Dua na iVakarau ni Veivakavulici

Na ituvatuva yadua ena ivola oqo e vakamuria e dua na ivakarau ni veisureti kina veiwasei kei na vakavulici ni ivunau. Ena vuqa na gauna, ni o vakatavuvuli tiko, ena rairai sivia se yaco na veitiki ni vakarau oqo ena dua na ituvatuva duidui. Me ivakaraitaki, navuca na veiwasei ni sa dua na madigi me vakatavulici kina na ivunau, ka sa dodonu me umani na veisureti ni wasea ena vakatavulici ni vunau. Vakatara na veisau me yaco donu, ni muri na veivakauqeti ni Yalo me sotavi kina na nodra gagadre o ira era vakavulica.

Sureta na Veiwasei

Me tiki ni kalasi yadua, sureta na kalasi mera wasea na veivakararamataki kei na ka era sotava ena macawa sa oti ni ra vulica na ivolanikalou vakai ira yadua ka vakamatavuvale ka cakava sara na ka era sa vulica. Vukea na kalasi mera raica ni nodra vuli yadua e taudaku ni kalasi sa ka bibi. Na nodra saumaki yadudua vei Tamada Vakalomalagi kei Jisu Karisito ena sega walega ni yaco mai ena vuli ena Sigatabu ia ena veika talega era sotava ena veisiga. Ni ra rogoca vakai ira na lewe ni kalasi na veika era sa dui sotava kei na nodra ivakadinadina kei Jisu Karisito kei na Nona kosipeli, ena rawa vakalevu mera na vakasaqara na nodra dui veika vata oqori.

Sega ni tamata yadua ena wilika na wase ni lesoni yadua, ka so era wilika era na sega ni lomadra mera wasea. Raica na lewe ni kalasi taucoko mera vakila ni ra sa tiki yaga ki na kalasi, se ra wasea e dua na ka se sega.

Vakatavulica na iVunau

O iko kei na nomu kalasi mo ni raimatua kina ivunau i Jisu Karisito—na dina tawamudu ni kosipeli—e tiko ena umavosa ni ivolanikalou e lesi. NaLako Mai, Mo Muri Au—Baleta na Tamata Yadua kei na Matavuvale e rawa ni vukei iko mo kila na ivunau o na vakavulica vei ira na gone. Ni veivosakitaki na ivunau mai na ivolanikalou, na tikina cava, vosacavuti, veika e sotavi, taro, kei na ikuri ni ivurevure o rawa ni wasea? O na vakayagataka vakacava na ivurevure oqo me vukea na kalasi mera kunea ka kilamatata na ivakavuvuli ni kosipeli? E rawa vakacava mo vukei ira mera tara cake na nodra vakabauta na Tamada Vakalomalagi kei Jisu Karisito?