Veivakavulici o Jisu ena bati ni baravi

E Vakavulici Ira na Tamata o Jisu e Baravi, mai vei James Tissot

20–26 ni Feperueri

Maciu 6–7

“Sa Vakatavulici Ira me Vaka e Dua sa Tu Ga Vua na Lewa”

Ni vakarau veivakavulici, mo vakarautaki iko mada. Vulica na Maciu 6–7, ka vola na nomu vakauqeti vakayalo. Oqo ena vukea mo ciqoma na ivakatakila mo sotava vinaka kina na nodra gagadre na nomu kalasi. Mo qai vakasaqara ena ituvatuva oqo na vakasama ni veivakavulici.

ivakatakilakila ni veiwasei

Sureta na Veiwasei

Sureta na lewe ni kalasi mera wasea na itukutuku cava ena Vunau ena Ulunivanua era nanuma e gadrevi vakalevu nikua. Vakayaloqaqataka ira na lewe ni kalasi mera kuria ki na nodra veiwasei vakai ira.

ivakatakilakila ni veivakavulici

Vakavulica na iVunau

Maciu 6-7

Ni da rogoca ka cakava na veivakavulici ni Turaga, ena tarai cake na noda bula ena yavu tudei.

• Na veivakavulici cava mai na Maciu 6–7 ena yaga duadua cake vei ira o vakavulica? Sa rawa mo vola ena vava ni volavola e vica na tikina mai na Maciu 6–7 e tiko kina na veivakavulici oqo. Me ra digitaka na lewe ni kalasi e dua na tikina me vulica vakanomodi ka vola ena vava ni volavola e dua na dina vakayalo sa vulica. Sa vakauqeta vakacava na noda bula na veivakavulici oqo?

• A tinia na iVakabula na Nona vunau ena dua na vosa vakatautauvata ena vukea na kalasi mera kila vinaka na bibi ni bulataki na veivakavulici ni iVakabula (raica na Maciu 7:24–27; raica talega na Ilamani 5:12). Ni vakasamataki na vosa vakatautauvata oqo, mera cakacaka vata na kalasi me tarai cake e dua na yavu kaukauwa ena kena vakayagataki na buloko, bilo, se iyaya tale eso ka vakatovolea na kaukauwa ni nodra yavu. Sa rawa talega mera vola na yaca ni nodra iyaya ni tara vale ena veika e rawa ni cakava me bulataki na veivakavulici ni iVakabula. Ena veivuke vakacava na veika oqo meda vorata rawa kina na cagilaba ni bula oqo?

Maciu 6: 5–13

E vakavulica vei keda na iVakabula na ivakarau ni masu.

• Ena veivuke ki na lewe ni kalasi na masu ni iVakabula mera kila nodra rawa ni tara cake nodra dui masu ena vakamuri na ivakaraitaki ni iVakabula. Mo sureti ira mera vola ena vava ni volavola na veimalanivosa mai na Maciu 6:9–13 (se ena Luke 11:1–4) e vakauqeti ira. Ni da vakasamataka vakatitobu na vosa ni iVakabula, na cava eda vulica me baleta na masu? E rawa mera vakasalataki na lewe ni kalasi mera moica na malanivosa ni iVakabula ki na veika mera kaya ena nodra masu. Me vakataka, “Solia mai vei keimami ena siga oqo na kakana e yaga vei keimami” ka rawa me moici me “Kerea ni vukea na noqu sasaga meu qarava noqu matavuvale.”

• Ni wiliki oti vakalasi na Maciu 6:5–13, , sa rawa mo veivosakitaka na taro vakaoqo: Sa vaqaqacotaka vakacava na masu na nomu veimaliwai kei Tamada Vakalomalagi? Sa vukei iko vakacava na masu mo kila na loma ni Kalou?

Maciu 7: 7–11

Sa dau sauma na Tamada Vakalomalagi na masu.

• Me vukei ira na lewe ni kalasi me vaqaqacotaki nodra vakabauta ni na rogoca ka sauma nodra masu na Kalou, mo vola kerekere, vakasaqara, kei na tukituki ena papa. Me ra qai vakasaqaqara na lewe ni kalasi ena ivolanikalou me baleta eso na tamata era a “kerekere,” “vakasaqara,” ka “tukituki (na ivakaraitaki, raica na 1 Nifai 11:1; Ica 2:18–3:6; Josefa Simici—Ai Tukutuku 1:11–17). Na cava eda vulica mai na ivakaraitaki oqo me baleta na saumi mai ni noda masu?

• Eso na itukutuku bibi ena Maciu 7:7–11 e rawa ni kune ena iVakadewa i Josefa Simici ni Maciu 7:12–17 (ena Bible appendix). Ena veitikina oqo, era raica na tisaipeli i Jisu na nodra ulubale eso mera sega ni vakasaqara na dina mai vua na Tamada Vakalomalagi. Mo tarogi ira na lewe ni kalasi mera raitayalotaka e dua na itokani e dredre me vakasaqara na veidusimaki se veivakalougatataki ni Turaga. Na cava era na kaya na lewe ni kalasi me vakayaloqaqataki kina na itokani oqo? Era na vakayagataka vakacava na vosa ni iVakabula ena Maciu 7:7–11?

Maciu 7:15–20

Eda na kilai ira na parofita dina kei ira sa vakailasu ena vuadra.

• Era sa sotava beka na lewe ni nomu kalasi na filosofi vakailasu kei na lawaki nei vunimeca, ena initaneti se ivurevure tale eso. Era sa rogoca tale beka ga na nodra vakacacani na italai ni Turaga. O na vukei ira vakacava mera kilai ira vinaka na parofita vakailasu kei na nodra veivakavulici mai na ka dina? Sa rawa mo vakaraitaka eso na tiki ni vuata ka taroga na nodra nanuma baleta na vuanikau era beti mai kina. E vukei keda vakacava na cakacaka oqo meda kila vinaka na Maciu 7:15–20? Mo ni wilika vata talega eso na nodra itukutuku sa oti na parofita bula. Na “vuana” se macala cava ena solia mai na muria na nodra ivakasala?

  na vuana

  Eda na kilai ira na parofita dina kei ira sa vakailasu ena vuadra.

• Ena veivuke naMaciu 7:15–20 me tara cake na nodra vakabauta na lewe ni kalasi na ilesilesi vakalou i Parofita Josefa Simici. Na cava so na vua ni cakacaka sa rawata o Josefa Simici? Ena vakasama eso, raica na itukutuku nei Elder Neil L. Andersen “Josefa Simici” (Liaona, Nove. 2014, 28–31). Eda na vakayagataka vakacava na vakatautauvata ni vosa ni iVakabula ena Maciu 7:15–20 meda vakadinadinataka vei noda itokani kei na matavuvale baleti Parofita Josefa?

Vakatorocaketaki ni Noda Veivakavulici

Kakua ni rerevaka na vagagalu. “Na taro vinaka ena taura toka na gauna me saumi mai. Era na gadreva na vakasama titobu, na vaqaqara, kei na veivakauqeti. Na gauna o waraka tiko kina na isaunitaro sa gauna tabu ni vakasama vakatitobu. Drovaka na veitemaki mo yalana na gauna ena nomu sauma ga na nomu taro se mo toso tale kina dua na ulutaga.” (Veivakavulici ena iVakarau ni iVakabula,31