« ថ្ងៃទី ៩–១៥ ខែ មករា ។ ម៉ាថាយ ២; លូកា ២ ៖ ពួកយើងមកថ្វាយបង្គំទ្រង់ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ៩–១៥ ខែ មករា ។ ម៉ាថាយ ២; លូកា ២ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣

ចូរយើងសរសើរទ្រង់ ដោយ ដាណា ម៉ារីអូ វូឌ

ថ្ងៃទី ៩–១៥ ខែ មករា

ម៉ាថាយ ២; លូកា ២

ពួកយើងមកថ្វាយបង្គំទ្រង់

ពីមុនបងប្អូនអានគំនិតនានានៅក្នុងគម្រោងមេរៀននេះ សូមសិក្សា ម៉ាថាយ ២ និង លូកា ២ ហើយកត់ត្រាចំណាប់អារម្មណ៍ខាងវិញ្ញាណរបស់បងប្អូន ។ ការណ៍នេះនឹងជួយបងប្អូនឲ្យទទួលវិវរណៈអំពីរបៀប ដើម្បីបំពេញសេចក្ដីត្រូវការសមាជិកក្នុងថ្នាក់របស់បងប្អូនឲ្យបានល្អបំផុត ។

អញ្ជើញឲ្យចែកចាយ

តើបងប្អូនអាចលើកទឹកចិត្តសមាជិកក្នុងថ្នាក់ឲ្យចែកចាយការយល់ដឹង និងបទពិសោធន៍នានាដែលពួកគេមាន នៅពេលពួកគេបានសិក្សាបទគម្ពីរទាំងនេះដោយខ្លួនឯង និងជាមួយនឹងក្រុមគ្រួសាររបស់ពួកគេតាមរបៀបណា ? ទោះបីជាពួកគេទំនងជាស្គាល់ដំណើររឿងអំពីការប្រសូតរបស់ព្រះអង្គសង្គ្រោះនៅក្នុង ម៉ាថាយ ២ និង លូកា ២ ក្ដី ក៏ពួកគេអាចទទួលគំនិតថ្មីខាងវិញ្ញាណជានិច្ចផងដែរ ។ សូមពិចារណាអញ្ជើញសមាជិកក្នុងថ្នាក់ពីរបី នាក់ឲ្យចែកចាយសារលិខិតមួយ ដែលពួកគេបានរកឃើញ ដែលបានធ្វើឲ្យពួកគេមានចំណាប់អារម្មណ៍តាមរបៀបថ្មីមួយ ។

បង្រៀនគោលលទ្ធិ

ម៉ាថាយ ២:១–១២; លូកា ២:១–៣៨

មានសាក្សីជាច្រើនឃើញការប្រសូតរបស់ព្រះគ្រីស្ទ ។

ដំណើររឿងអំពីអ្នកមកថ្វាយបង្គំនៅក្នុង ម៉ាថាយ ២:១–១២ និង លូកា ២:១–៣៨ អាចជួយសមាជិកក្នុងថ្នាក់របស់បងប្អូនឲ្យពិចារណាអំពីរបៀប ដែលពួកគេបង្ហាញសេចក្ដីស្រឡាញ់របស់ពួកគេចំពោះព្រះអង្គសង្គ្រោះ ។ សូមពិនិត្យមើលតារាងអំពីសាក្សីនៃការប្រសូតរបស់ព្រះគ្រីស្ទនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ឡើងវិញ ។ សមាជិកមួយចំនួននៅក្នុងថ្នាក់រៀនរបស់បងប្អូនអាចនឹងមានការយល់ដឹងចង់ចែកចាយចេញពីសកម្មភាពនេះ ឬបងប្អូនអាចធ្វើសកម្មភាពនេះរួមគ្នាក្នុងថ្នាក់ ។ ហេតុអ្វីវាជារឿងដ៏សំខាន់ដែលពួកសាក្សីទាំងនេះដែលបានឃើញព្រះគ្រីស្ទមានស្ថានភាពនៃជីវិតផ្សេងៗគ្នា ? តើយើងអាចធ្វើតាមគំរូរបស់ពួកគេដោយរបៀបណា?

