E ’orometua ha’api’i ’oe i roto i te ’Ēkālesia ’a Iesu Mesia.

’Ua pi’ihia ’oe e te Atua ’ia ha’api’i i tāna mau tamari’i mai tā te Fa’aora i ha’api’i. ’Ua fa’ata’ahia ’oe i teie pi’ira’a nā roto i te mana o tōna autahu’ra’a mo’a. Noa atu e, ’e ’ere ’oe i te hō’ē ’orometua ha’api’i ’aravihi, ’ia ora parau-tia rā ’oe, ’ia pure i te mau mahana ato’a, ’e ’ia tuatāpapa i te mau pāpa’ira’a mo’a, e hōro’a mai te Metua i te Ao ra i te fa’aurura’a ’e te mana ’o te Vārua Maita’i ia ’oe (see 2 Nephi 33:1).

Te mau ta’ata tei tu’uhia atu i roto i tā ’oe ti’a’aura’a e mau tamari’i ïa rātou nā te Atua, ’e ’ua ’ite ’oia i tō rātou mau hina’aro ’e e nāhea ’ia ha’amaita’i ia rātou. Nā roto i te Vārua Maita’i, e arata’ihia ’oe i roto i tā ’oe fa’aineinera’a ’e tā ’oe ha’api’ira’a. E heheu mai ’oia ia ’oe i te mea e ti’a ia ’oe ’ia parau ’e ’ia rave.

Te tumu faufa’a nō te ha’api’ira’a mai i te ’evānelia o te tauira’a ïa i te mau orara’a. Tā ’oe fā ’ei ’orometua ha’api’i o te tauturura’a ïa i te feiā tā ’oe e ha’api’i ra ’ia rave i te mau mea ato’a ’ia fa’afāriuhia rātou i te ’evanelia ’a Iesu Mesia—te hō’ē ïa fā o te ’ore e tupu i roto ana’e i te taime ha’api’ira’a. ’A ani i te feiā tā ’oe e ha’api’i ra ’ia itoito i te ’āmuira’a mai i roto i tā rātou iho ha’api’ira’a mai i te mau parau tumu ’e te ha’api’ira’a tumu ’a Iesu Mesia ’e ’ia ha’a mai te au i te mea tā rātou i ha’api’i mai. ’A fa’aitoito ia rātou ’ia fa’ariro i tā rātou iho tuatāpapara’a ’e te tuatāpapara’a ’utuāfare i rāpae’au i te piha ha’api’ira’a ’ei fā mātāmua nō tā rātou tuatāpapara’a ’evānelia. ’Ia tuatāpapa ana’e rātou iho ’e tō rātou ’utuāfare ma te fa’aro’o, e ani rātou i te Vārua’ia pārahi mai i roto i tō rātou orara’a ’e e ha’amaita’i-rahi-hia rātou ’eiaha rā nā roto i te tahi mea tā te hō’ē ’orometua ha’api’i e rave.

’A ha’api’i noa i te ha’api’ira’a tumu o te ’evanelia ’a Iesu Mesia tei fa’aho’ihia mai mai tei ’itehia i roto i te mau pāpa’ira’a mo’a ’e te mau parau ’a te mau peropheta i te mau mahana hope’a nei. E ani te ha’api’ira’a tumu mā—te parau mau mure ’ore, te tāuiui ’ore, tei ha’api’ihia e te Atua ’e tāna mau tāvini—i te Vārua ’e e mana ho’i tō te reira ’ia fa’ataui i te mau orara’a.

Te pi’ira’a ’ia ha’api’i e ti’aturira’a mo’a ïa, ’e i te tahi mau taime e tae mai te mana’o ē, e’ita e mara’a ia ’oe. ’A ha’amana’o rā ē ’ua pi’i te Atua ia ’oe, ’e e ’ore roa ’oia e fa’aru’e ia ’oe. E ’ohipa teie nā te Fatu, ’e ’a tāvini ai ’oe « ma tō ’ā’au atoa, ma tō itoito ato’a, ma tō mana’o atoa, ’e tō pūai ato’a » (PH&PF 4:2), e fa’arahi ’oia i tō ’oe mau ’aravihi, mau hōro’ara’a, ’e mau tāleni ’e e ha’amaita’i tā ’oe tāvinira’a i te orara’a o te feiā tā ’oe e ha’api’i ra.