Jisas I Stap Prijim Toktok Antap long Hil, i kam long Gustave Doré

13–19 Febwari

Matiu 5; Luk 6

God Bae I Blesem Yufala

Raetemdaon ol tingting mo filing blong yu long saed blong spirit taem yu stap stadi long Matiu 5 mo Luk 6. Revelesen bae i kam taem yu stap lukaotem blong ansa long ol nid blong memba blong klas blong yu.

Invaetem Ol Memba blong Serem Wanem Oli Gat

Presiden Joseph Fielding Smith i talem se Toktok Antap long hil i wan long “bigfala [toktok] we i bin prij long taem ia we yumi save long hem” (Teachings of Presidents of the Church: Joseph Fielding Smith [2013], 234). Invaetem ol memba blong klas blong serem filing blong olgeta abaot from wanem hemia i tru.

Stap Tijim Doktrin

Matiu 5:1–12

Hapines we i save stap longtaem i kam taem yumi laef folem wei we Jisas Kraes i bin tijim.

• Long Toktok Antap long Hil, Sevya i invaetem ol disaepol blong Hem blong oli tingting bakegen long wanem i minim blong laef folem wan we i laef blong hem i gat blesing oltaem—wan laef we i stap hapi blong oltaem. Blong statem wan storian abaot hapines we i save stap blong oltaem, yu save askem ol memba blong klas blong serem wanem i mekem olgeta i hapi. Folem toktok blong Jisas long Matiu 5:1–12, ?wanem i mekem man i “harem gud,” o hapi blong taem we i no save finis? ?Olsem wanem nao ol tijing blong Jisas i defren long ol nara wei we ol pipol oli stap traem folem blong faenem hapines?

• Tingting blong mekem lis blong sam long ol fasin o kwaliti we i stap long ves 3–12, olsem “tingting i klin gud” o “man blong mekem pis.” Afta invaetem ol memba blong klas blong talem oposit blong wanwan kwaliti ia. ?Wanem yumi save lanem abaot ol kwaliti ia taem yumi tingbaot oposit blong olgeta? Askem ol memba blong klas blong oli tingting hevi long wanem oli save jenisim blong oli kam ol kaen man o woman ia we oli tokbaot long ol ves ia. ?Wanem nao 3 Nifae 12:3, 6 i ademap long andastaning blong yumi blong Matiu 5:3, 6?

Sevya i tijim olsem wanem yumi save laef long wan hapi laef mo save kam olsem Papa blong yumi long Heven.

Matiu 5:14–16

Ol disaepol blong Sevya oli blong stap olsem laet blong wol ia.

• ?Wanem i minim blong stap olsem “laet blong wol ia”? (ves 14). ?Wanem i minim blong kavremap laet blong yumi “long wan baket”(ves 15), mo from wanem yumi save kasem temtesen blong mekem olsem? Toktok ia we i kam long Presiden Bonnie H. Cordon long “Sam Moa Risos” mo 3 Nifae 18:24 i maet helpem ol memba blong klas blong gat mo tingting ia blong stap olsem laet long ol narawan. Oli save tokbaot tu ol pipol we oli stap olsem laet long olgeta mo lidim olgeta i go long Kraes. ?Olsem wanem nao yu save mekem olsem ol pipol ia?

Matiu 5:17–48

Jisas Kraes i tijim wan hae loa we i save lidim yumi go kasem laef we i stretgud.

• Sam long ol situesen we oli tokbaot long Matiu 5 i tokbaot nomo dei blong Sevya, be ol prinsipol we Hem i tijim i blong evri man. Blong helpem ol memba blong klas blong yusum long laef blong olgeta, invaetem olgeta blong jusum wan long ol ves ia mo tingting long wan eksampol blong tedei we i soemaot wanem Sevya i stap tijim: ol ves 21–24; 27–30; 33–37; 38–39; 40–42; mo 43–44. Oli save mekem hemia wanwan o long ol smol grup mo serem ol eksampol blong olgeta wetem klas.

• ?Olsem wanem yu save helpem ol memba blong klas blong luksave se komanmen blong Sevya blong stap “stret gud” (Matiu 5:48) i minim, olsem Presiden Russell M. Nelson i bin eksplenem, blong stap “fulwan” o “finis gud”? (“Perfection Pending,” Ensign, Nov. 1995, 86–88). Yu save katem wan pikja blong Jisas long wan pasol, mo invaetem ol memba blong klas blong raet long bak blong wanwan long ol pis ia, wan tijing we i kam long Matiu 5 we oli filim i givim insperesen long olgeta blong yusum long laef blong olgeta. Letem olgeta oli wok tugeta blong finisim pasol. ?Olsem wanem nao Atonmen blong Jisas Kraes i helpem yumi kam “fulwan” o “finis gud”? (luk long Bible Dictionary, “Grace”). Wanem toktok blong Presiden Joy D. Jones long “Sam Moa Risos” i givim moa andastaning long yumi abaot olsem wanem atonmen i wok?

Sam Moa Risos

Stap wan laet.

Presiden Bonnie H. Cordon i tijim: “Invitesen blong Lod blong yumi letem laet blong yumi i saenaot i no blong, wanwan taem nomo yumi muvum laet i go lef mo raet blong mekem wol i kam moa klia. I blong mekem laet blong yumi i saen mo i stret gud, blong ol narawan oli save luk rod i go long Kraes. Wok ia blong karem Isrel i kam tugeta long saed blong vel long ples ia—hemia nao i mekem ol narawan oli luk nekis step long fored blong mekem mo kipim ol tabu kavenan wetem God” (“Blong Oli Save Luk,” Liahona, Mei 2020, 79).

Stap Lukaotem Fasin We I Stret Gud.

Presiden Joy D. Jones i eksplenem:

Lod i lavem hadwok, mo hadwok i karem ol praes i kam. Yumi gohed blong stap praktis. Oltaem yumi stap progres sapos yumi stap traehad blong folem Lod. Hem i no ting se bae evri samting i stret gud tedei. Yumi stap gohed blong klaem long Hil Sinae blong yumi wanwan. Olsem long ol taem we i pas, yumi mas traehad long rod blong yumi, hadwok, mo stadi, be strong tingting blong yumi blong gohed blong mekem bae i karem i kam long laef blong yumi ol praes we i no save finis. …

“Letem yumi talemaot strong divosen blong yumi long Papa blong yumi long Heven mo Sevya blong yumi, ‘wetem wan fet long hem we i no seksek, mo stap hang fulwan long ol gud wok blong hem, we i gat paoa blong sevem man’ [2 Nifae 31:19]. Bae yumi gohed wetem glad long rod ia we i stap go from paoa blong yumi we i hae moa long saed blong spirit” (“Wan Spesel Hae Koling,” Liahona, Mei 2020, 17).

Stap Kam Antap long Fasin blong Yumi blong Stap Tij

Mekem ol memba blong klas oli tekpat moa long klas. Yufala i save mekem fulap aktiviti olsem wan klas, long ol smol grup, tutu, o olsem wan panel blong toktok raon. Yusum ol defdefren wei blong letem ol pipol we oli no gat janis, blong oli save tekpat. (Luk long Teaching in the Savior’s Way,33