Piha Ha’api’ira’a Sābati

Hō’ē hōho’a nō te ha’api’ira’a

I roto i teie rāve’a tauturu, e ’ite ’oe i teie nei hōho’a o tei tāpitihia i roto i te mau arata’ira’a ato’a : ’A ani i te mana’o, ’a ha’api’i i te ha’api’ira’a tumu, ’e ’a fa’aitoito i te ha’api’ira’a mai i te fare. I roto i tā ’outou ha’api’ira’a i te rahira’a o te taime, e nehenehe te mau tufa’a o teie hōho’a e ’āno’i ’e ’aore rā e tupu i roto i te tahi ē atu ’ana’ira’a. ’Ei hi’ora’a, ’a feruri ē te fa’a’itera’a o te hō’ē ïa rāve’a nō te ha’api’i i te ha’api’ira’a tumu, ’e i roto i te ha’api’ira’a i te ha’api’ira’a tumu tītauhia ’ia ravehia te mau anira’a ’ia fa’a’ite mai. ’Oia ato’a, e nehenehe te fa’aitoitora’a i te ha’api’ira’a mai i te fare e tupu nā roto i te hō’ē tau’ara’a parau i roto i te piha ha’api’ira’a. ’A vaiiho i teie ’āno’ira’a ’ia tupu ’ōhie noa, nā roto i te pe’era’a i te mau muhumuhura’a ’a te Vārua nō te pāhono atu i te mau hina’aro o ta ’oe mau pīahi.

tāpa’o nō te fa’a’itera’a mai

’A ani ’ia fa’a’ite mai

’Ei tufa’a nō te mau ha’api’ira’a ato’a, ’a ani i te mau pīahi ’ia fa’a’ite mai i te mau mana’o ’e te mau ’ohipa tei tupu ia rātou i te hepetoma i ma’iri ’a tuatāpapa ai rātou iho ’e tō rātou ’utuāfare i te mau pāpa’ira’a mo’a ’e ’a fa’a’ohipa ai rātou i te mea tā rātou i ha’api’i mai. ’A tauturu i te mau pīahi ’ia ’ite ē e mea faufa’a rahi roa tā rātou iho ha’api’’ira’a mai i rāpae’au i te piha ha’api’ira’a. E’ita tō rātou iho fa’afāriura’a e tae mai nā roto ana’e i te ha’api’ira’a i te mahana sābati, nā roto ato’a rā i te mau mea tā rātou e rave i te mau mahana ato’a. ’Ia fa’aro’o ana’e te mau pīahi i te mau mea tei tupu i te tahi ’e te tahi, e mea pāpū ē, e fa’auruhia rātou ’ia tūtava i te ’imi i tō rātou iho ’itera’a mai teie.

E’ita te tā’āto’ara’a ’o te mau pīahi e tai’o i te mau pene nō te ha’api’ira’a tāta’itahi, ’e e’ita ato’a ho’i te tahi mau pīahi tei tai’o e au maita’i e fa’a’ite i tō rātou mau mana’o. ’Ia pāpū ē ’ua ’ite te mau pīahi ato’a e, ’e tufa’a faufa’a rātou nō te piha ha’api’ira’a, tē vai ra ānei te mau mea tā rātou e hina’aro e fa’a’ite ’e ’aore rā ’aita.

tāpa’o nō te ha’api’ira’a

Ha’api’i i te ha’api’ira’a tumu

E ti’a ia ’oe ’e te mau pīahi ’ia fa’atumu i ni’a i te ha’api’ira’a tumu—te mau parau mau mure ’ore o te ’evanelia—e ’itehia i roto i te mau pāpa’ira’a mo’a tei fa’ata’ahia nō te tai’o. ’A tuatāpapa ai ’outou i te ha’api’ira’a tumu i roto i te mau pāpa’ira’a mo’a, e aha te mau ’īrava, te mau fa’ahitira’a parau, te mau mea i tupu, te mau uira’a ’e te tahi atu ā mau rāve’a tauturu ’e nehenehe ia ’oe ia fa’a’ite atu ? Nāhea ’oe e fa’a’ohipa ai i teie mau rāve’a tauturu nō te tauturu i te mau pīahi ’ia ’ite ’e ’ia ta’a i te mau parau tumu o te ’evanelia ? Nāhea e nehenehe ai ia ’oe ’ia fa’aitoito i te mau pīahi ’ia pāpa’i ’e ’ia ha’a i te mau mana’o ’e te mau fa’a’itera’a tā rātou i fāri’i ?

tāpa’o nō te ha’api’ira’a mai

’A fa’aitoito i te ha’api’ira’a mai i te fare

I te pae hope’a o te ha’api’ira’a, ’a rave i te tahi taime nō te hi’o i te tau'aparaura’a nō te hepetoma i mua atu. ’A feruri e nāhea i te fa’auru i te mau pīahi ’ia tāmau ā i te ha’api’i mai mai roto mai i te Faufa’a ’Āpī i tō rātou fare, ’o rātou ana’e ’e tō rātou ’utuāfare.