Sa papitaisotaki Jisu o Joni na Dauveipapitaisotaki

Katubaleka iloilo buto ni Valetabu mai Nauvu Ilinoi, mai vei Tom Holdman

23–29 ni Janueri

Maciu 3; Marika 1; Luke 3

“Dou Caramaka na Sala i Jiova”

Ni ko wilika ka vakasamataka vakatitobu na Maciu 3; Marika 1; kei na Luke 3, vola na nanuma o sa ciqoma. Oqo ena sureta na Yalo ni ko vakavakarau mo veivakavulici. Me ikuri ni vakasama ni veivakavulici ena ituvatuva oqo, na vakasama ni vuli ena Lako Mai, Mo Muri Au—Baleta na Tamata Yadua kei na Matavuvale e rawa ni moici me vakayagataki ena nomu kalasi.

ivakatakilakila ni veiwasei

Sureta na Veiwasei

Me vukea nodra wasea na lewe ni kalasi na ivakarau sa vakalougatatataka tiko kina nodra bula na nodra vulica na Veiyalayalati Vou, vola ena vava ni volavola na taro oqo: Na cava o sa cakava ena vuku ni nomu a wilika na Veiyalayalati Vou ena macawa oqo? Sureti ira na lewe ni kalasi me ra wasea na nodra isau ni taro.

ivakatakilakila ni veivakavulici

Vakavulica na iVunau

Maciu 3:1–12; Luke 3:2–18

O ira na tisaipeli era na vakarautaki ira kei ira eso mera ciqomi Jisu Karisito.

• Eda na vakarautaki keda vakacava ni veisiko mai e dua na vulagi bibi? Na taro vakaoqo ena rawa mo tuvanaka kina e dua na veivosaki baleta na nona a vakarautaki ira na tamata o Joni na Dauveipapitaisotaki mera ciqomi Jisu Karisito. Mo qai wasea vakatolu na kalasi. Na ilawalawa e rawa ni wilika e dua vei iratou na Maciu 3:1–6; Maciu 3:7–12; se na Luke 3:10–15, ka vaqara na sala a vakarautaki ira kina na tamata o Joni na Dauveipapitaisotaki mera ciqomi Jisu Karisito ki na nodra bula. Vakaveitarataravi mera wasea na ilawalawa yadua na veika era sa kunea.

E vunau o Joni na Dauveipapitaisotaki

E Vunau mai na Lekutu o Joni na Dauveipapitaisotaki,mai vei Robert T. Barrett

Luke 3:2–14

E gadrevi meda taduvaka mai na “vua e kilikili kei na veivutuni.”

• Ena Luke 3:8, e vakavulici ira na tamata o Joni na Dauveipapitaisotaki ni bera mera na papitaiso, e dodonu mera vakaraitaka mai na “vuana,” se ivakadinadina ni ra sa veivutuni. O na vukea vakacava na kalasi mera raica na ivakadinadina ni nodra veivutuni? Mo kerei ira mera vakasaqaqara ena Luke 3:8–14 ka raica na ka e kaya tiko o Joni me “vua” ni veivutuni. Sa rawa talega mera raica na Moronai 6:1–3 kei na Vunau kei na Veiyalayalati 20:37. Sa rawa mo droinitaka e dua na vunikau vuata ena vava ni volavola ka mera vola na kalasi na yaca ni vuata ena vunikau kei na “vuata” ni veivutuni era sa kunea. Sa gauna vinaka talega me veivosakitaki kina na ibalebale dina ni veivutuni.

Maciu 3:13–17

Eda na muri Jisu Karisito ni da sa papitaiso ka ciqoma na Yalo Tabu.

• Me raicilesu na italanoa ni nona papitaiso o Jisu Karisito, tovolea na vakasama oqo: Tarogi ira na kalasi na sala cava mera vakayagataka kina na Maciu 3:13–17mera vakavulica e dua baleta na papitaiso, vakataka e dua na gone se dua e sega ni lewenilotu. (Sa rawa mera vakayagataka talega na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale.) Na gacagaca bibi cava ni papitaiso era na vakamacalataka? Mera vakatovotovotaka na nodra vakasama ena veivakavulici vakai ira.

• Me vukei ira na lewe ni kalasi me ra vakasamataka vakatitobu na bibi ni kena bulataki na nodra veiyalayalati ni papitaiso, sa rawa mo sureta e dua me wilika na itukutuku nei Elder Bednar ena “iKuri ni iVurevure.” E dodonu mera marautaka na kalasi nodra wasea nodra nanuma baleta na nodra papitaiso kei na kena veiyalayalati. E rawa talega ni ra lagata e dua na serenilotu me baleta na muria na iVakabula, me vaka na “Lako Mai, Mo Muri Au ” (Serenilotu, naba 63).

• A vakavulica o Joni na Dauveipapitaisotaki ni na rawa ni veipapitaisotaki na iVakabula “ena Yalo Tabu kei na bukawaqa” (Maciu 3:11). Ena yaco na papitaiso ena bukawaqa ni da sa vakadeitaki ka ciqoma na isolisoli ni Yalo Tabu. Cava na vuna meda taura kina na isolisoli ni Yalo Tabu meda torocake ena matanitu ni Kalou? E mana vakacava kivei keda na papitaiso ena bukawaqa kei na Yalo Tabu? (raica na Alama 5:14). E rawa ni veivuke na vidio “Baptism of the Holy Ghost” (ChurchofJesusChrist.org) ena veivosaki oqo.

ivakatakilakila ni ivurevure

iKuri ni iVurevure

Noda veiyalayalati ni papitaiso.

E vakavuvulitaka o Davd A. Bednar: “E okati ena veiyalayalati ni papitaiso e tolu na yalayala bibi: (1) noda gadreva meda taura na yaca i Jisu Karisito, (2) meda daunanumi Koya, ka (3) muria na Nona ivakaro. Na veivakalougatataki yalataki ni kena rokovi na veiyalayalati oqo o ya “me tiko ga kei [keda] na nona Yalotabu [Doctrine and Covenants 20:77]. O koya oqo, sa vakavakarau bibi kina na papitaiso ena kena ciqomi na madigi vakadonui me baleta na veitokani tudei ni ikatolu ni Lewetolu Vakalou” (“Tikoga na Bokoci ni Nomu iValavala Ca,” Liaona, Me 2016, 60).

Me ivakaraitaki ni dua na cauravou lailai e rokova tiko na nona veiyalayalati ni papitaiso, raica na italanoa ena itekivu ni itukutuku nei Sisita Carole M. Stephens “Sa Kena iNaki Meda Reki Vakalevu” (Liaona, Nove. 2013, 115–17).

Vakatorocaketaki ni Noda Veivakavulici

Vakavulica na ivunau taumada. E vakavulica o Hyrum Smith, “Vunautaka na imatai ni ivakavuvuli ni Kosipeli—vunautaka tale; o na raica ena veisiga e tarava ena vakatakilai maivei iko na veivakasama vou kei na ikuri ni rarama baleti ira. Sa rawa mo vakalevutaka vei ira mo na kilai ira vakamatata. Sa na qai rawa mo cakava mera kilai vakamatata mai vei ira o vakavulica” (in History, 1838–1856 [Manuscript History of the Church], vol. E-1, 1994, josephsmithpapers.org