Into the Wilderness [Ngadto sa Kamingawan], ni Eva Koleva Timothy

Enero 30–Pebrero 5

Mateo 4; Lucas 4–5

“Ang Espiritu sa Ginoo ania Kanako”

Samtang magtuon ka sa Mateo 4 ug Lucas 4–5, i-rekord ang imong espirituwal nga mga impresyon. Makadapit kini og inspirasyon kon unsaon pagtubag ang mga panginahanglan sa imong klase. Mahimo usab nimong ikonsiderar ang paggamit sa Dali, Sunod Kanako—Alang sa mga Indibidwal ug mga Pamilya ingon man usab kini nga latid sa pagpangita og dugang nga mga ideya.

Dapita ang Pagpaambit

Ang basahonon karong semanaha naglakip niining pamahayag: “Nahibulong silang tanan sa paagi sa iyang pagtudlo kay may gahom man ang iyang mga pulong” (Lucas 4:32; tan-awa usab sa Marcos 1:22). Dapita ang mga sakop sa klase sa pagpaambit og mga bersikulo gikan sa Mateo 4 ug Lucas 4–5 nga makatabang kanila nga mobati niana nga gahom sa doktrina mismo sa ilang kaugalingon.

Itudlo ang Doktrina

Mateo 4:1–11; Lucas 4:1–13

Ang Langitnong Amahan mihatag kanato og gahom ug pamaagi sa pagbuntog sa tintasyon.

• Ang istorya bahin sa Manluluwas nga nakigbatok kang Satanas makatabang sa mga sakop sa klase nga mahibalo sa mga paagi nga si Satanas mosulay sa pagtintal kanila. Ang mga sakop sa klase mahimong mopili og usa ka tintasyon diha sa Mateo 4:1–11 o Lucas 4:1–13 ug maghunahuna og moderno, may kalabotan nga tintasyon (ang pamahayag diha sa “Dugang nga Kapanguhaan” mahimong makatabang). Nganong makatabang man nga masayod nga ang Manluluwas nag-atubang og mga tintasyon susama niadtong atong giatubang karon? Nganong nakahimo man si Kristo sa pakigbatok sa tintasyon? Alang sa ubang mga ehemplo sa kasulatan bahin sa mga tawo nga nakigbatok kang Satanas, tan-awa sa Genesis 39:7–20; 2 Nephi 4:16–35; ug Moises 1:10–22.

• Unsa ang makatabang sa imong mga sakop sa klase sa pagpakigbatok sa tintasyon? Mahimo nimong silang hangyoon sa pagrebyo sa mga sitwasyon diha sa Mateo 4:1–11 o Lucas 4:1–13 aron makakat-on kon sa unsang paagi nga ang kahibalo sa Manluluwas diha sa mga kasulatan mitabang Kaniya sa pagtubag ngadto ni Satanas, sa Iyang gibuhat sa dihang Siya miingon, “Kini nahisulat.” Hatagi og panahon ang mga sakop sa klase sa pagpangita ubos sa “Pagtintal, Tintal” diha sa Ang Giya ngadto sa mga Kasulatan alang sa mga kasulatan nga makapalig-on kanila kon sila mobati nga gitintal.

Lucas 4:16–32

Si Jesukristo mao ang gipanagna nga Mesiyas.

• Aron matabangan ang mga sakop sa imong klase nga mas makasabot niini nga asoy diha sa Lucas 4:16–32, mahimo nimong ipasabot nga ang mga tawag nga Mesiyas ug Kristo parehas nga nagpasabot nga “ang dinihogan.” Samtang mobasa ang mga sakop sa klase sa Lucas 4:18–21, hangyoa sila sa paghunahuna kon unsay buot ipasabot sa giingon nga si Jesus mao ang Kristo, ang Mesiyas, o ang Usa nga Dinihogan. Mahimong mabantayan nila nga makatabang ang pagbasa sa “Usa nga Dinihogan” diha sa Ang Giya ngadto sa mga Kasulatan. Giunsa pagpahayag ni Jesus nga Siya mao ang Mesiyas karon? Ang mga sakop sa klase mahimong makapaambit kon giunsa nila sa pagkasayod nga si Kristo mao ang ilang Manluluwas.

