Ki na Lekutu, mai vei Eva Koleva Timothy

30 ni Janueri–5 ni Feperueri

Maciu 4; Luke 4–5

“Sa Tu Vei Au na Yalo i Jiova”

Ni ko vulica na Maciu 4 kei na Luke 4–5, vola na nomu nanuma vakayalo. Oqo ena sureta na veivakauqeti ki na sala me sotavi vakacava na nodra gagadre na kalasi. Sa rawa mo vakayagataka talega na Lako Mai, Mo Muri Au—Me Baleta na Tamata Yadua kei na Matavuvale vakakina ena ituvatuva oqo me kunei na ikuri ni vakasama.

Sureta na Veiwasei

Na wiliwili ena macawa oqo e oka kina na itukutuku oqo: “A ra sa kurabui sara ena nona ivakavuvuli: ni sa vosa ko koya ena kaukauwa vakai koya” (Luke 4:32; raica talega na Marika 1:22). Sureta na lewe ni kalasi mera wasea na veitikina mai na Maciu 4 kei na Luke 4–5 a vukei ira mera vakila vakataki ira na kaukauwa vakaivunau oya.

Vakavulica na iVunau

Maciu 4:1–11; Luke 4:1–13

Sa solia vei keda na Tamada Vakalomalagi na kaukauwa kei na sala meda vorata kina na veitemaki.

• Na itukutuku ni nona vorati Setani na iVakabula ena vukei ira na kalasi mera kila na sala e dau temaki ira kina o Setani. Mera digitaka na kalasi e dua na veitemaki e tiko ena Maciu 4:1–11 se Luke 4:1–13 ka vakasamataka e dua na veitemaki vou, e veisemati (e rawa ni veivuke na itukutuku ena “iKuri ni iVurevure” Cava na vuna e veivukei kina noda kila ni a sotava talega na iVakabula na veitemaki vata ga eda sotava tiko nikua? Na cava na vuna a vorata rawa kina na Karisito na veitemaki? Na ikuri ni ivakaraitaki vakaivolanikalou ni tamata era vorata na veitemaki i Setani, raica na Vakatekivu 39:7–20; 2 Nifai 4:16–35; kei na Mosese 1:10–22.

• Na cava ena vukei ira na lewe ni kalasi me ra vorata rawa na veitemaki? Sa rawa mo kerei ira mera railesuva na Maciu 4:1–11 se Luke 4:1–13 mera vulica na sala a vukea kina na iVakabula na Nona kila na ivolanikalou me sotavi Setani, me vaka a cakava o Koya ena Nona kaya, “Sa volai.” Solia na gauna vei ira na lewe ni kalasi mera raica na “Veitemaki” ena iDusidusi Vakaivolanikalou me baleta na ivolanikalou e rawa ni vakadeitaki ira ka vaqaqacotaki ira ni ra temaki.

Luke 4: 16–32

Sa i Jisu Karisito na Mesaia ka parofisaitaki.

• Me vukei na lewe ni kalasi mera kila vinaka na itukutuku ena Luke 4:16–32, mo vakamacalataka na itutu na Mesaia kei na Karisito e kena ibalebale ruarua “sa lumuti.” Ni ra wilika na lewe ni kalasi na Luke 4:18–21, kerea me ra vakasamataka na ibalebale ni kena cavuti tiko o Jisu na Karisito, na Mesaia, se O Koya sa Lumuti. Ena veivuke talega vei ira mera wilika na “Anointed One” ena Bible Dictionary. E vakaraitaka vakacava o Jisu ni sai Koya na Mesaia edaidai? E rawa ni ra wasea na lewe ni kalasi se ra sa qai kila vakacava ni o Jisu Karisito sa nodra iVakabula.

• Ena tiko eso na lesoni veivukei me vulici ena kena dikevi na vuna era a sega kina ni ciqomi Jisu na kai Nasareci ni sa Mesaia a parofisaitaki. Na cava na vuna, me kena ivakaraitaki, era vakaturi tiko ena Luke 4:22–24? Mera qai veidutaitaka na lewe ni kalasi na ivakarau ni rai oqo vata kei na yada mai Sarifaci kei Naamani ena Veiyalayalati Makawa, o ira era sega ni Isireli (raica na Luke 4:25–27). Sa rawa mo kerea tiko mai eso na lewe ni kalasi mera na mai vakalekalekataka na itukutuku yadua oqo (raica na 1 Tui 17:8–24 2 Tui 5:1–17 Luke 4:16–30 Na cava e vakatavulica vei keda na veitikina oqo me baleta na vakabauti Jisu Karisito? Eda raica beka e dua na itukutuku me noda ena vosa ni iVakabula vei ira mai Nasareci?

Maciu 4:18–22 Luke 5:1–11

Na muri Karisito e kena ibalebale meda guilecava na lomada ka ciqoma na Nona.

• Eso na gauna na veidusimaki ni Turaga e sega tu ni matata ni se qai soli mai. Mera vakasaqara na lewe ni kalasi ena Luke 5:1–11, na ka a kerea na iVakabula vei Pita kei na vuna a rairai lomatarotaka kina o Pita na Nona ivakaro o ya. Ena rawa vakacava ki na ka oqo me veisautaka na rai nei Pita baleta na iVakabula vata kei koya? Sa rawa mo sureta na lewe ni kalasi mera wasea na gauna era a vakaraitaka kina na nodra vakabauta ena veidusimaki vakalou, dina ga ni ra sega tu ni kila vinaka. Na cava a yaco ni ra a vakabauta tiko ga?

  

  “Drau muri au mai, kau na qisi kemudrau mo drau gonedau ni tamata” (Maciu 4:19).

• Me vaka nodrau “sa biuta na ka kecega” na gonedau me muri Jisu Karisito (Luke 5:11), e tiko na veika eso meda na biuta meda sa Nona tisaipeli. Na cava eda vulica mai na Maciu 4:18–22 me baleta na ivakarau ni rai kei na vakabauta nei Pita, Adriu, Jemesa, kei Joni? Ena rawa ni veivuke me kau mai e dua na lawa ni qoli ki na kalasi. Mo qai sureti ira na lewe ni kalasi me ra vola na veika era sa tuvakarau me ra biuta se sa biuta oti tu me ra muri Karisito ka biuti ira ena lawa. Mo sureta e vica na lewe ni kalasi mera wasea na kena sa veisau na nodra bula ni ra sa digitaka mera biuta nodra ka kecega ka muria na iVakabula.

iKuri ni iVurevure

Veimataqali veitemaki.

Ni oti nona tukuna na veitemaki a sotava na iVakabula ena lekutu, a raica o Peresitedi David O. McKay e tolu na iwasewase ni veivakatovolei:

“(1) Na kena temaki na gagadre se na kete;

“(2) Coriti ena dokadoka, veika vovou, se veika wale;

“(3) Na gaganotaka na iyau vakavuravura se kaukauwa kei na taukena na qele se na iyau ni tamata” (Nodra iVakavuvuli na Peresitedi ni Lotu: David O. McKay [2003],82).

Vakatorocaketaki ni Noda Veivakavulici

Dau vakavinavinakataki ira era vuli tiko. “Me kakua ni vesuki iko na lesoni mo guilecava mo vakavinavinakataka kina na nodra cau na vuli. E dodonu mera kila ni ko taleitaka nodra gagadre mera wasea na nodra veivakararamataki kei na ivakadinadina” (Veivakavulici ena iVakarau ni iVakabula,33).