Fa’a’ohipara’a Mai, pe’e mai—Nō te Ha’api’ira’a Sābati

Fa’aineinera’a nō te ha’api’i i roto i te Ha’api’ira’a Sābati

E ti’a i te ’utuāfare ’ia riro ’ei pū nō te ha’api’ira’a mai i te ’evānelia. E parau mau te reira nō ’oe ’e nō te mau ta’ata tā ’oe e ha’api’i ra. ’A fa’aineine ai ’oe i te ha’api’i, ’a ha’amata nā roto i tō ’oe iho mau ’itera’a i roto i te mau pāpa’ira’a mo’a. E tupu ïa tā ’oe fa’aineinera’a faufa’a rahi roa ’ia ’imi ana’e ’oe i te fa’aurura’a ’a te Vārua Maita’i.

’Ua riro ato’a te Mai, pe’e mai—Nō te ta’ata iho ’e te ’utuāfare ’ei tufa’a faufa’a rahi nō tā ’oe fa’aineinera’a. E tauturu te reira ia ’oe ’ia noa’a te hō’ē hāro’aro’ara’a hōhonu a’e nō ni’a i te mau parau tumu o te ha’api’ira’a tumu e ’itehia i roto i te mau pāpa’ira’a mo’a. E nehenehe ato’a ia ’oe e fa’auru ’e e ani i te mau pīahi ’ia fa’a’ohipa Mai, pe’e mai—Nō te ta’ata iho ’e te ’utuāfare nō te fa’ananea i tā rātou iho ’e tā te ’utuāfare tuatāpapara’a i te mau pāpa’ira’a mo’a (nō te tauturu i te ravera’a i te reira, ’a hi’o te « Mau mana’o nō te fa’aitoitora’a i te tuatāpapara’a ’a te ta’ata iho ’e ’a te ’utuāfare » i roto i teie rāve’a). ’A nā reira ai ’oe, ’a ha’amana’o i te ha’apa’o maita’i i te mau pīahi e ’aita te orara’a ’utuāfare e pāturu nei i te tuatāpapara’a i te pāpa’ira’a mo’a i roto i te ’utuāfare.

I roto i tā ’oe fa’aineinera’a, e tae mai te mau mana’o ’e te mau fa’a’itera’a ia ’oe nō ni’a i te mau ta’ata tā ’oe e ha’api’i ra, e nāhea te mau parau tumu i roto i te mau pāpa’ira’a mo’a e ha’amaita’i ai i tō rātou orara’a, ’e e nāhea ’oe e nehenehe ai e fa’auru ia rātou ’ia ’ite mai i teie mau parau tumu ’a tuatāpapa ai rātou iho i te mau pāpa’ira’a mo’a.

Mau mana’o tauturu nō te ha’api’ira’a

’A hāmani ai ’oe i tā ’oe fa’anahora’a ha’api’ira’a, ’e nehenehe e noa’a ia ’oe te tahi atu ā fa’aurura’a nā roto i te hi’opo’ara’a i te mau arata’ira’a i roto i teie rāve’a tauturu. ’Eiaha e fa’ariro i teie mau mana’o tauturu ’ei mau arata’ira’a tāta’itahi ’ei mau mana’o rā nō te fa’auru ia ’oe iho. ’Ua mātau ’oe i tā ’oe mau pīahi, ’e ’ua mātau ato’a te Fatu ia rātou. E fa’auru ’oia ia ’oe ma te mau rāve’a maita’i roa a’e nō te tauturu i te mau pīahi ’ia patu i ni’a i te ha’api’ira’a mai i te ’evanelia tā rātou e rave nei i tō rātou fare.

E rave rahi atu ā mau rāve’a tauturu e roa’a ’a fa’aineine ai ’oe ’e ’oia ato’a te mau mana’o tauturu i roto i te Mai, pe’e mai—Nō te ta’ata iho ’e te ’utuāfare ’e te mau ve’a a te ’Ēkālesia. Nō te tahi atu ā ha’amāramaramara’a nō ni’a i teie ’e te tahi atu mau rāve’a tauturu ’a hi’o atu i « Te tahi atu ā mau rāve’a tauturu ».