• Mahimong dunay pipila ka makatabang nga leksiyon nga makat-onan pinaagi sa pagsuhid nganong ang katawhan sa Nazaret wala modawat kang Jesus isip ang gipanagna nga Mesiyas. Unsa nga mga rason, pananglitan, ang gisugyot diha sa Lucas 4:22–24? Ang mga sakop sa klase makatandi dayon niining mga kinaiya sa kadtong sa balo nga si Sarefat ug ni Naaman sa Daang Tugon, mga tawo nga dili mga Israelita (tan-awa sa Lucas 4:25–27). Mahimo nimong kontakon og sayo ang ubang mga sakop sa klase ug hangyoon sila nga moabot nga andam sa pag-summarize sa matag usa niining mga istorya (tan-awa sa 1 Mga Hari 17:8–24; 2 Mga Hari 5:1–17; Lucas 4:16–30). Unsa ang gitudlo niini nga mga pulong kanato mahitungod sa pagbaton og hugot nga pagtuo diha ni Jesukristo? Kita aduna bay nakit-an nga bisan unsa nga mensahe alang kanato diha sa mga pulong sa Manluluwas ngadto sa katawhan sa Nazaret?

Mateo 4:18–22; Lucas 5:1–11

Ang pagsunod ni Kristo nagpasabot sa pagbiya sa atong kabubut-on ug sa pagdawat sa Iyang kabubut-on.

• Usahay ang direksiyon nga ihatag sa Ginoo kanato morag walay pulos sa sinugdanan. Ang mga sakop sa klase mahimong mosiksik sa Lucas 5:1–11, nga mangita kon unsay gipabuhat sa Manluluwas kang Pedro ug ngano kaha nga nagduha-duha man si Pedro sa Iyang mga instruksiyon. Sa unsa kaha nga paagi nga kining kasinatian nakaapekto sa mga pagbati ni Pedro mahitungod sa Manluluwas ug sa iyang kaugalingon? Mahimo nimong dapiton ang mga sakop sa klase sa pagpaambit og mga kasinatian diin nagpakita sila sa ilang hugot nga pagtuo sa balaanong giya bisan wala pay hingpit nga panabot. Unsa ang resulta sa dihang sila mipakita sa ilang hugot nga pagtuo?

  

  “Kuyog kamo kanako ug tudloan ko kamo sa pagpanagat og mga tawo” (Mateo 4:19).

• Sama sa mga mangingisda “gibiyaan nila ang tanan” aron mosunod kang Jesukristo (Lucas 5:11), adunay mga butang nga kinahanglan natong biyaan aron mahimong Iyang mga disipulo. Unsa ang atong nakat-onan gikan sa Mateo 4:18–22 mahitungod sa mga kinaiya ug hugot nga pagtuo nilang Pedro, Andres, Santiago, ug Juan? Tingali makatabang ang pagdala og usa ka pukot ngadto sa klase. Dayon dapita ang mga sakop sa klase sa pagsulat og mga butang nga andam nilang biyaan o nabiyaan na aron mosunod ni Kristo ug ibutang kini diha sa pukot. Ikonsiderar ang pagdapit sa pipila ka sakop sa klase sa pagpakigbahin kon sa unsang paagi nga ang ilang kinabuhi nausab samtang mipili sila nga biyaan ang tanan aron mosunod sa Manluluwas.

Dugang nga mga Kapanguhaan

Mga matang sa tintasyon.

Human sa pagpamulong kabahin sa mga tintasyon nga giatubang sa Manluluwas didto sa kamingawan, si Presidente David O. McKay mitino sa tulo ka kategoriya sa mga tintasyon:

“(1) Tintasyon sa gana o kahinam;

“(2) Pagpadala sa garbo, uso, o panghambog;

“(3) Tinguha alang sa kalibotanong mga katigayunan o gahom ug dominyon sa mga yuta o yutan-ong mga kabtangan sa mga tawo” (Mga Pagtulun-an sa mga Presidente sa Simbahan: David O. McKay [2003], 100).

Pagpalambo sa Atong Pagtudlo

Pasalamati ang imong mga tigkat-on. “Ayaw kaayo [palabii ang] paghunahuna sa unsay imong itudlo nga makalimot na ka sa pagpasalamat sa mga tigkat-on alang sa ilang mga natampo. Kinahanglan masay[o]d sila nga nakadayeg ka sa ilang kaandam sa pagpakigbahin sa ilang mga panab[o]t ug mga pagpamatuod.” (Pagtudlo sumala sa Pamaagi sa Manluluwas, 33).