Jisas i stap toktok wetem Nikodimas

6–12 Febwari

Jon 2–4

“Evri Man mo Woman I Mas Bon Bakegen”

Blong stap ridim Jon 2–4 i wan gudfala wei blong stat blong rere blong tij. Raetemdaon eni tingting mo filing we yu kasem long saed blong spirit, mo yusum aotlaen ia blong faenem sam moa lesen mo aedia blong tij.

serem pikja aekon

Invaetem Ol Memba blong Serem Wanem Oli Gat

Raetem trifala japta ia long bod: Jon 2, Jon 3, mo Jon 4. Givim smol taem long ol memba blong klas blong luklukbak long ol japta ia mo raetem andanit long wan long ol japta ia, wan ves we i helpem olgeta andastanem doktrin mo wan samting we i hapen long japta ia. Tokbaot ol ves ia we oli bin raetem.

tijing aekon

Stap Tijim Doktrin

Jon 2:1–11

Ol merikel blong Jisas Kraes “i soemaot glori blong hem.”

• Aotlaen blong wik ia long Kam Folem Mi—Blong Wanwan Man, Woman mo Famli oli givim tingting blong ridim Jon 2:1–11 we i kam long wan we i bin stap long taem ia we Jisas i tanem wota i kam long waen. Maet ol memba blong klas oli save serem lesen we oli kasem taem oli mekem hemia. ?Wanem nao yu lanem abaot Sevya long ol ves ia? ?Olsem wanem nao merikel ia i soemaot glori blong God? (luk long ves 11).

Jon 2:13–22

Yumi save stanap blong protektem ol tabu ples mo ol samting.

• Blong helpem ol memba blong klas blong lanem stori blong Jisas we i ronemaot ol man blong mekem mane long tempol, maet yu askem olgeta blong tingbaot ol nara samting, we i semmak long ol tempol, we Lod i tekem i tabu. ?Olsem wanem yumi save help blong holemtaet ol tabu samting olsem, oli stap tabu long oltaem?

Jon 3:1–21

Yumi mas bon bakegen blong go insaed long kingdom blong God.

• ?Olsem wanem yumi save eksplenem long wan, se i minim wanem blong bon bakegen? Tingting blong invaetem ol memba blong klas blong praktis long olsem wanem blong ansarem kwestin ia wetem wan we i stap sidaon kolosap long hem. Taem oli mekem, oli save toktok raon long ol kwestin olsem ia: ?Yumi lanem wanem aot long ol toktok blong Jisas we oli stap long Jon 3:3–7? ?Olsem wanem fasin blong sakem sin, baptaes, mo konfemesen i helpem yumi blong bon bakegen? Stetmen long “Sam Moa Risos” i save go wetem storian ia tu.

• Sam pipol oli biliv se wan man i no rili save jenisim laef. Nikodimas, i wan eksampol blong wan we i bin jenisim laef olsem wan risal blong folem gospel blong Jisas Kraes. Blong helpem ol memba oli luk hemia, yu save invaetem olgeta blong luklukgud insaed long Jon 3:1–2; Jon 7:45–52; mo Jon 19:38–40. ?Wanem nao yumi lanem abaot fasin mo bilif blong Nikodimas long ol ves ia? ?Olsem wanem nao hem i jenis folem taem? ?Wanem eksampol yumi save serem abaot ol pipol we oli bin jenisim laef blong olgeta tru long gospel?

Jon 4:5–34

Jisas Kraes i givim long yumi “wota we i gat laef long hem” mo “kakae” blong mekem wok blong God.

• Bodi blong yumi i nidim kakae mo wota evri dei. Jisas i tokbaot evri samting ia we yumi nidim taem Hem i tijim woman Sameria mo ol disaepol blong Hem (luk long John 4:5–34). Blong helpem ol memba blong klas i andastanem wanem Sevya i stap tijim, yu save putum ol pikja blong ol kaekae mo wota long bod mo invaetem ol memba blong klas blong raet andanit long wanwan pikja ia, ol trutok abaot kaekae mo wota long saed blong spirit we Jisas i bin tijim. ?Olsem wanem Sevya i fidim yumi long kaekae mo wota long saed blong spirit?

  smol wota we i stap ron

  Jisas Kraes i givim long yumi wota we i gat laef.

• Blong stap tingtingbak long wei we woman Sameria i progres long testemoni blong hem abaot Jisas Kraes, i save helpem ol memba blong klas blong yu blong oli tingting hevi long olsem wanem oli kam blong save se Hem i Mesaea ia. Olsem wan klas, lukaotem ol toktok blong woman Sameria i bin yusum blong talem huia nao i Sevya; luk long Jon 4:6–30. ?Wanem nao ol toktok ia oli talemaot abaot save blong hem abaot huia nao i Jisas? ?Olsem wanem nao testemoni blong yumi i bin gro blong save se Hem i Sevya blong yumi?

risos pikja bokis

Sam Moa Risos

I minim wanem blong bon bakegen.

Elda David A. Bednar i bin tijim: “Fasin blong jenisim laef … i gat bigfala paoa, i no wan smol samting—hem i blong bon bakegen long saed blong spirit mo stamba jenis blong wanem yumi filim mo wantem, wanem yumi tingting long hem mo mekem, mo wanem i yumi. Gospel blong Jisas Kraes i askem wan jenis blong laef, we i blong oltaem we yumi mekem tru long ‘ol gudfala wok, mo sore, mo gladhat blong Tabu Mesaea’ (2 Nifae 2:8). Taem yumi jusum blong folem Masta, yumi jusum blong stap jenis—blong bon bakegen long saed blong spirit” (“Ye Must Be Born Again,” Liahona, May 2007, 20).

Presiden Dallin H. Oaks i tijim: “Yumi bon bakegen taem yumi mekem wan kavenan rilesensip wetem Sevya blong yumi taem yumi bon long wota mo long spirit mo tekem long yumi nem blong Jisas Kraes. Yumi save riniu blong bon bakegen ia long evri sabat taem yumi tekem mo kakae sakramen. Ol Lata-dei Sent oli talem strong se olgeta we oli bin bon bakegen long wei ia oli ol stret spirit pikinini boe mo gel blong Jisas Kraes (luk long Mosaea 5:7; 15:9–13; 27:25). Nomata long hemia, blong kasem ol stret blesing blong fasin ia blong bon bakegen, yumi mas kipim ol kavenan blong yumi mo stap strong kasem en” (“Have You Been Saved?,” Ensign, May 1998, 56).

Kam Antap long Fasin blong Yumi blong Stap Tij

Tija i no moa gud bitim hem we i stap lan. Rol blong yu olsem tija, i impoten, be tingbaot se yu yu no wan ia nomo we oli save kasem insperesen long hem, insaed long klas. Helpem ol memba blong klas blong oli lanem samting aot long Spirit mo serem wetem wanwan long yumi wanem we oli lanem.