E veivakavulici tiko o Jisu ena ulunivanua

E Vunau tiko o Jisu ena Ulunivanua, mai vei Gustave Doré

13–19 ni Feperueri

Maciu 5; Luke 6

“Sa Kalougata”

Vola na nomu nanuma vakayalo ni ko vulica tiko na Maciu 5 kei na Luke 6. Ena yaco mai na ivakatakila ni ko vakasaqara mo sotava na nodra gagadre na kalasi.

ivakatakilakila ni veiwasei

Sureta na Veiwasei

E kaya o Peresitedi Joseph Fielding Smith ni Vunau ena Ulunivanua sa “[vunau] cecere duadua a bau vunautaki, ena kena eda kila rawa” (Nodra iVakavuvuli na Peresitedi ni Lotu: Joseph Fielding Smith [2013], 234). Sureti ira na lewe ni kalasi mera wasea na nodra nanuma me baleta na taro oqo.

ivakatakilakila ni veivakavulici

Vakavulica na iVunau

Maciu 5:1–12

Na marau tudede e lako mai ni da bulataka na sala e vakatavulica o Jisu Karisito.

• Ena Vunau ena Ulunivanua, a sureti ira na Nona tisaipeli na iVakabula me ra vakasamataka tale na ibalebale ni bula kalougata—na bula ni marau tawayalani. Me tekivutaki na veivosaki baleta na marau tawayalani, kerei ira na kalasi mera wasea na ka e dauvakamarautaki ira. Me vaka na Maciu 5:1–12, na cava a kaya o Jisu e vakavuna na tamata me “vakalougatataki,” se marau tawamudu? E duidui vakacava na veivakavulici i Jisu mai na sala eso era saga na tamata mera kunea kina na marau?

• Vakasamataka mo vola ena vava ni volavola eso na itovonibula se ivakarau ni bula mai na tikina e 3–12, me vaka na “yalo savasava” se “dautataro.” Mo qai sureti ira na lewe ni kalasi mera vakatura na veibasai ni vosa yadua. Na cava eda vulica me baleta na ivakarau oqo ena noda vakasamataka na kedra veibasai? Kerea na kalasi mera vakasamataka vakatitobu na veika era rawa ni veisautaka me yaco mera mataqali tamata e tukuni tiko ena veitikina oqo. E vakuria vakacava na 3 Nifai 12:3,6 meda kila vinaka kina na Maciu 5:3,6?

E vakavulici ira na tisaipeli o Jisu

E vakavuvulitaka na iVakabula na ivakarau meda bula marau kina ka yaco me vaka na Tamada mai Lomalagi.

Maciu 5: 14–16

O ira na tisaipeli ni iVakabula mera sa rarama kei vuravura.

• Na cava na kena ibalebale me “rarama kei vuravura”? (tikina e 14). Na cava na ibalebale meda vunia na noda rarama “ena ruku ni vakarau ni sila” (tikina 15), kei na vuna eda rawa ni temaki meda na cakava? Na itukutuku nei Peresitedi Bonnie H. Cordon ena “iKuri ni iVurevure” kei na 3 Nifai 18:24 e rawa ni vukei ira na lewe ni kalasi me ra nakita me ra rarama vei ira na tani. E rawa talega ni ra veivosakitaka na tamata era sa rarama vei ira ka liutaki ira vei Jisu Karisito. Eda na vukei ira vakacava na tamata oqo?

Maciu 5:17–48

E vakavulica o Jisu Karisito e dua na lawa e cecere cake e rawa ni muataki keda meda uasivi sara.

• Na veika e tukuni tiko ena Maciu 5 a vakamatatataki tiko ki na siga ni iVakabula, ia na ivakavuvuli e vakavulica o Koya sa baleti vuravura taucoko. Ni gadrevi mera raica na kalasi na ka oqo ki na nodra bula, sureta mera digitaka e dua na itukutuku oqo ka vakasamataka e dua na ivakaraitaki nikua e vakaraitaka tiko na ka a vakavulica na iVakabula: tikina e 21–24; 27–30; 33–37; 38–39; 40–42; kei na 43–44. E rawa mera cakava vakayadudua se vakailawalawa lalai ka wasea na nodra ivakaraitaki ki na kalasi.

• Mo na vukea vakacava na kalasi mera raica na ibalebale ni ivakaro ni iVakabula meda “vinaka sara” (Maciu 5:48) me vaka e vakamacalataka o Peresitedi Russell M. Nelson meda “taucoko” se “vakaoti”? (“Vinaka Sara e Tu Vakawawa,” Ensign, Nove. 1995, 86–88). Oqo e dua na vakasama: kotiva vakatikina e dua na iyaloyalo i Jisu, ka sureta na kalasi mera vola ena daku ni veitikina yadua e dua na ivakavuvuli mai na Maciu 5 era vakauqeti kina mera na bulataka. Mera na cakacaka vata me vakataucokotaki tale na veitikina. E vukei keda vakacava na Veisorovaki i Jisu Karisito meda “taucoko” se “vakaoti”? (raica na iVolavosa ni iVolatabu, “Loloma Soliwale”). Na cava e vakuria kina na noda kila na vosa nei Peresitedi Joy D. Jones ena “iKuri ni iVurevure” me ikuri ni noda kila na iwalewale oqo?

ivakatakilakila ni ivurevure

iKuri ni iVurevure

Mo dua na rarama.

Na veisureti ni noda Turaga meda vakacaudreva na nodra rarama e sega walega ni noda veimoiyaka tu yani na rarama me rarama vakarabailevu tu ko vuravura. E baleta tiko na kena cinavi vakamatau na rarama oqori vei ira na tani me rawa ni ra raica na sala vei Karisito. Sai koya na vakasokumuni Isireli ena yasa ruarua ni ilati—na nodra vukei na tani me ra raica na ikalawa ki liu ena vakayacori kei na maroroi ni veiyalayalati ni Kalou” (“Me ra Raica,” Liaona, Me 2020, 79).

Vakasaqarai na vinaka sara

E vakamacalataka o Peresitedi Joy D. Jones

E taleitaka na Turaga na dausasaga, ia na dausasaga e tiko na kena icocovi. Eda tomana tiko ga na noda cakacaka. Eda na tubu tiko ga kevaka eda na sasaga tiko meda muria na Turaga. E sega ni namaka o koya na taucoko nikua. Eda sasaga tiko ga meda rawa na veika dredre sa tu e matada. Me vaka na veigauna sa oti, na noda ilakolako sa, dina sara, ni taura na sasaga, cakacaka vagumatua, kei na vuli, ia na noda soli keda taucoko kina toso kiliu sa kauta mai na icocovi tawamudu. …

“Meda vakadeitaka sara na noda dina vua na Tamada Vakalomalagi kei na iVakabula, ena “dei ni nomudou vakabauti Koya, ka vakararavi vakatabakidua sara ki na nona vinaka o Koya sa kaukauwa me veivakabulai.[2 Nifai 31:19]. Me da tomana ena reki na ilakolako oqo ki na noda icavacava vakayalo cecere duadua” (“E Dua na iLesilesi Vakaturaga,” Liaona, Me 2020, 16–17).

Vakatorocaketaki ni Noda Veivakavulici

Vakalevutaki na nodra vakaitavi na lewe ni kalasi. E vuqa na itaviqaravi e rawa ni caka vakalasi, ena ilawalawa lalai, vakayarurua, se dua na mata veivosaki. Vakayagataka na veimataqali iwalewale eso mera vakaitavi taucoko rawa kina me kakua ni dua e lutu. (Raica na Veivakavulici ena iVakarau ni iVakabula,33.)