Tabaki Pita o Jisu

6–12 ni Maji

Maciu 9–10; Marika 5; Luke 9

“O Iratou na Tinikarua Oqo sa Tala Yani ko Jisu”

Ni o wilika na Maciu 9–10; Marika 5, kei na Luke 9, vakasaqara na veivakauqeti ni Yalo Tabu me baleta na nodra gagadre o ira o vakavulica. Na volai ni nomu vakauqeti vakayalo ena rawa ni vukei iko mo vakavakarau ki na dua na ka o sotava ka na vakalougatataki iko kei ira na lewe ni nomu kalasi.

ivakatakilakila ni veiwasei

Sureta na Veiwasei

Sa rawa mo kerei ira na lewe ni kalasi mera vola yadua ena tiki ni pepa e dua na dina era sa vulica mai ena ivolanikalou ena macawa oqo, oka kina na tiki ni ivolanikalou. Ni oti na kumuni ni pepa, digitaka e vica me wilika ki na kalasi. E rawa vakacava meda vakayagataka na ivakavuvuli oqori ena noda bula?

ivakatakilakila ni veivakavulici

Vakavulica na iVunau

Maciu 9

Sa tu vei Karisito na kaukauwa me vakabulai keda vakayago ka vakayalo talega.

• E vuqa na cakamana ni veivakabulai ni iVakabula e vakavuvulitaka talega na dina vakayalo. Me vukei ira na lewe ni kalasi mera kila vakavinaka oqo, sa rawa mo wasea vakava na kalasi ka lesia ki na ilawalawa yadua e dua vei ira na malanivosa oqo: Maciu 9:2–8; Maciu 9:18–19, 23–26; Maciu 9:20–22; kei na Maciu 9:27–31. Kerea na ilawalawa yadua mera vulica na cakamana e vakamacalataki tiko ena nodra iwase ka qai vakalekalekataka ena kalasi. Na dina cava soti eda vulica mai na veicakamana oqo?

na marama me tara na icurucuru balavu i Jisu

Vakararavi vua na Turaga, mai vei Liz Lemon Swindle

Maciu 10

Sa solia na Turaga na kaukauwa vei ira na Nona italai mera cakava na Nona cakacaka.

• Na lewa ni iVakabula vei ira na Nona iApositolo ena rawa ni vukea na noda dui itavi. Era sa rairai vakararamataki na lewe ni kalasi ki na ulutaga oqo ni ra vulica vakai ira yadua; me vakataka na itaviqaravi ena ulutaga oqo ena Lako Mai, Mo Muri Au—Baleta na Tamata Yadua kei na Matavuvale . Sureta mera wasea na ka era sa vulica se mera cakacaka vakailawalawa mera cakava na itaviqaravi ena kalasi. Sureta na lewe ni kalasi mera wasea na gauna era a vakila kina na kaukauwa ni iVakabula ni ra cakava na nodra veikacivi.

• Ena veivuke vakacava na kena vulici na lewa a solia na Karisito vei iratou na Nona iApositolo ena Maciu 10ki na lewe ni kalasi mera kila vinaka na nodra itavi na parofita kei na iapositolo ena gauna oqo? Ena veivuke toka ke vakatauvatani na lewa ni iVakabula vei iratou na Le Tinikarua ki na lewa e solia ki na Kuoramu ni iApositolo Le Tinikarua ena itabagauna oqo, e tiko ena “iKuri ni iVurevure.” Sa rawa ki na lewe ni kalasi mera wasea na sala era a vakauqeti kina mai na nodra veiqaravi vakalotu na iApositolo bula. Cavuta na nomu ivakadinadina baleta na nodra kacivi vakalou na parofita kei na iapositolo bula, ka sureta na lewe ni kalasi mera cakava vakakina.

Maciu 10:17–20

Ni da sa cakava tiko na veiqaravi ni Turaga, ena vakauqeti keda o Koya ena vosa meda cavuta.

• Eso na gauna era dau lomataqaya eso ni ra vakavulica se vosa vei ira eso baleta na kosipeli. Ia sa yalataka na Turaga vei iratou na tisaipeli ni na vukea me ratou kila na ka me tukuni. Na cava e gadrevi meda cakava meda ciqoma kina na veivuke yalataki ni Turaga? Sureta na lewe ni kalasi mera wilika na Maciu 10:19–20; Vunau kei na Veiyalayalati 84:85; kei na Vunau kei na Veiyalayalati 100:5–8 me kunei kina na isaunitaro oqo. Gauna cava e sa bau vukei iko kina na Yalo Tabu mo kila na ka mo kaya? Sa rawa mo wasea na gauna vaka o ya ka sureta na lewe ni kalasi mera wasea vakakina.

ivakatakilakila ni ivurevure

iKuri ni iVurevure

Na lewa vei ira na iApositolo edaidai.

Ena gauna a kacivi kina e so na imatai ni lewe ni Kuoramu ni iApositolo Le Tinikarua ena itabagauna oqo, a solia vei ira o Oliver Cowdery e dua na lewa e tautauvata na kena a solia o Jisu Karisito ena Maciu 10. A kaya o koya:

“‘Ena gadrevi mo ni valuta na nodra lewa vakatani na veimatanitu kece. … Au sa vakaroti kemuni kina, mo ni teivaka na yalomalumalumu cecere, niu sa kila tu na viavialevu ni yalo ni tamata. Qarauna, de ra laveti iko cake na dauveivakaisini kei vuravura. Qarauna, de yaco na nomu gagadre me na vesuki mai na veika ni vuravura. Me vakaliuci tikoga na nomu cakacaka vakalotu. … Sa ka bibi mo ciqoma e dua na ivakadinadina mai Lomalagi me baleti iko, mo rawa ni vakadinadinataka kina na ka dina.

“‘… E dodonu mo cavuta na itukutuku oqo kivei ira era nanuma tu ni ra sa vuku. Era na vakacacani iko kina; ka ra na via vakamatei iko. Sa dau vakasaqara o vunimeca me vakamatei ira na italai ni Kalou. Mo tu vakarau tu mo ni na solia na nomuni bula, kevaka ena gadreva na Kalou mo solia me baleta ba kena tosoi ka tarai cake ena Nona inaki.

“A qai taura yadudua na ligadra ka kaya, ‘Sa lomamu taucoko dina sara mo vakaitavi ena cakacaka vakalotu oqo, mo kaburaka na kosipeli ena gugumatua taucoko vata kei ira na tacimu, me vaka na ivakaro kei na inaki ni lewa o sa ciqoma oqo?’ O ira yadua era a saumi ena io” (ena “Minutes and Blessings, 21 February 1835,” Minute Book 1, 159–161, 164, josephsmithpapers.org; vakavoutaki na sipeli kei na pagitueti).

Vakatoroicaketaki Ni Noda Veivakavulici

Vakadinadinataka na veivakalougatataki. Ni ko veisureti mera na cakava, vakadinadinataka vei ira o vakavulica tiko ni ra na ciqoma na veivakalougatataki ni Kalou sa yalataki tu ni ra vakabauta tiko na Nona veivakavulici. Me kakua ni noda inaki taumada na veivakalougatataki ni talairawarawa, ia na gagadre nei Tamada Vakalomalagi me vakalougatataki ira na Luvena taucoko. (Raica na Veivakavulici ena iVakarau ni iVakabula,,35.)