6-12 ni Feperueri

Joni 2–4

“E Dodonu Mo Sucu Tale”

Na wiliki ni Joni 2–4 sa sala vinaka ni vakavakarau ni veivakavulici. Vola na vakauqeti vakayalo o sa ciqoma, ka vakayagataka na ituvatuva oqo mo kunea na ikuri ni veivakararamataki kei na vakasama ni veivakavulici.

Sureta na Veiwasei

Vola ena vava ni volavola e tolu na ulutaga oqo: Joni 2 , Joni 3 , kei na Joni 4 . E rawa ni ra taura na lewe ni kalasi e vica na miniti mera taleva lesu na ulutaga oqo mera qai vola ena ruku ni ulutaga yadua e dua na tikini ivolanikalou a vukei ira mera kila vinaka na ivunau kei na ka a yaco ena wase o ya. Me veivosakitaki na veitikina era sa vola.

Vakavulica na iVunau

Joni 2:1–11

Na cakamana i Jisu Karisito “sa vakatakilai mai kina na nona lagilagi.”

• Naituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuval e vakatura tiko me wiliki na Joni 2:1–11 mai na nona rai e dua a tiko ena gauna a vukica kina o Jisu na wai me waini. De rawa vei ira na lewe ni kalasi mera wasea na veivakararamataki era sa rawata mai na kena vakayacori oqo. Na cava eda sa vulica baleta na iVakabula mai na veitikina oqo? E vakaraitaka vakacava na caka mana oqo na lagilagi ni Kalou? (raica na tikina e 11).

Joni 2:13–22

Sa rawa meda taqomaka na veivanua kei na veika tabu.

• Me vukei ira na lewe ni kalasi me ra vuli mai na italanoa kei Jisu ni a vakasavi ira tani na dauveisau ilavo mai na valetabu, e rawa ni o kerei ira me ra vakasamataka eso tale na ka, me ikuri ni valetabu, ka dau vakabibitaka na Turaga me ka tabu. E rawa vakacava ni da vukea me maroroi na bibi ni veika tabu oqo?

Joni 3:1–21

E dodonu meda sucu vou meda curu ki na matanitu ni Kalou.

• Eda na vakamacalataka beka vakacava vua e dua na ibalebale ni sucu tale? Mo sureta na lewe ni kalasi mera vakatovotovotaka vei koya e toka e yasana mera sauma vakacava na taro oqo? Ni ra vakayacora, sa rawa mera veivosakitaka na taro vakaoqo: Na cava eda vulica mai na vosa i Jisu ena Joni 3:3–7? E vukei keda vakacava na veivutuni, papitaiso, kei na veivakadeitaki meda sucu tale? Na itukutuku ena “iKuri ni iVurevure” e rawa ni vakuria na veitalanoa oqo.

• Eso na tamata era vakabauta ni sega ni rawa ni veisau dina e dua na tamata. Ia, o Nikotimo e dua na ivakaraitaki ni dua ka a veisau ena vuku ni kena vakamuri na kosipeli i Jisu Karisito. Ni gadrevi me vukei na lewe ni kalasi mera raica na ka oqo, sureti ira mera vakasaqara na Joni 3:1–2; Joni 7:40–52; kei na Joni 19:39–40. Na cava eda vulica mai na itukutuku oqo baleta na nanuma kei na vakabauta nei Nikotimo? A veisau vakacava ni toso na gauna? Na ivakaraitaki cava eda rawa ni wasea baleti ira na tamata eda kila ni ra sa veisau ena vuku ni kosipeli?

Joni 4: 5–34

Sa solia tu vei keda o Jisu Karisito na wai ni bula vata kei na “magiti” ni cakava na cakacaka ni Kalou.

• Ena gadreva na yagoda na kakana kei na wai ena veisiga. A tukuna ko Jisu na gagadre ni vuravura taucoko oqo ena nona vakavulici yalewa ni Samaria kei iratou Nona tisaipeli (raica na Joni 4:5–34) Me vukei ira na lewe ni kalasi mera kila vinaka na ka e vakavulica tiko na iVakabula, mo vakabira na iyaloyalo ni kakana kei na wai ena vava ni volavola ka sureti ira na lewe ni kalasi mera vola ena ruku yadua ni iyaloyalo na dina vakayalo a vakavulica tiko ko Jisu. E vakamamautaka vakacava na iVakabula na noda viakana vakayalo kei na karamaca vakayalo?

  

  Sa solia tu vei keda o Jisu Karisito na wai ni bula.

• Ena vukei ira na lewe ni kalasi ni raici lesu na kena toso cake na nona ivakadinadina na yalewa ni Samaria me baleti Jisu Karisito sa rawa mera vakasamataka vakatitobu na sala era a kila kina ni sai Koya dina na Mesaia. Mera raica vata va-kalasi na vosa a taurivaka ko yalewa ni Samaria me tukuna kina na iVakabula ena Joni 4:6–30. Na cava era tukuna tiko na vei vosa oqo me baleta na nona kila se ko cei sara mada o Jisu? Eda sa tubu tiko vakacava ena noda ivakadinadina nida kila ni sai Koya na noda iVakabula?

iKuri ni iVurevure

Na cava na ibalebale ni sucu vou tale.

E vakavulica o Elder David A. Bednar: “Ni yaco na veisau … e dua na ka cecere, era sega ni ka lailai—e dua na sucu vou vakayalo kei na veisau cecere ena veika eda vakila ka gadreva kei na ka eda vakasamataka ka cakava, kei na veika e baleti keda. E ka dina sara, na kosipeli i Jisu Karisito e vakavurea e dua na veisau levu ka tudei ena noda bula ka rawa mai na noda vakararavi ena ‘nona yalovinaka kei na nona loloma kei na nona lomasoli na Mesaia Yalosavasava’ (2 Nifai 2:8 Ni da digitaka meda muria na iVakavuvuli, eda digitaka meda veisau—meda sucu vou tale vakayalo” (“E Dodonu Mo Sucu Tale,” Liaona, Me 2007, 20).

E vakavuvulitaka o Peresitedi Dallin H. Oaks: “Eda sa sucu vou tale ni da cakava e dua na veiyalayalati kei na noda iVakabula ni da sa sucu ena wai kei na Yalo ka taura vei keda na yaca i Jisu Karisito. Eda vakavouia na veiyalayalati oqo ena noda laki vakayagataka na sakaramede ena vei Sigatabu. Era vakadeitaka na Yalododonu Edaidai ni o ira sa sucu tale ena sala oqo era sa luvena tagane ka luvena yalewa vakayalo o Jisu Karisito (raica na Mosaia 5:7; 15:9–13; 27:25). Ia, ni gadrevi me vakilai na inaki ni veivakalougatataki ni sucu tale oqo, e dodonu meda maroroya tikoga na noda veiyalayalati ka vosota ki na ivakataotioti” (“O sa Vakabulai Beka?,” Ensign, Me 1998, 56).

Vakatorocaketaki ni Noda Veivakavulici

E sega ni uasivi cake o qasenivuli mai vei gonevuli. E ka bibi na nomu itutu vaka-qasenivuli, ia e sega ni o iko duadua ga na ivurevure ni veivakauqeti ena kalasi. Mo vukei ira na lewe ni kalasi mera vuli mai vua na Yalo ka veiwasei vakai ira ena ka era sa vulica.