orometua ha’api’i ’ia ’ite ana’e rātou ē tē ha’apa’o ra te mau ta’ata tā rātou i ha’api’i i te parau mau. E nehenehe tā ’outou e fārerei i te tahi mau pīahi hou te ha’amatara ’o te piha ha’api’ira’a ’e ’ia ani ia rātou ’ia ’āfa’i mai i te mau hōho’a ’o te mau ta’ata tā rātou i tauturu i te ’āfa’i atu i te Mesia ’e ’ia fa’a’ite mai i te mau mea tā rātou i rave.

Fa’aitoito i te ha’api’ira’a i te fare

Nāhea e nehenehe ai i te mau tāpa’o mai te mau teni, te mau animara pererau, ’e te mau arenio tāparahi-pohe-hia e ha’api’i mai ia tātou nō ni’a i te ’ōpuara’a a te Atua nō tāna mau tamari’i ? ’A ani i te mau pīahi ’ia feruri i teie uira’a ’a tai’o ai rātou i te Apokalupo i teie mau hepetoma i mua nei.

Te tahi atu ā mau rāve’a tauturu

1–3 Ioane ; Iuda

E ti’avaru ’ē atu te māramarama i te pōiri.

’Ua ha’api’i Elder Robert D. Hales e nāhea e nehenehe ai ia tātou ’ia ti’avaru ’ē atu i te pōuri mai roto atu i tō tātou orara’a ’e ’ia haere nā roto i te māramarama :

I tō’u ’āpīra’a, ’ua fa’a’ohipa vau i tō’u pere’o’o ta’ata’ahi ’ia hoʻi au i te fare nā te ha’utira’a taorara’a popo i te pō. E tāmau vau i te dinamo mai te hōho’a o te pea i piha’i iho i te huira pere’o’o ta’ata’ahi. ’Ei reira vau e ta’ahi atu ai i tō’u pere’o’o, e nā te dinamo ’o te fa’a’ohuhia ra e te huira e fa’ahaere i te mori. E mea ’ōhie roa ’e te maita’i te reira tao’a. ’Ua ti’a rā iā’u ’ia ta’ata’ahi ’ia tere te reira ! ’Ua ha’api’i ’oi’oi mai au ē, ’ia fa’aea vau i te ta’ahi i to’u pere’o’o, e pohe ïa te mori. ’Ua haapi’i ato’a mai au ē, ’ia « ta’ahi pūai au [PH&PF 58:27] e pūai atoa atu te māramarama, e e pe’e ’ē atu te pōiri i mua iā’u.

Nō te fa’ahaere i te māramarama pae vārua ’e mea tītauhia ’ia fa’a’ohipa i te ta’ata’ahira’a pae vārua i te mau mahana ato’a. E tupu te reira nā roto i te purera’a, te tuatāpapara’a i te mau pāpa’ira’a mo’a, te ha’apaera’a mā’a, ’e te tāvinira’a—’oia ho’i, nā roto i te ha’apa’ora’a i te mau fa’auera’a » (« Out of Darkness into His Marvelous Light », Ensign, Mē 2002, 71).

Te mau pāpa’ira’a mo’a nō ni’a i te tauturura’a ’ia vetahi ’ē ’ia ha’apa’o i te parau mau.

Ha’amaita’ira’a i tā tātou ha’api’ira’a

’A pure nō tā ’outou mau pīahi Mai tā te Fa’aora i pure nō Petero (’a hi’o Luka 22:32), e ti’a ia ’outou ’ia pure ma te fa’ahiti i te i’oa o tā ’outou mau pīahi, ma te tūtava ’ia ta’a i tō rātou mau hina’aro ta’a ’ē. A nā reira ai ’outou, e fa’aineine ïa te Metua i te Ao ra « i tō rātou mau ’ā’au » (Alama 16:16) ’e e tauturu ia ’oia ia ’outou ’ia ’ite i te mea e ha’api’i nō te pāhono atu i tō rātou mau hina’aro (’a hi’o Ha’api’ira’a mai tā te Fa’aora, 6).