ពួកគង្វាលបានក្លាយជាសាក្សីដំបូងគេអំពីការប្រសូតរបស់ព្រះអង្គសង្គ្រោះ ។
ពីមុនពួកសាក្សីទាំងនេះបានមកថ្វាយបង្គំព្រះឱរសដែលជាព្រះគ្រីស្ទ ពួកគេបានតាមស្វែងរកទ្រង់ ។ ដើម្បីជួយសមាជិកក្នុងថ្នាក់ឲ្យរៀនចេញពីគំរូរបស់ពួកគេ បងប្អូនអាចសរសេរនៅលើក្ដារខៀននូវចំណងជើងដូចតទៅនេះ ៖ ពួកគង្វាល អាណ ស៊ីម្មាន និង ពួកហោរា ។ បន្ទាប់មក សូមអញ្ជើញសមាជិកក្នុងថ្នាក់ឲ្យអាន ម៉ាថាយ ២ និង លូកា ២ ហើយសរសេរនៅលើក្ដារខៀននូវអ្វីដែលបុគ្គលទាំងនេះបានធ្វើ ដើម្បីស្វែងរកព្រះអង្គសង្គ្រោះ ។ តើដំណើររឿងទាំងនេះផ្ដល់ជាយោបល់អ្វីខ្លះអំពីវិធីមួយចំនួន ដែលយើងអាចស្វែងរកព្រះគ្រីស្ទ ?

ម៉ាថាយ ២:១៣–២៣

ឪពុកម្ដាយអាចទទួលបានវិវរណៈដើម្បីការពារក្រុមគ្រួសាររបស់ពួកគាត់ ។

ដើម្បីចាប់ផ្ដើមការពិភាក្សាអំពីរបៀបដែលព្រះវរបិតាសួគ៌បានដឹកនាំយ៉ូសែប និងម៉ារានៅក្នុងតួនាទីរបស់ពួកលោកជាមាតាបិតារបស់ព្រះអង្គសង្គ្រោះ នោះសូមពិចារណាអញ្ជើញសមាជិកក្នុងថ្នាក់ឲ្យសរសេរគ្រោះថ្នាក់មួយចំនួន ដែលយើងប្រឈមមុខនៅសព្វថ្ងៃនេះដាក់នៅលើក្ដារខៀន ។ តើយើងរៀនអ្វីខ្លះចេញពី ម៉ាថាយ ២:១៣–២៣ អំពីរបៀបរកឃើញការការពារឲ្យរួចផុតពីគ្រោះថ្នាក់ទាំងនេះ ? តើវិវរណៈផ្ទាល់ខ្លួនធ្លាប់ជួយយើងឲ្យការពារក្រុមគ្រួសាររបស់យើង និងមនុស្សជាទីស្រឡាញ់ដទៃទៀតឲ្យរួចផុតពីគ្រោះថ្នាក់តាមរបៀបណា ? តើពួកព្យាការី និងពួកសាវកបានផ្ដល់ពាក្យទូន្មានអ្វីខ្លះ ដើម្បីជួយយើងឲ្យរកឃើញសុវត្ថិភាពខាងវិញ្ញាណ ?

លូកា ២:៤០–៥២

ទោះជានៅក្នុងយុវវ័យក្ដី ក៏ព្រះយេស៊ូវបានផ្ដោតទៅលើការធ្វើតាមព្រះហឫទ័យរបស់ព្រះវរបិតាទ្រង់ដែរ ។

ដំណើររឿងរបស់ព្រះយេស៊ូវដែលកំពុងបង្រៀននៅក្នុងព្រះវិហារបរិសុទ្ធកាលទ្រង់មានព្រះជន្មតែត្រឹម ១២ ព្រះវស្សា អាចមានអានុភាពជាពិសេសចំពោះយុវវ័យដែលងឿងឆ្ងល់អំពីការចូលរួមចំណែក ដែលពួកគេអាចធ្វើបានចំពោះកិច្ចការរបស់ព្រះ ។ បងប្អូនអាចបំបែកសមាជិកក្នុងថ្នាក់ជាដៃគូដើម្បីអាន លូកា ២:៤០–៥២ រួមគ្នា ( សូមមើលការយល់ដឹងចេញពីការបកប្រែដោយយ៉ូសែប ស្ម៊ីធ ដែលមាននៅក្នុង លូកា ២:៤៦ ) ។ ដៃគូនីមួយៗអាចចំណាយពេលពីរបីនាទី ដើម្បីចែកចាយនឹងគ្នានូវអ្វីដែលបំផុសគំនិតពួកគេអំពីដំណើររឿងនេះ ។ តើយើងមានឱកាសអ្វីខ្លះដើម្បីចែកចាយអ្វីដែលយើងដឹងអំពីដំណឹងល្អ ? តើយើងអាចចែកចាយបទពិសោធន៍អ្វីខ្លះ ?
តើ លូកា ២:៤០–៥២ បង្រៀនយើងអ្វីខ្លះអំពីបុគ្គលិកលក្ខណៈរបស់ព្រះយេស៊ូវកាលនៅជាយុវវ័យ ? គន្លងសម្រាប់ការរីកចម្រើនផ្ទាល់ខ្លួន ដែលបានផ្ដល់យោបល់នៅក្នុង លូកា ២:៥២ អាចបំផុសគំនិតឲ្យមានការពិភាក្សាមួយ អំពីអ្វីដែលយើងកំពុងធ្វើដើម្បីប្រែក្លាយកាន់តែដូចជាព្រះគ្រីស្ទ ។ បងប្អូនអាចនឹងផ្ដល់យោបល់ឲ្យសមាជិកថ្នាក់ពិចារណាអំពីរបៀបដែលពួកគេកំពុងតែរីកចម្រើនខាងប្រាជ្ញា ( ខាងបញ្ញា ) រូបកាយ ( ខាងសាច់ឈាម) គាប់ព្រះទ័យព្រះ ( ខាងវិញ្ញាណ ) និងគាប់ចិត្តមនុស្សដទៃ ( ខាងសង្គម ) ។ ពួកគេថែមទាំងអាចដាក់គោលដៅនៅក្នុងចំណុចទាំងនេះមួយ ឬច្រើនផងដែរ ។ ប្រសិនបើបងប្អូនចង់បន្ដការពិភាក្សា អំពីការប្រែក្លាយដូចជាព្រះគ្រីស្ទនៅក្នុងផ្នែកទាំងនេះ ជាពិសេសប្រសិនបើបងប្អូនកំពុងបង្រៀនយុវវ័យ សូមពិចារណាប្រើប្រាស់សេចក្ដីថ្លែងការណ៍នៅក្នុង « ធនធានបន្ថែមទាំងឡាយ » ។

