Si Jesus nagtudlo didto sa bukid

Jesus Preaching Sermon on the Mount [Si Jesus Nagwali didto sa Bungtod], ni Frank Adams

Pebrero 13–19

Mateo 5; Lucas 6

“Bulahan Kamo”

I-rekord ang imong espirituwal nga mga impresyon samtang magtuon ka sa Mateo 5 ug sa Lucas 6. Ang pagpadayag moabot kon magtinguha ka sa pagtubag sa mga panginahanglan sa imong klase.

pagpaambit nga icon

Dapita ang Pagpaambit

Si Presidente Joseph Fielding Smith miingon nga ang Wali sa Bungtod mao “ang pinakatalagsaon nga sukad nasangyaw, sigon sa atong nahibaloan” (Mga Pagtulun-an sa mga Presidente sa Simbahan: Joseph Fielding Smith [2013], 267). Dapita ang mga sakop sa klase sa pagpaambit sa ilang mga gibati mahitungod kon nganong kini tinuod.

icon sa pagtudlo

Itudlo ang Doktrina

Mateo 5:1–12

Ang malungtarong kalipay magagikan sa pagpuyo sa paagi nga gitudlo ni Jesukristo.

• Diha sa Wali sa Bungtod, ang Manluluwas midapit sa Iyag mga disipulo sa paghunahuna og usab kon unsa ang mga kahul[o]gan sa magpakabuhi og bulahan nga kinabuhi—usa ka kinabuhi sa malungtarong kalipay. Sa pagsugod og panaghisgotan mahitungod sa malungtarong kalipay, mahimo nimong hangyoon ang mga sakop sa klase sa pagpaambit kon unsa ang makapalipay kanila. Sumala sa Mateo 5:1–12, unsay gisulti ni Jesus nga makapahimo sa tawo nga “bulahan,” o malipayon sa mahangturong paagi? Sa unsang paagi nga ang mga pagtulon-an ni Jesus lahi kay sa ubang mga paagi nga gisulayan sa pagpangita sa mga tawo ang kalipay?

• Ikonsiderar ang paglista diha sa pisara sa uban nga mga hiyas o mga kalidad gikan sa mga bersikulo 3–12, sama sa “putli og kasingkasing” o “managdait.” Dayon dapita ang mga sakop sa klase sa pagsugyot sa sukwahi sa matag termino. Unsa ang atong makat-onan mahitungod niining mga kalidad pinaagi sa pagkonsiderar sa mga sukwahi niini? Hangyoa ang mga sakop sa klase sa pagpamalandong kon unsay ilang mausab aron mahimong matang sa tawo nga gihulagway dinhi niini nga mga bersikulo. Unsa ang gikadugang sa 3 Nephi 12:3, 6 sa atong panabot bahin sa Mateo 5:3, 6?

Si Jesus nagtudlo sa mga disipulo

Ang Manluluwas nagtudlo kon unsaon sa pagpakabuhi nga malipayon ug mahimong sama sa atong Amahan sa Langit.

Mateo 5:14–16

Ang mga disipulo sa Manluluwas kinahanglang mahimong kahayag alang sa kalibotan.

• Unsay ipasabot sa mahimong “kahayag sa kalibotan”? (bersikulo 14). Unsay gipasabot sa pagtago sa atong kahayag “isulod sa gantangan”(bersikulo 15), ug ngano nga mahimo man kitang matintal sa pagbuhat niini? Ang pamahayag ni Presidente Bonnie H. Cordon sa “Dugang nga mga Kapanguhaan” ug sa 3 Nephi 18:24 tingali makatabang sa mga sakop sa klase nga mahimong mas motuyo sa pagkahimong usa ka kahayag ngadto sa uban. Mahimo usab sila nga maghisgot mahitungod sa mga tawo nga nahimong kahayag ngadto kanila ug migiya kanila ngadto ni Jesukristo. Sa unsang paagi kita makasundog niini nga mga tawo?

Mateo 5:17–48

Si Jesukristo nagtudlo og mas taas nga balaod nga makagiya kanato paingon sa pagkahingpit.

