Vakayagataki ni Lako Mai, Mo Muri Au—Me Baleta na Matawilivola ni Sigatabu

Vakarau tiko mo Veivakavulici ena Matawilivola ni Sigatabu

Na vuli yadudua kei na matavuvale e vale me usutu ni vuli kosipeli. Oqo e dina vei iko kei ira o vakavulica. Ni o vakavakarau mo veivakavulici, tekivu ena nomu vakila vakataki iko na veika e sotavi ena ivolanikalou. Na veika bibi duadua vei iko ena nomu vakavakarau ena yaco nio bulataka na kosipeli, vakasaqa na ivolanikalou, ka vakasaqara na veivakauqeti ni Yalo Tabu.

NaLako Mai, Mo Muri Au—Baleta na Tamata Yadua kei na Matavuvale sa dua na tiki bibi ni nomu vuli vakai iko kei na nomu vakavakarau mo veivakavulici. Ena vukei iko mo kila vakatitobu na ivakavuvuli vakaivunau kunei ena ivolanikalou. Ena rawa talega mo vakauqeti ka sureti ira na lewe ni kalasi mera vakayagataka na Lako Mai, Mo Muri Au—Baleta na Tamata Yadua kei na Matavuvale me laveti cake kina na nodra dui vulica yadua ka vakamatavuvale na ivolanikalou (mo vukei kina, raica na “Vakasama me Baleta na Vakayaloqaqataki ni Vuli ni Tamata Yadua kei na Matavuvale” ena ivurevure oqo). Nio cakava, nanuma mo raici ira vakabibi na lewe ni kalasi e dredre vei ira mera tokona ka vuli ivolanikalou vakamatavuvale kei na lotu vakamatavuvale.

Ena nomu vakavakarau tiko, ena yaco mai vei iko eso na vakanananu kei na veivakauqeti me baleti ira na tamata o vakavulica. O na ciqoma na vakasama eso ni sala ena vakalougatataka kina na nodra bula na ivakavuvuli ni ivolanikalou eso. O na tuberi mo uqeti ira me ra kunea na ivakavuvuli oqori ni ra vuli tiko vakataki ira mai na ivolanikalou.

Vakatutu ni Veivakavulici

Nio vakavakarau tiko mo veivakavulici, o na rairai rawata na ikuri ni veivakauqeti ena nomu vadikeva na ituvatuva ena ivurevure ni vuli oqo. Kakua ni raica na veivakasama oqo me idusidusi muri vakamatailalai ia me ra sa vakatutu ga ni kena vakayadrati na nomu veivakauqeti. O kila tiko na lewe ni nomu kalasi, ka na yaco mo kilai ira vinaka cake sara ni dou sa vuli vata ena kalasi. E kilai ira na Turaga, ena vakauqeti iko o Koya ena sala vinaka duadua mo vukea na kalasi mera yavutaki cake ena vulici ni kosipeli era cakava tiko mai vale.

E vuqa na ivurevure tale eso sa rawa ni o vakayagataka ena nomu vakavakarau, oka kina na vakasama mai na Lako Mai, Mo Muri Au—Baleta na Tamata Yadua kei na Matavuvale kei na mekasini ni Lotu. Na ikuri ni ivakamacala me baleta oqo kei na ivurevure tale eso, raica na iwase ka kena ulutaga na “iKuri ni iVurevure” ena ivurevure oqo.

Eso na Ka Me Nanumi Tiko

• Ena mana sara na vulici ni kosipeli ni sa yavutaki e loma ni vuvale. Nio qasenivuli, sa nomu itavi bibi mo tokona, vakayaloqaqataka, ka tara cake na vulici mai vale ni kosipeli vei lewe ni kalasi.

• Na nodra saumaki na lewe ni kalasi kina kosipeli i Jisu Karisito ena titobu cake ni ra kila vinaka ka bulataka na ivunau dina. Vakayaloqaqataki ira mera vola ka cakacakataka na veivakauqeti ni Yalo Tabu vei ira.

• Na veivakavulici e levu cake mai na veivunauci, ia e levu cake sara talega mai na kena liutaka walega e dua na veivosaki. Sa tiki ni nomu ilesilesi mo vakayaloqaqataka na vakaitavi e veilaveti ka yavutaki tiko ena ivolanikalou. Sa dodonu talega mo wasea na vakasama veivakauqeti o ciqoma ni o vulica na ivolanikalou.

• Nanuma tiko ni vuqa na lewe ni kalasi e tu na nodra veikasotavi vakaibalebale ena nodra vuli mai vale ena ivolanikalou vata ga o na veivosaki kina ena kalasi. Sa rawa mo tokona na nodra vulica na ivolanikalou ena nomu solia vei ira na madigi me ra wasea na veika era vulica mai vale.

• E vinakata na Tamada Vakalomalagi mo qaqa ena nomu itavi vaka qasenivuli. Sa vakarautaka tu o Koya e vuqa na ivurevure me vukei iko mo qaqa, okati kina na soqoni ni matabose ni qasenivuli. Ena vei soqoni oqo ena rawa mo veitalanoataka kina kei ira eso tale na qasenivuli na vei bolebole o sotava tiko. E rawa talega nio veitalanoataka ka taurivaka na ivakavuvuli eso ni veivakavulici va-Karisito.

• Era na vuli vinaka na tamata ni soli na madigi mera veivakavulici. Ena so na gauna, mo vakatara vei ira na lewe ni kalasi, oka kina o ira na itabagone, mera vakavulica e dua na tiki ni lesoni. Me yavutaki na lewa oqo ena nodra gagadre kei na rawaka na lewe ni kalasi. Ke o sa sureta e dua na lewe ni kalasi me veivakavulici, taura na gauna mo vukei koya me vakavakarau ena kena vakayagataki na vakasama e tiko ena ivurevure oqo vakakina ena Lako Mai, Mo Muri Au—Baleta na Tamata Yadua kei na Matavuvale. Nanuma tiko nio sa kacivi mo qasenivuli, sa nomu itavi taucoko na veika me vakavulici ena kalasi.

Na ivurevure ni vuli oqo e oka kina na vakavulici ni ituvatuva ni veimacawa ena loma ni yabaki. Ena vei-Sigatabu e sega ni caka kina na Matawilivola ni Sigatabu ena vuku ni koniferedi raraba, koniferedi ni iteki, se dua tale na vuna, era sa vakayaloqaqataki na lewe ni kalasi me ra wilika tikoga mai vale na Veiyalayalati Vou me vaka sa tuvanaki toka ena ituvatuva ena Lako Mai, Mo Muri Au—Me Baleta na Tamata Yadua kei na Matavuvale. Ni sa vakayacori na Matawilivola ni Sigatabu, o na digitaka beka mo lade se cokotavata na lesoni.