witi sa vakarau tamusuki

20–26 ni Maji

Maciu 13; Luke 8; 13

“O Koya sa Vakadaligana me rogoca, Me Mani Rogoca Sara”

Ni wiliki tiko, vakasamataka eso beka na nodra taro na lewe ni nomu kalasi ni ra saga mera kila vinaka na itukutuku ni vosa vakatautauvata. Na cava beka e dredre me kilai vinaka? Ena vakarautaki iko vakacava nomu vuli me saumi kina na nodra taro?

ivakatakilakila ni veiwasei

Sureta na Veiwasei

Taleva lesu vata kei na kalasi na “Vakasama me Vakatorocaketaki Nomu Vulica na iVolanikalou” ena Lako Mai, Mo Muri Au—Baleta na Tamata Yadua kei na Matavuvale. Sureti ira na lewe ni kalasi mera wasea na iwalewale era a vakayagataka mera vulica kina na Maciu 13 kei na Luke 8; 13.

ivakatakilakila ni veivakavulici

Vakavulica na iVunau

Maciu 13:1–23

E dodonu mena vakarautaki na yaloda meda ciqoma kina na vosa ni Kalou.

• Mo na vakayagataka vakacava na vosa vakatautauvata ni daukakaburaki mo vakauqeti ira kina na lewe ni kalasi mera vakarautaka na yalodra mera ciqoma na vosa ni Kalou? Sa rawa mo vola na Tisaipeli kei na Eso tale ena vava ni volavola. Sureti ira na lewe ni kalasi mera wilika na Maciu 13:10–17 ka raica na sala a vakamacalataka kina na iVakabula na kedrau duidui na Nona tisaipeli kei ira eso tale era a rogoca na Nona vosa vakatautauvata. Mo qai kerei ira na lewe ni kalasi mera vakasaqara ena tikina e 18–23, na veika e dau vakavuna me “didivara” na daligada se tabonaki na matada ki na veika vakayalo. Na veidusimaki cava eda sa ciqoma tiko nikua mai vua na Kalou kei ira na Nona italai? Eda na vakarautaka vakacava na “qele vinaka” me ciqomi kina na nodra veidusimaki? (tikina e 23).

• Sa rawa mo sureta e vica ena lewe ni kalasi mera vakarau mai me ra mai vakavulica e dua na tiki ni vosa nei Elder Dallin H. Oaks “Na Vosa Vakatautauvata ni Daukakaburaki” (Liaona, Me 2015, 32–35). Na cava e vakaikuritaka na itukutuku oqo meda kila vinaka kina na vosa vakatautauvata?

Maciu -35: 13:24–35, 44–53

Ena vukei keda na vosa vakatautauvata i Jisu meda kila vinaka na tubu, icavacava, kei na yaga ni Nona Lotu.

• O na vukei ira vakacava na lewe ni kalasi mera kila vinaka na dina me baleta na Lotu e vakavulici tiko ena vosa vakatautauvata i Jisu ena Maciu 13? Sa rawa mo vola e vica na vosa vakatautauvata ena vava ni volavola (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale kei na Nodra iVakavuvuli na Peresitedi ni Lotu: Josefa Simici, [2007], 293–303). Sa rawa ki na lewe ni kalasi mera vulica yadua se vakailawalawa lalai e dua se sivia na italanoa vakaibalebale ka wasea na veika era sa vulica me baleta na tubu kei na icavacava ni Lotu i Karisito.

e qoli tiko ena lawa e dua na tagane

Na matanitu vakalomalagi sa vaka nona lawa ni ika na gonedau.

• Na cava eda sa vulica me baleta na yaga ni noda sa mai itaukei nida sa mai lewena na Lotu mai na vosa vakatautauvata ni iyau vunitaki ena were kei na mataniciva vinaka, e tiko ena Maciu 13:44–46? Eso na lewe ni nomu kalasi (se so era kila) era sa solibula oti beka—ka lelevu se lailai—me yaco mera lewe ni Lotu. Sureti ira na lewe ni kalasi mera wasea nodra solibula se raica eso me rawa ni ra itaukei nira sa mai lewena na Lotu. Na veivakalougatataki cava sa yaco ena vuku ni ka oqo? Sureti ira na lewe ni kalasi mera vakasamataka vakatitobu na veika era sa vakauqeti mera solibula kina ena vukuna na iVakabula.

Maciu 13:24–30, 36–43

Ni na oti na vuravura, ena vakasokumuni ira na yalododonu na Turaga ka vakarusai ira na tamata ca.

• O na vukei ira vakacava na lewe ni kalasi mera vuli mai na vosa vakatautauvata ni witi kei na co ca ena vukea mera Yalododonu Edaidai ka dau yalodina tikoga? Tekivu ena nomu sureta e dua na lewe ni kalasi me vakalekalekataka na vosa vakatautauvata kei na kena ibalebale. Na cava eso na lesoni ena vosa vakatautauvata oqo me baleti keda nikua? Na cava e bibi kina meda kila ni sa vakatara na Turaga vei ira na Nona Yalododonu mera “tubu vata” (Maciu 13:30) kei na tamata ca me yacova na tatamusuki? Eda na vaqaqacotaka tiko vakacava na noda vakabauti Jisu Karisito, ni sa voliti keda tu na veika ca? Ena vukei keda beka vakacava na Karisito? Na Vunau kei na Veiyalayalati 86:1–7 kei na itukutuku nei Elder L. Tom Perry ena “iKuri ni iVurevure” e rawa ni solia na ikuri ni veivakararamataki ki na kena bulataki ena gauna oqo na vosa vakatautauvata oqo.

ivakatakilakila ni ivurevure

iKuri ni iVurevure

E dodonu meda vakabulabulataka na veika vinaka.

E vakavulica o Elder L. Tom Perry: O koya na meca makawa oya ni kawatamata sa qai kunea e vuqa sara na sala e rawa ni vakasamataka me rabailevu kina na vanua e kaburaka tiko yani kina na sila ca. Sa kunea rawa o koya na sala me ra curubasikata yani kina na veitikina savasava ni noda veivuvale. Sa yaco me rabailevu sara na veika ca vakavuravura ka vaka me sega ni dua na sala dina me vakawabokotaki kina. Era yaco mai ena sala wa ni livaliva kei na maliwalala ki na veiyaya sara ga eda taracake me vakavulici keda ka vakamarautaki keda. Erau sa tubu vata vakaveivolekati na witi kei na sila ca. Na dauveiqaravi ena were e dodonu, ena nona igu taucoko me karona na ka vinaka ka vakaukauwataka ka vakarairaivinakataka me kakua kina ni taleitaka na mata se na daliga na sila ca” (Kunea na Vakacegu e Tudei ka Tara Cake na Matavuvale Tawamudu,” Liaona,Nove. 2014, 44).

Vakatorocaketaki ni Noda Veivakavulici

Yavutaka nomu veivakavulici ena ivunau. Raica me vakanamata na veivosaki ni nomu kalasi ena yavu ni ivakavuvuli ena ivolanikalou. O na cakava oqo ena nomu kerea na kalasi mera wilika taumada mai na ivolanikalou, me usutu ni veivosaki ni kalasi na ivolanikalou, ka kerea na kalasi mera wasea na nodra i vakadinadina baleta na vunau dina. (Raica na Veivakavulici ena iVakarau ni iVakabula,, 20–21.)