• Ang uban nga mga sitwasyon nga gihulagway diha sa Mateo 5 piho gayod ngadto sa panahon sa Manluluwas, apan ang mga baroganan nga Iyang gitudlo pangkinatibuk-an. Aron matabangan ang mga sakop sa klase nga makita sa mga kagamitan niini sa ilang kinabuhi, dapita sila sa pagpili og usa sa mosunod nga mga tudling ug sa paghunahuna og moderno nga ehemplo nga naghulagway kon unsay gitudlo sa Manluluwas: mga bersikulo 21–24; 27–30; 33–37; 38–39; 40–42; ug 43–44. Mahimo nila kining buhaton sa tinagsa-tagsa o diha sa ginagmay nga mga grupo ug ipakigbahin ang ilang mga ehemplo ngadto sa klase.

• Unsaon nimo pagtabang sa mga sakop sa klase nga makita nga ang mando sa Manluluwas nga mahimong “hingpit” sa (Mateo 5:48) nagkahulogan, sama sa gipasabot ni Presidente Russell M. Nelson, nga mahimong “kompleto” o “nahuman”? (“Perfection Pending,” Ensign, Nob. 1995, 86–88). Mahimo ka nga maggunting og hulagway ni Jesus ngadto sa usa ka puzzle, ug dapita ang mga sakop sa klase sa pagsulat diha sa likod sa matag piraso og usa ka pagtulun-an gikan sa Mateo 5 nga sila mibati og kadasig nga gamiton kini ngadto sa ilang kinabuhi. Tugoti sila nga magtinabangay sa pagkompleto sa puzzle. Sa unsang paagi ang Pag-ula ni Jesukristo makatabang kanato nga mahimong “kompleto” o “nahuman”? (tan-awa sa Ang Giya ngadto sa mga Kasulatan, “Grasya”). Unsa ang gikadugang sa mga pulong ni Presidente Joy D. Jones diha sa “Dugang nga mga Kapanguhaan” sa imong mga panabot kabahin niini?

mga kapanguhaan nga icon

Dugang nga mga Kapanguhaan

Magmahimong usa ka kahayag.

Si Presidente Bonnie H Cordon nagtudlo: “Ang pagdapit sa Ginoo nga ang atong kahayag ipadan-ag dili lamang usa ka pinasulagma nga pagwara-wara sa kahayag ug mohimo sa kalib[o]tan nga mas hayag. Kini mao ang pagpunting sa atong kahayag aron ang uban makakita sa dalan ngadto kang Kristo. Kini mao ang pagpundok sa Israel niini nga habig sa tabil—ang pagtabang sa uban nga makita ang sunod nga ang-ang padulong sa paghimo ug pagtuman sa mga pakigsaad uban sa Dios” (“Aron Sila Makakita,” Liahona, Mayo 2020, 79).

Pagtinguha og kahingpitan.

Si Presidente Joy D. Jones mipasabot:

“Ang Ginoo ganahan og paningkamot, ug ang paningkamot magdala og mga ganti. Kita magpadayon sa pagbansay. Kita kanunay nga mouswag samtang kita maningkamot sa pagsunod sa Ginoo. Siya wala magla[o]m og pagkahingpit karon. Kita padayon nga motungas sa atong personal nga Bukid sa Sinai. Sama sa nangaging mga panahon, ang atong panaw sa pagkatinuod magkinahanglan gay[o]d og paningkamot, kakugi, ug pagtuon, apan ang atong pasalig sa pag-uswag magdala og mahangturong mga ganti. …

“Mais[o]gon nato nga ideklarar ang atong debosyon ngadto sa atong Langitnong Amahan ug sa atong Manluluwas, “uban sa dili matar[o]g nga hugot nga pagtuo diha kaniya, mosalig sa hingpit diha sa mga maayo nga buhat kaniya kinsa gamhanan sa pagluwas.”[2 Nephi 31:19]. Kita magmalipayon sa pagpadayon niini nga panaw padulong sa atong labing taas nga espirituhanong potens[i]yal” (“Usa ka Talagsaong Balaanon nga tawag,” Liahona, Mayo 2020, 16–17).

Pagpalambo sa Atong Pagtudlo

Palamboa ang pag-apil sa mga sakop sa klase. Daghang mga kalihokan ang mahimo isip usa ka klase, sa ginagmay nga mga grupo, sa mga parisan, o isip panel discussion. Paggamit og lain-laing mga paagi sa pagtudlo aron matugotan ang mga tawo nga makaapil kinsa mahimong walay kahigayonan nga moapil. (Tan-awa sa Pagtudlo sumala sa Pamaagi sa Manluluwas, 33.)