2–8 ni Janueri

Maciu 1; Luke 1

“Me Yaco Ga Vei Au me vaka na Nomuni Vosa”

Ni bera ni ko wilika e dua na ikuri ni ivola ni vuli, wilika ka vakasamataka vakatitobu na Maciu 1 kei na Luke 1, ka vola na nomu nanuma vakayalo. Me tuberi iko na Yalotabu ena nomu vakavakarau. Vakadikeva mada na vakasama ena ituvatuva oqo kei na kena ena Lako Mai, Mo Muri Au—Baleta na Tamata Yadua kei na Matavuvale.

Sureta na Veiwasei

E dua na inaki bibi i Maciu, Luke, kei na dauvola Kosipeli tale eso o ya me vakadinadinataka ni o Jisu Karisito na Luve ni Kalou. Solia vei ira na lewe ni kalasi e vica na miniti me railesuvi na Maciu 1 se Luke 1 ka wasea e dua na tikina e tara cake na nodra vakabauti Jisu Karisito. Vakatura ki na kalasi ni ra vulica na Veiyalayalati Vou ena yabaki oqo, era rawa ni vola na veitikina e vakadinadinataki Jisu Karisito ni Luve ni Kalou. Sa rawa me maroroya na kalasi na veika sa volai oqo.

Vakavulica na iVunau

Maciu 1:18–25; Luke 1:5–80

Ena cakacaka na Tamada Vakalomalagi maivei ira na luvena yalodina me vakayacori kina na Nona inaki.

• Ena vakaibalebale cake na veika era sotava na kalasi ni ra vulica na Veiyalayalati Vou ena yabaki oqo ke ra vuli mai na veika era sotava na tamata era wilika tiko. Me vukei mera cakava oqo, sa rawa mo vola na yacadra na tamata ena Maciu 1 kei na Luke 1 ena vava ni volavola, vata kei na tiki ni ivolanikalou baleti ira oqo:

  • Meri (Luke 1:26-56)

  • Josefa (Maciu 1:18–25)

  • Ilisapeci (Luke 1:5–7, 24–25, 40–45, 57–60)

  • Sakaraia (Luke 1:5–23, 59–64)

  Na cava eda rawa ni vulica mai na itukutuku oqo ka rawa ni vukei keda nikua?

• Me vukei ira na lewe ni kalasi mera vakasamataka vakatitobu na veika baleti Meri kei na nona itavi ena ituvatuva ni Tamada, sa rawa mo vakaraitaka na vidio “An Angel Foretells Christ‘s Birth to Mary” kei na “Mary and Elisabeth Rejoice Together” (ChurchofJesusChrist.org). Se e rawa ni o wilika vata na Luke 1:26–38, 46–56, ka vaqara na veika e kaya o Meri ni vakatakila e dua na ka me baleta na nona itovo ni bula. Na cava tale eda vulica mai vei Meri?

Luke 1:5–25

Ena yaco mai na veivakalougatataki ni Kalou ena Nona gauna ga.

• Era na tiko beka ena nomu kalasi o ira sa vakataki Ilisapeci kei Sakaraia, era bula dodonu ka se bera ni nuitaka tiko na veivakalougatataki. Mera na qai vakasaqara ena Luke 1:5–25, na lesoni e rawa ni ra vulica mai vei Ilisapeci kei Sakaraia me baleta na waraka na Turaga. Na ivakaraitaki cava tale ni waraka na gauna ni Turaga e rawa ni ra wasea na kalasi mai na nodra bula se mai na ivolanikalou? Na cava soti eda vulica mai na ivakaraitaki oqo? Sa rawa mera veivosakitaka talega na lewe ni kalasi na itukutuku ena “iKuri ni iVurevure.”

Luke 1: 26–38

“Ni na sega ni dredre vua na Kalou e dua na ka.”

• Eso na gauna era na lomatarotaro na kalasi—me vakataki Meri—na kena yaco rawa vei ira na ituvatuva kei na yalayala ni Kalou. Me vukei nodra kila vinaka na kalasi ni kaukauwa ni Kalou ena rawa kina na ka kecega, mo vakaraitaka na iyaloyalo The Annunciation: The Angel Gabriel Appears to Mary (Gospel Art Book,, naba 28) ka veisureti mera wilika vata na Luke 1:26–38. Na cava eda rawa ni vulica meda valuta rawa na veika dredre ena vulici na vosa kei na cakacaka i Meri? Kerei ira na kalasi mera wasea na gauna a vukei ira kina na Kalou mera rawata e dua na ka era a nanuma ni dredre.

iKuri ni iVurevure

Waraka na Turaga.

Ni da kila ni vuqa vei keda e taroga na vuna me da waraka kina na veivakalougatataki ni Kalou, e kaya kina o Elder Jeffrey R. Holland:

Na isau ni taro eso vaka oqori e “Io, na Kalou e rawa ni vakarautaka na cakamana ena gauna vata ga oya, ia eda na qai vulica totolo sara se emuri ni veigauna kei na itabagauna ni noda ilakolako vakayago e sa Nona ka Nona duadua ga me dusimaka.’ … Na vakabauta e kena ibalebale na vakararavi vua na Kalou ena veigauna vinaka se ca, kevaka sara mada ga ena okati kina eso na rarawa me yacova ni da qai raica na Ligana ni vakatakilai mai ena vukuda. …

“… Ko ira era sa ‘waraki Jiova era na vakaukauwataki tale; era na cabe cake me vaka era vakatabana vakaikeli; era na cici ka sega ni oca; era na lako tu ka sega ni malumalumu’ [Aisea 40:31; vakaikuritaki]. Au masuta ni “qai yaco na gauna”—totolo se vakamalua—na veivakalougatataki eso oqori ena lako mai vei kemuni kece sara o ni vakasaqara na veivakacegui mai na nomuni rarawa kei na galala mai na nomuni yalobibi. Au vakadinadinataka na loloma ni Kalou kei na Vakalesuimai ni Nona kosipeli lagilagi, okoya, ena dua na yasana se na yasana tale kadua, na isaunitaro ki na leqa kecega eda sotava” (“Waraka na Turaga,” Liaona, Nove. 2020, 116–17).

Vakatorocaketaki ni Noda Veivakavulici

Vakayaloqaqataki ira na kalasi mera vulica na ivolanikalou e vale. E dua na sala o rawa ni vakauqeta kina na vulici ni ivolanikalou e vale o ya mo solia na gauna vei ira ena kalasi mera wasea na veika sa kunei kei na veivakararamataki mai na nodra vuli yadua ka vakamatavuvale (raica na Veivakavulici ena iVakarau ni iVakabula, 29).