ធនធានបន្ថែមទាំងឡាយ

ការជួយកុមារ និងយុវវ័យឲ្យរីកចម្រើនខាង « ប្រាជ្ញារឹតតែច្រើនឡើង ហើយជាទីគាប់ព្រះហឫទ័យដល់ព្រះ និងចិត្តមនុស្សផង » ។

ប្រធាន ស្ទីវិន ជេ ឡាន់ បានពិពណ៌នាពីកម្មវិធីកុមារ និងយុវវ័យ ដែលផ្អែកលើផ្នែកអំពី លូកា ២:៥២ តាមរបៀបនេះ ៖

« កម្មវិធីកុមារ និងយុវវ័យគឺជាឧបករណ៍មួយ ដើម្បីជួយកុមារគ្រប់រូបក្នុងអង្គការបឋមសិក្សា និងយុវវ័យឲ្យធំឡើងក្នុងភាពជាសិស្ស ហើយទទួលបានការយល់ដឹងដែលពេញដោយសេចក្ដីជំនឿមួយថា តើផ្លូវនៃសុភមង្គលមានលក្ខណៈយ៉ាងណា ។ ពួកគេអាចមកចូលរួម និងចង់បានចំណុចចេះដឹង និងការទទួលស្គាល់នៅតាមផ្លូវនៃសេចក្ដីសញ្ញា ជាទីដែលពួកគេបានទទួលបុណ្យជ្រមុជទឹក និងពិធីបញ្ជាក់អំណោយទានព្រះវិញ្ញាណបរិសុទ្ធ ហើយក្នុងពេលឆាប់ៗនឹងចូលរួមក្នុងថ្នាក់កូរ៉ុម និងយុវនារី ជាទីដែលពួកគេនឹងមានអំណរក្នុងការជួយមនុស្សដទៃ តាមរយៈទង្វើនៃការបម្រើដូចជាព្រះគ្រីស្ទ ។ ពួកគេនឹងដាក់គោលដៅ មិនថាធំឬតូច ដែលនឹងផ្ដល់តុល្យភាពដល់ជីវិតរបស់ពួកគេ ហើយជួយពួកគេឲ្យក្លាយកាន់តែដូចជាព្រះអង្គសង្គ្រោះ » ( « Finding Joy in Christ » Liahona ខែ វិច្ឆិកា ឆ្នាំ ២០២០ ទំព័រ ៣៦–៣៧) ។

ការកែលម្អការបង្រៀនរបស់យើង

រួមបញ្ចូលទាំងអ្នករៀនដែលពុំបានសិក្សាព្រះគម្ពីរនៅគេហដ្ឋានផងដែរ ។ ទោះជាសមាជិកក្នុងថ្នាក់មួយចំនួនប្រហែលជាពុំមានពេលអាន ម៉ាថាយ ២ និង លូកា ២ ពីមុនថ្នាក់ចាប់ផ្ដើមក្ដី ក៏ពួកគេនៅតែអាចចែកចាយគំនិតដ៏មានអត្ថន័យបានដែរ នៅពេលបងប្អូនសិក្សារួមគ្នានៅក្នុងថ្នាក់ ។ សូមប្រាកដថា សមាជិកក្នុងថ្នាក់ទាំងអស់មានឱកាសចូលរួមចំណែកនៅក្នុងការពិភាក្សា ។