E taubale vata kei ira na tisaipeli o Jisu ka ra kauta voli na basikete madrai

27 ni Maji–2 ni Epereli

Maciu 14; Marika 6; Joni 5–6

“Dou Kakua ni Rere”

Ni ko vakavakarau mo veivakavulici mai na Maciu 14; Marika 6; kei na Joni 5–6, vakasaqara na itukutuku e ganita na kalasi. Ni ko cakava, sa rawa mo vakayagataki ira na kalasi ena veika vakaibalebale cake ena ivolanikalou.

ivakatakilakila ni veiwasei

Sureta na Veiwasei

Dua na sala me tekivutaki kina e dua na veivosaki o ya mera sureti e vica na lewe ni kalasi mera digitaka e dua na wase mai na wiliwili ka wasea e dua na itukutuku mai na wase o ya e vakaibalebale cake vei ira. Ni ra sa veiwasei tiko, mera taro na vo ni kalasi se kuria ena veivakarararamataki.

ivakatakilakila ni veivakavulici

Vakavulica na iVunau

Joni 5:16–47

Sai Jisu Karisito na Luvena Daulomani na Tamada Vakalomalagi.

• Ena Joni 5, a vakarautaka o Jisu e vica na veivakararamataki me baleti Koya, na Tamana, kei na na veimaliwai kei na Tamana. Me ra vukei na lewe ni kalasi mera kunea na veivakararamataki oqo, mo wasei ira vakailawalawa ka solia e vica na miniti mera vola na dina taucoko era kunea rawa ena tikina e 16–47 me baleta na ivakarau ni Kalou kei Jisu Karisito, kei na Kedrau isema. Sureti ira na ilawalawa me ra veivukevuke ni wilika na dina eso mai na nodra lisi. Ena vukei keda vakacava na dina oqo meda kila vinaka cake na Tamada Vakalomalagi kei na Luvena? Eda na muria vakacava na ivakaraitaki ni talairawarawa i Jisu Karisito vei Tamana?

• Na itaviqaravi ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakaturi kina mera kila na veigauna kece e vakayagataka kina o Jisu na vosa Tamaqu ena Joni 5:16–47. Sureta e vica na lewe ni kalasi mera wasea na veika era sa vulica ni ra sa vakacavara na itaviqaravi. Kerei ira me ra wasea na veivakararamataki era rawata me baleta na Tamada Vakalomalagi kei na Luvena Daulomani.

Maciu 14: 15-21; Marika 6: 33-44; Joni 6: 5-14

E rawa ni vakalevutaka na noda ivakacacabo ena yalomalumalumu na iVakabula me rawati na Nona inaki.

• Na cava ena vukea na kalasi me kunei na inaki vakatamata yadua ki na cakamana i Jisu ni vakania e lima na udolu? Sa rawa mo taroga ni nodra wilika na cakamana sa vakalevutaka vakacava na nodra vakabauta ni sa rawa vua na iVakabula me vakalougatataki ira yadua. E rawa ni ra veivosakitaka e dua na gauna era a vakila kina ni vakalevutaka se vakavuqataka na iVakabula na nodra sasaga me vukea nodra rawata e dua na ka dredre? Vakakina ni bera talega na kalasi, sa rawa mo kerei ira na lewe ni kalasi mera kauta mai ki na kalasi e dua na iyaloyalo se iyaya e matataka na veika era sotava.

  ibuli madrai kei na ika

  E cakamana o Jisu ni a vakania e 5,000 na tamata ena lima na ibuli madrai kei na rua na ika.

• E rawa ni veivuke na vidio “The Feeding of the 5,000” (ChurchofJesusChrist.org) ki na kalasi mera vakasamataka vakatitobu na cakamana e tukuni tiko eke. Na ivakaraitaki cava eda na raica ena itukutuku oqo e vakalevutaka na noda vakabauta na iVakabula? Ena sala cava ena vakani keda kina vakayalo na iVakabula? Ena gauna cava eda a vakani ka tokoni kina maivei Jisu Karisito?

Maciu 14: 22–23

Sa sureti keda tiko o Jisu meda tagutuva noda rere kei na vakatitiqa me rawa ni taucoko noda lako Vua.

• Na itukutuku e tiko ena Maciu 14:22–33 ena vukea na kalasi me vakalevutaka nodra vakabauta na iVakabula ka gadreva mera muri Koya. Sureta na kalasi mera wilika na itukutuku oqo, ka rogoca matua na vosa i Karisito, Pita, kei ira na Apositolo eso. A vukei Pita vakacava na vosa i Karisito me vakabauta me biuta na waqa ka taubale e dela ni wai? Ena yaga vakacava na kerekere i Jisu “dou vakacegu” ka “dou kakua ni rere” (tikina e 27) kivei keda nikua? Na cava eda vulica mai vei Pita baleta na ibalebale ni da sa tisaipeli i Jisu Karisito ka nuitaki Koya ga? Mo vakayaloqaqataki ira mera vakasamataka ka wasea na gauna, me vakataki Pita, era a muria kina na iVakabula, ni sega tu ni kilai na cava ena yaco. Kerei ira mera wasea na veika era sa vulica mai na veika oqori. A vueti ira vakacava o Jisu Karisito ni ra a rere se vakatitiqa tu?

Joni 6:22–71

Ni da tisaipeli i Karisito, sa dodonu me da tuvakarau meda vakadinata ka ciqoma na dina ni dredre sara mada ga meda cakava.

• Na veika a yaco ena Joni 6 ena vakarautaka e dua na rai ena gauna era taroga kina na tamata na ivunau, itukutuku makawa, se lawa ni Lotu i Karisito. Me vukei ira na lewe ni kalasi mera kila vakavinaka na veika oqo, sa rawa mo vola na taro vakaoqo ena vava ni volavola mera sauma: Na cava era a namaka tiko na tamata? (raica na tikina e 26). Na cava a solia vei ira na Karisito? (raica na tikina e 51). Na cava era a sega ni kila vinaka na tamata? (raica na tikina 41–42, 52). E rawa talega ni o taroga na taro vakaoqo me vukei ira na lewe ni kalasi mera bulataka na itukutuku oqo: Na cava eso na sala eda rawa ni digitaka kina meda lako vata kei Karisito ena gauna mada ga eda lomatarotaro se vakatitiqa kina? (raica na tikina e 66). Na cava eso na vunau, cakacaka vakalotu, se so tale na “vosa ni bula tawamudu” e rawa ni kune duadua ga ena Lotu vakalesuimai i Karisito? (see tikina 67–69). Me baleta na veivakararamataki mai vua e dua na iApositolo vou, raica na itukutuku nei Peresitedi M. Russell Ballard “O Cei me da Lako Vua?,” (Liaona, Nove. 2016, 90–92).

Vakatorocaketaki ni Noda Veivakavulici

Vakarorogo. “Na vakarorogo sa ivakaraitaki ni loloma. … Kerea na Tamada Vakalomalagi me vukei iko mo kila vinaka na cava era kaya tiko na nomu lewe ni kalasi. Ni ko sa wanonova matua na veitukutuku era cavuta kei na kena e sega ni cavuti, ena yaco mo na kila vinaka na ka e yaga vei ira, nodra kauwai, kei na veika era gadreva” (Veivakavulici ena iVakarau ni iVakabula, 34).