Te tahi mau mea ’ia ha’amana’o

• O te fare te vāhi maita’i roa a’e nō te ha’api’ira’a mai i te ’evanelia. ’Ei ’orometua ha’api’i, ’e hōpoi’a faufa’a rahi tā ’oe nō te pāturu, nō te fa’aitoito ’e nō te patu i ni’a i te ha’api’ira’a mai i te ’evanelia i te fare.

• E hōhonu atu ā te fa’afāriura’a ’o te mau pīahi i te ’evānelia ’a Iesu Mesia ’a hāro’aro’a ai ’e ’a fa’a’ohipa ai rātou i te ha’api’ira’a tumu mau. ’A fa’aitoito ia rātou ’ia pāpa’i ’e ’ia rave mai te au i te mau fa’a’itera’a tā rātou e fāri’i nā roto mai i te Vārua Maita’i.

• ’Ua hau atu te ha’api’ira i te a’o noa, ’e ’ua hau ato’a atu te reira i te arata’i-noa-ra’a i te hō’ē tau’ara’a parau. Te tahi tufa’a o tō ’oe ti’ara’a o te fa’aitoitora’a ïa i te ’āmuira’a mai o te fa’auru mai ’e o te fa’atumuhia i ni’a i te mau pāpa’ira’a mo’a.

• Tē hina’aro nei te Metua i te Ao ra ’ia manuia ’oe ’ei ’orometua ha’api’i. ’Ua hōro’a mai ’oia ’e rave rahi mau rāve’a nō te tauturu ia ’oe ’ia manuia, ’oia ato’a te mau ’āpo’ora’a ’a te mau ’orometua ha’api’i. I roto i teie mau ’apo’ora’a e nehenehe tā ’oe e a’o atu i te tahi mau ’orometua ha’api’i i ni’a i te mau fifi tā ’oe e fa’aruru ra. E nehenehe ato’a tā ’oe e tuatāpapa ’e e fa’a’ohipa i te mau parau tumu nō te ha’api’ira’a mai tā te Mesia te huru.

• E ha’api’i maita’i a’e mai te mau ta’ata ’ia noa’a ana’e ia rātou te rāve’a ’ia ha’api’i. ’A feruri i te tahi taime,e fa’ati’a i te mau pīahi, te feiā ’āpī ato’a, ’ia ha’api’i i te hō’ē tufa’a o te ha’api’ira’a. A ha’amau i teie fa’aotira’a ’ia au i te mau hina’aro ’e te mau ’aravihi ’o te mau pīahi. Mai te mea e ani ’oe i te hō’ē pīahi ’ia ha’api’i, ’a rave i te taime nō te tauturu atu iāna ’ia fa’aineine nā mua roa i te fa’a’ohipara’a i te mau mana’o tauturu e ’itehia i roto i teie rāve’a tauturu ’e i roto i te Mai, pe’e mai—Nō te ta’ata iho ’e te ’utuāfare. ’A ha’amana’o e, ’ei ’orometua ha’api’i tei pi’ihia, tei ia ’oe te hōpoi’a nō te mea i ha’api’ihia i roto i te piha ha’api’ira’a.

• Tei roto i teie rāve’a tauturu te mau arata’ira’a nō te mau hepetoma ato’a o te matahiti, maori rā ’e piti sābati e tupu ai te ’āmuira’a rahi. I te mau sābati, ’aita ana’e te Ha’api’ira’a Sābati e fa’aterehia nō te ’āmuira’a titi ’e ’aore rā nō te tahi atu tumu, e nehenehe te mau ’utuāfare e tāmau noa i te tai’o i te Faufa’a ’Āpī i te fare mai te au i te tārena i fa’ata’ahia. ’Ia ’ore te tārena a te Ha’api’ira’a Sābati ’ia tāere roa, ’e nehenehe tā ’oe e mā’iti e vaiiho hō’ē ha’api’ira’a ’e ’aore rā ’ia ’āmui ’e piti ha’api’ira’a. ’Ia ’ore ’ia tupu te ’āhuehue, e nehenehe te mau peresideni o te Ha’api’ira’a Sābati e fa’aara ātea i te mau ’orometua nō te Ha’api’ira’a Sābati nō teie mau tauira’a.