matavuvale sara ivolanitaba

26 ni Tiseba–1 ni Janueri

Sa Noda iTavi na Noda Dui Vuli.

Ni ko wilika ka vakasamataka vakatitobu na tiki ni ivolanikalou ena ituvatuva oqo, vola na veivakauqeti e yaco vei iko. Oqo ena sureta na Yalo ena nomu vakavakarau. Lako Mai, Mo Muri Au—Baleta na Tamata Yadua kei na Matavuvale kei na vakasama oqo ena vukei iko mo vakauqeta na kalasi mera vulica na Veiyalayalati Vou ena yabaki oqo.

ivakatakilakila ni veiwasei

Sureta na Veiwasei

Dua na inaki ni nomu qasenivuli o ya mo vakayaloqaqataki ira na lewe ni kalasi mera vulica ga vakai ira kei na matavuvale na ivolanikalou. Na rogoca na veika era sotava eso ena vakauqeti ira mera vakasaqara ga na nodra. Ia ena itekivu ni kalasi yadua, kerea na lewe ni kalasi mera wasea na ivolanikalou era sa vulica a veivakauqeti se taleitaki vei ira.

ivakatakilakila ni veivakavulici

Vakavulica na iVunau

Na vuli e vinakati kina na cakacaka ena vakabauta.

• O na vakauqeta vakacava na lewe ni kalasi mera gumatuataka vakalevu cake na nodra vuli, ka me sega ni ilesilesi nei qasenivuli? Oqo e dua na vakasama. Viritaka e dua na ka malumu vua e dua na lewe ni kalasi, o koya o a kerea taumada me kakua ni saga me ciqoma. Vakayagataka na itaviqaravi oqo me tekivu e dua na veivosaki baleta na nodra itavi na gonevuli kei qasenivuli ena vuli kosipeli. Ni da vuli tiko, eda na “ciqoma” vakacava na veika e vakavulici ena noda kalasi? Na itukutuku ena “iKuri ni iVurevure”e rawa ni vakuria na veitalanoa oqo.

• Sa itavi kece ni kalasi me sureta na Yalo ki na kalasi. Me vukei ira na kalasi me ra kila vinaka oqo, kerea mera wilika na Alama 1:26 kei na Vunau kei na Veiyalayalati 50:13–22; 88:122–23 ka wasea na veika me ra cakava na qasenivuli kei na lewe ni kalasi me ra sureta na Yalo. Ena veivuke me volai na nodra itukutuku ena vava ni volavola ena ulutaga vakaoqo: Na cava e rawa ni cakava o qasenivuli kei na Cava e rawa ni ra cakava o ira na gonevuli. Ena veivuke beka me caka e dua na posita e tiko kina nodra nanuma na lewe ni kalasi mena vakaraitaki ena vica na macawa mai muri?

Ena gadrevi me da kila vakataki keda na dina.

• E vuqa na itukutuku ena Veiyalayalati Vou e vakavulica na ivakavuvuli ena dusimaka noda vakasaqara na dina. Me vakataka na Luke 11:9–13; Joni 5:39; 7:14–17; kei na 1 Korinica 2:9–11. Sa rawa mo sureti ira ena kalasi era wilika na itukutuku oqo mera wasea na veika era sa vulica. Se me wiliki va-kalasi na itukutuku oqo ka sureta mera wasea nodra a rawata kina vakacava na nodra ivakadinadina.

  cauravou kei na goneyalewa ena kalasi

  Na vakasaqara na vuli ena vakabauta ena vukea meda rawata na noda ivakadinadina.

• Era vakamacalataki enaCakacaka 17:10–12 na Yalododonu era vakasaqaqara ena ivolanikalou ka rawata nodra ivakadinadina baleta na dina. Ni gadrevi na lewe ni kalasi mera vakatotomuri ira, me wiliki vata na veitikina oqo ka sureta na lewe ni kalasi mera wasea na itukutuku ni ivolanikalou sa vaqaqacotaka na nodra ivakadinadina ni kosipeli.

Mena vakaibalebale cake vakacava na noda vulica na ivolanikalou?

• Me bula vakaivakarautaki na vuli ivolanikalou ena bolei ira beka na lewe ni kalasi era nanuma ni sega nodra gauna, kila vinaka, se kila-ka. O na vukei ira vakacava mera gugumatua kina? Me vukea na lewe ni kalasi mera yalonuidei mera vulica na ivolanikalou, mo wasea na itukutuku mai na “Vakasama me Vakatorocaketaka na Nomu Vulica na iVolanikalou” ena Lako Mai, Mo Muri Au—Baleta na Tamata Yadua kei na Matavuvale. Sa rawa vei iko se na lewe ni kalasi mo ni wasea na gauna a vakayagataki kina eso na vakasama oqo se gauna vakaibalebale cake tale eso me vulici na ivolanikalou. Sa rawa talega me digitaki e dua na wase ena Veiyalayalati Vou ka tovolei me vulici va-kalasi ni vakayagataki eso na vakasama oqo.

ivakatakilakila ni ivurevure

iKuri ni iVurevure

Taura me noda na kila-ka vakayalo.

A vakavulica na parofita o Josefa Simici: “Sa ka bibi sara na veika ni Kalou; ka ra na kunei ga ke soli kina na gauna, na kila, kei na vakanananu vakamalua, vakatitobu ka bibi sara. Na nomuni vakasama, Oi kemuni na tamata! kevaka mo na liutaka e dua na yalo ki na veivakabulai, sa dodonu me tadodo yani ki lomalagi, ka vakasaqara ka vakananuma na qara butobuto duadua, kei na rabailevu ni gauna tawamudu—mo na veitaratara kei na Kalou. Sa levu cake na dokai kei na vakaturaga ni Nona vakanananu na Kalou, mai na vakanananu tawayaga ni yalo ni tamata!” Nodra iVakavuvuli na Peresitedi ni Lotu: Josefa Simici [2007], 267).

E vakamacalataka o Elder David A. Bednar: “Kevaka eda yavutaki, o kemuni kece kei au, ena noda kilai Jisu Karisito kei na Nona kosipeli vakalesuimai ena veika era vakatavulica se tukuna vei keda ko ira na tamata, sa qai tara cake na yavu ni noda ivakadinadina baleti Koya kei na Nona cakacaka lagilagi Edaidai ena dela ni nuku. Ena sega ni rawa meda vakararavitaka sara se kerea mai na rarama ni kosipeli kei na kila-ka maivei ira na tamata—maivei ira mada ga eda lomana ka nuitaka” (“Vakavakarau mo Rawata na Veika Kece e Gadrevi,” Liaona, Me 2019, 102).

Vakatorocaketaki ni Noda Veivakavulici

Raica matua tikoga na ivunau. Raica me yavutaki tikoga na veivosaki ni kalasi ena ivolanikalou kei na nodra veivakavulici na parofita. Sa rawa mo cakava oqo ena nomu taroga: “Na dina vakosipeli cava eda vulica mai na malanivosa eda sa rogoca?” se “E rawa ni dua me wasea e dua na ivolanikalou e sema tiko ki na veika eda sa veivosakitaka?” (Raica na Veivakavulici ena iVakarau ni iVakabula,, 20–21.)