Vakamataliataki i Karisito

Na Vakamataliataki, mai vei Carl Heinrich Bloch

10–16 ni Epereli

Maciu 15–17; Marika 2–5

“Oi Kemuni na Karisito”

E dua na nomu inaki bibi vakaqasenivuli oya mo vukei ira na tani mera tara cake nodra vakabauti Jisu Karisito. Mo nanuma tiko oqo ni ko vulica na ivolanikalou ena macawa oqo. Na cava o raica e rawa ni vukei ira na lewe ni kalasi mera vakabauti Koya vakatitobu cake?

ivakatakilakila ni veiwasei

Sureta na Veiwasei

Dua na sala mo vakayaloqaqataka kina na lewe ni kalasi yadua mera vulica yadudua ka vakamatavuvale na ivolanikalou, mo sureta mera wasea ena veimacawa na nodra sa vakalougatataki ni ra vulica na ivolanikalou. Me ivakaraitaki, a vakauqeta vakacava na nodra vulica na veiwase oqo na digidigi era a cakava ena macawa oqo?

ivakatakilakila ni veivakavulici

Vakavulica na iVunau

Maciu 16:13–17

Na vakadinadinataki Jisu Karisito e yaco mai ena ivakatakila.

• A dua beka na lewe ni kalasi a vakamacalataka vua e dua na sala a kila kina ni sa dina na kosipeli? Ena Maciu 16:13–17, na cava a vakavulica na iVakabula baleta na sala eda ciqoma kina e dua na ivakadinadina? Sa rawa mo wasea na sala a rawata kina o Alama na nona ivakadinadina (raica na Alama 5:45–46) se na nona vakavulici Oliver Cowdery na Turaga baleta na ivakatakila (raica na Vunau kei na Veiylayalati 6:14–15, 22–23; 8:2–3). Na cava o nanuma a rawa ni kaya o Pita se Alama se Oliver Cowdery ke dua a taroga na sala cava a kila kina ni dina na kosipeli?

• Era na tiko beka ena kalasi era masulaka tiko beka na nodra ivakatakila ia era lecava na sala mera kila kina ni yaco mai. Ena HearHim.ChurchofJesusChrist.org, e rawa ni o kunea na vidio era wasea kina na iliuliu ni Lotu na sala era vakadinadinataka kina na domo ni Turaga. Sa rawa mo sarava e dua se sivia na vidio oqo vata kei na kalasi ka veivosakitaka na veika e vakavulica na vidio me baleta na ciqomi ni ivakatakila. Na veivakavulici ni ivolanikalou se itukutuku tale eso e rawa mera vakasamataka na kalasi ena vukea e dua me kila na nona ivakatakila? (Me kena ivakaraitaki, raica na 1 Tui 19:11–12; Kalatia 5:22–23; Inosi 1:1–8; Vunau kei na Veiyalayalati 6:22–24; 8:2–3; 9:7–9.)

Maciu 16:13–19; 17:1–9

Sa ka bibi na idola ni matabete ki na noda vakabulai.

• Me tekivutaki e dua na veivosaki me baleta na idola ni matabete, sa rawa mo vola na veitikina vakaoqo ena vava ni volavola: Maciu 16:19; Vunau kei na Veiyalayalati 107:18–20; 128:8–11; 132:18–19, 59; Josefa Simici—Ai Tukutuku 1:72; kei na “iDola ni Matabete” ena iDusidusi ki na iVolanikalou (ivolanikalou. ChurchofJesusChrist.org). Mo qai sureti ira na lewe ni kalasi mera wilika e dua se sivia na tikina ka wasea e dua na ka era sa vulica mai kina me baleta na idola ni matabete. Na cava eda gadreva kina na idola ni matabete?

• Me vukei ira na lewe ni kalasi me ra vaqaqacotaka na nodra ivakadinadina me baleta na vakalesui mai ni idola ni matabete ena veisiga e muri, sa rawa mo kerea e veimama ni kalasi mera vulica na Maciu 17: 1-9 kei na ikarua ni veimama mera vulica na Vunau kei na Veiyalayalati 110. Mera qai veiwasei vakai ira ena ka era sa vulica ka vola na veika e tautauvata ena rua na itukutuku oqo. Ena rawa me veivuke talega na vidio “Priesthood Keys: The Restoration of Priesthood Keys” (ChurchofJesusChrist.org

ivakatakarakara i Pita ni taura tu na ki se idola

Na idola ni matabete sai koya na lewa me dusimaka na vakayagataki ni matabete.

Marika 9:14–30

Ni da vakasaqara na vakabauta cecere cake, eda na tekivu ena vakabauta e tiko vei keda.

• A vakayagataka o Elder Jeffrey R. Holland na italanoa ni dua na tama a vakasaqara me vakabulai o luvena me vakavulica kina na sala meda toso vua na Turaga ni da vakila ni takiveiyaga tu na noda vakabauta (raica na “Kemuni na Turaga, Au sa Vakabauta,” Liaona, Me 2013, 93–95). Ni wiliki oti na Marika 9:14–30 vakalasi, ni qai veivosakitaka na tolu na vakadidike nei Elder Holland (raica “iKuri ni iVurevure”).

ivakatakilakila ni ivurevure

iKuri ni iVurevure

E tolu na vakadidike ena vukea meda vakabauta vakalevu.

Ni oti nona tokaruataka na itukutuku ena Marika 9:14–29, a vakavulica o Elder Jeffrey R. Holland:

“Na imatai ni vakadidike e laurai ena italanoa oqo o ya ni sa bolei na vakabauta, a vakadeitaka taumada o tamanigone na nona vakabauta ka qai kila ena gauna oya ni sa vakaiyalayala walega. Na veivakadeitaki taumada o ya e dodonu sara ka sega ni lomalomarua: ‘Kemuni na Turaga, au sa vakabauta.’ Au sa kaya kina vei kemuni kece e gadreva me vakalevutaki na nomuni vakabauta, mo ni nanuma tiko na tamata oqo! E na veigauna ni rere se vakatitiqa se veigauna dredre, taura matua tiko na yavu o sa qaqa tiko kina, ena gauna mada ga e vakaiyalayala tu kina na yavu o ya . …

“Na ikarua ni vakadidike e duidui toka mai na kena imatai. Ni dau yaco mai na leqa se lomatarotaro, kakua ni saga mo vakataroga na nomu vakabauta ena nomu taroga na kena e sega ni tiko vei iko, ka veimuataki me vaka ena nomu ‘tawa-vakabauta.’ … Au sega ni kerei iko mo lasutaka nomu vakabauta e sega vei iko. Au sa kerei kemuni mo ni dina ki na vakabauta e tiko vei kemuni. …

“iOtioti ni vakadidike: ni yaco mai na vakatitiqa se veika dredre, kakua ni rere mo kerea na veivuke. Kevaka eda vinakata me vaka na yalomalua kei na dina me vaka a cakava na tama oqo, eda na rawata” (“Turaga, Au Vakabauta,” Liaona, Me 2013, 93–94).

Vakatorocaketaki ni Noda Veivakavulici

Taroga na taro ka sureta na ivakadinadina. Na taro e vakayaloqaqataka na lewe ni kalasi mera wasea na nodra ivakadinadina sa sala mana me sureta na Yalo. Me vaka, na kena veivosakitaki na Maciu 16:13–17, ka rawa mo taroga, “Na cava o sa vulica baleta na iVakabula e sa vaqaqacotaka na nomu ivakadinadina baleti Koya ni sa iVakabula?” (Raica na Veivakavulici ena iVakarau ni iVakabula,,32.)