O Jisu e vakaduria tiko na tamata mai na idavodavo

27 ni Feperueri–5 ni Maji

Maciu 8; Marika 2–4; Luke 7

“Sa Vakabulai Iko na Nomu Vakabauta”

Ena tekivu nomu vakarau veivakavulici ni ko vulica ena masumasu na Maciu 8; Mariika 2–4; kei na Luke 7. Lako Mai, Mo Muri Au—Me Baleta na Tamata Yadua kei na Matavuvale ena vaqaqacotaka na nomu vulica ka vakauqeta na vakasama ni veivakavulici me ikuri ni kena e vakavulici tiko oqo.

ivakatakilakila ni veiwasei

Sureta na Veiwasei

Era sa rairai kunea na kalasi na veivakararamataki kaukauwa ni ra vulica vakai ira na caka mana ena wase oqo (raica na levu ni veivakabulai ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Sa rawa mo sureta na lewe ni kalasi mera wasea nodra veivakararamataki vua e dua se ki na kalasi.

ivakatakilakila ni veivakavulici

Vakavulica na iVunau

Maciu 8; Marika 2; Luke 7

E yaco na caka mana ena lewa ni Kalou kei na noda vakabauti Jisu Karisito.

• O na vakayagataka vakacava na itukutuku ni cakamana ni iVakabula me vukei ira na lewe ni kalasi me ra vakalevutaka na nodra vakabauti Koya? Sa rawa mo kerei ira mera vola ena vava ni volavola e vica na veivakabulai veivakurabuitaki mai na Maciu 8; Marika 2; kei na Luke 7. E rawa ni ra veivosakitaka na lewe ni kalasi na sala era a vakaraitaka kina na tamata era a vakabulai na nodra vakabauti Karisito. Na cava era vakavulica na itukutuku oqo me baleta na vakabauta kei na cakamana? Sa rawa ki na lewe ni kalasi mera wasea na ikuri ni dina me baleta na vakabauta kei na cakamana mai na Momani9:15–21; Ica 12:12–16; Moronai 7:27–37; kei na Vunau kei na Veiyalayalati 35:8 (raica talega na Bible Dictionary, “Cakamana”). Ena gauna cava eda sa bau raica kina na cakamana ni da vakabauti Jisu Karisito?

• Na itukutuku ni cakamana ena Marika 2:1–12 e vakavulica, ena maliwa ni veika tale eso, na yaga ni cakacaka vata ena duavata me vukea na iVakabula ena nodra qaravi o ira era gadreva vakayalo se vakayago. Sa rawa mo sureta na lewe ni kalasi mera railesuva na itukutuku mai na ivolanikalou ka wasea na ikuri ni veivakararamataki mai na itukutuku nei Elder Chi Hong (Sam) Wong “Veivueti ena Duavata” (Liahona, Nove. 2014, 14–16; raica talega na “iKuri ni iVureure”). Na cava eda rawa ni vulica mai na Marika 2:1–12 me baleta na yaga ni cakacaka ena duavata mera vueti o ira era vakaleqai tu? (raica talega Marika 3:24–25).

Marika 4:35–41

Sa tiko vei Jisu Karisito na kaukauwa me veivakacegui ena loma ni cava ni bula.

• O sa rairai kila tiko beka na ibolebole eso era sotava tiko na lewe ni kalasi. Ena vuku ga ni da sotava kece na vakatovolei ni noda bula, ni talevi na itukutuku ena Marika 4:35–41 ena rawa me tarai cake na nodra vakabauta na iVakabula ni ra na vakacegui kina. Solia ki na tamata yadua e dua na tiki ni pepa, ka kerea mera vola ena dua na yasana e dua na vakatovolei era sa sotava. Ena yasana ka dua, mera vola kina e dua na ka mai na Marika 4:35–41 e vakauqeti ira mera gole vua na iVakabula ni ra vakatovolei. Vakauqeti ira na lewe ni kalasi me ra wasea na veika era vola, kevaka era logaloga vinaka kina.

• Na sere ni lotu “Jisu Sa Laba Na Cagi” (Hymns, no. 57) e yavutaki ena italanoa ena Marika 4:35–41. Sa rawa mera raica na lewe ni kalasi na qaqani sere e tukuna tiko na malanivosa ena ivolanikalou. Sa rawa mo vakaraitaka talega e dua na iyaloyalo e tukuna tiko na ka sa yaco (raica na iVola ni iYaloyalo Vakosipeli, naba 40) ka veivosakitaka na gauna cava e tukuna tiko na daudroini. Na cava tale eso na sala mo na vukea kina na lewe ni kalasi mera kila vinaka na ibalebale kei na kaukauwa ni caka mana oqo?

O Jisu ena waqa sa vakamaravutaka na cava

Mai na Rere ki na Vakabauta, mai vei Howard Lyon

Luke 7:36–50

Ni sa vosoti na noda ivalavala ca, ena titobu na noda lomana na iVakabula.

• Na cava eda rawa ni vulica mai na ivakaraitaki ni yalewa kei na veivakavulici ni iVakabula ena Luke 7:36–50 ni da vakasaqara me vosoti na noda ivalavala ca? E vukei keda vakacava na veivutuni meda toro voleka yani vei Jisu Karisito? E vakayarayarataka vakacava na itukutuku oqo na ivakarau ni noda raici ira era sa ivalavala ca?

ivakatakilakila ni ivurevure

iKuri ni iVurevure

“Ni sa raica ko Jisu na nodratou vakabauta.”

E wasea o Elder Chi Hong (Sam) Wong na veivakararamataki oqo me baleta na itukutuku ena Marika 2:1–12:

“Meu wasea e dua tale na iyau vunitaki e tiko ena ivolanikalou oqo. E kunei ena tikina e 5: ‘Ni sa raica ko Jisu na nodra vakabauta’ (vakaikuritaki). Au a sega mada ni raica oqo e liu—nodra vakabauta. …

O cei mada a vakamacalataki ira tiko o Jisu? O iratou talega na le va a laveti koya na paralasi, tagane paralasi, o ira era a masulaki koya, kei ira kece era a vakarorogo tiko ki na vunau i Jisu ka ra kailavaka lo toka e lomadra me yaco na caka mana. E rawa ni oka talega kina e dua e vakawati, dua na itubutubu, dua na luvena tagane se yalewa, dua na daukaulotu, dua na peresitedi ni kuoramu, dua na Peresitedi ni iSoqosoqo ni Veivukei, bisopi, kei na itokani tu vakayawa. Eda sa rawa kece ni veivukei. E dodonu meda maqusa tiko ena nodra vakasaqarai me ra vueti o ira era vakaleqai tu” (“Veivueti ena Duavata,” Liaona, Nove. 2014, 16).

Vakatorocaketaki ni Noda Veivakavulici

Wasei wasoma nomu ivakadinadina. Na nomu ivakadinadina, rawarawa ka dina baleta na dina eso vakayalo sa rawa me ka ni veivakauqeti kaukauwa vei ira o vakavulica. E sega ni gadrevi me maqosa se balavu na nomu ivakadinadina. Sa rawa, me ivakadinadina rawarawa, ni sa caka mana na kosipeli sa tu ena nomu bula.