Si Jesus nakig-istorya ni Nicodemo

Pebrero 6–12

Juan 2–4

“Kinahanglan Magpakatawo Kamo Pag-usab”

Ang pagbasa sa Juan 2–4 usa ka maayong paagi sa pagsugod nga mag-andam sa pagtudlo. I-rekord ang bisan unsang espirituwal nga mga impresyon nga imong madawat, ug gamita kini nga latid sa pagpangita og dugang nga mga panabot ug mga ideya sa pagtudlo.

pagpaambit nga icon

Dapita ang Pagpaambit

Isulat ang tulo ka ulohan diha sa pisara: Juan 2, Juan 3, ug Juan 4. Hatagi ang mga sakop sa klase og pipila ka minuto sa pagrebyo niining mga kapitulo ug dayon ipasulat diha sa ubos sa matag ulohan sa bersikulo ang usa ka bersikulo nga nakatabang kanila nga makasabot sa doktrina ug mga panghitabo niana nga kapitulo. Hisgoti ang mga bersikulo nga ilang gisulat.

icon sa pagtudlo

Itudlo ang Doktrina

Juan 2:1–11

Ang mga milagro ni Jesukristo “nakapakita sa iyang himaya.”

• Ang latid karong semanaha sa Dali, Sunod Kanako—Alang sa mga Indibiduwal ug mga Pamilya nagsugyot sa pagbasa sa Juan 2:1–11 gikan panglantaw sa usa ka tawo nga diha sa dihang gihimo ni Jesus ang tubig ngadto sa bino. Tingali ang mga sakop sa klase mahimong makapaambit og mga ideya nga ilang naangkon sa pagbuhat niini. Unsay atong makat-onan mahitungod sa Manluluwas gikan niini nga mga bersikulo? Sa unsang paagi nga kining milagro nagpakita sa himaya sa Dios? (tan-awa sa bersikulo 11).

Juan 2:13–22

Makahimo kita sa pagpanalipod sa sagradong mga dapit ug mga butang.

• Aron matabangan ang mga sakop sa klase nga makakat-on gikan sa estorya ni Jesus nga nag-abog sa mga tig-ilis og kwarta pagawas sa templo, tingali imo silang hangyoon sa paghunahuna og laing mga butang, agig dugang sa mga templo nga gikonsiderar sa Ginoo nga sagrado. Sa unsang paagi nga makatabang kita sa pagpreserbar sa kasagrado niining sagradong mga butang?

Juan 3:1–21

Gikinahanglan gayod nga kita nga matawo pag-usab aron makasulod sa gingharian sa Dios.

• Unsaon man kaha nato sa pagpasabot ngadto sa usa ka tawo kon unsay gipasabot sa magpakatawo pag-usab? Ikonsiderar ang pagdapit sa mga sakop sa klase sa pagpraktis kon unsaon nila pagtubag kining pangutana kauban ang tawo nga naglingkod tupad nila. Samtang mobuhat sila, mahimo nilang hisgotan ang mga pangutana sama niini: Unsa ang atong nakat-onan gikan sa mga pulong ni Jesus diha sa Juan 3:3–7? Sa unsang paagi nga ang paghinulsol, bunyag, ug kompirmasyon makatabang kanato nga matawo pag-usab? Ang mga pamahayag diha sa “Dugang nga mga Kapanguhaan” mahimong makadugang niini nga panaghisgotan.

• Ang ubang mga tawo nagtuo nga ang usa ka tawo dili gayod mausab. Si Nicodemo, hinoon, mao ang usa ka ehemplo sa tawo kinsa nausab isip resulta sa pagsunod sa ebanghelyo ni Jesukristo. Aron matabangan ang mga sakop sa klase nga makita kini, mahimo nimo silang dapiton sa pagsiksik sa Juan 3:1–2; Juan 7:45–52; ug Juan 19:38–40. Unsa may atong makat-onan gikan niining mga tudling mahitungod sa kinaiya ug mga gituohan ni Nicodemo? Giunsa man niya pag-usab sa paglabay sa panahon? Unsa nga mga ehemplo ang atong mapaambit kabahin sa mga tawo kinsa nausab tungod sa ebanghelyo?

Juan 4:5–34

Si Jesukristo nagtanyag kanato og “buhi nga tubig ug sa “makaon” sa paghimo sa buhat sa Dios.

• Ang atong lawas nagkinahanglan og pagkaon ug tubig sa kada adlaw. Mipasabot si Jesus niining kinatibuk-ang mga panginahanglan sa dihang nagtudlo Siya sa babayeng Samarianhon ug sa Iyang mga disipulo (tan-awa sa Juan 4:5–34). Aron matabangan ang mga sakop sa klase nga makasabot kon unsay gitudlo sa Manluluwas, mahimong magplastar ka og mga litrato sa pagkaon ug tubig diha sa pisara ug dapita ang mga sakop sa klase sa pagsulat sa ubos sa matag litrato sa mga kamatuoran mahitungod sa espirituwal nga pagkaon nga gitudlo ni Jesus. Sa unsang paagi nga gitagbaw sa Manluluwas ang atong espirituwal nga kagutom ug espirituwal nga kauhaw?

  dinagayday sa tubig

  Si Jesukristo mitanyag kanato sa buhi nga tubig.

• Ang pagpamalandong bahin sa pag-uswag sa pagpamatuod sa babaye nga Samarianhon bahin ni Jesukristo makatabang sa mga sakop sa imong klase nga mamalandong kon giunsa nila pagkasayod nga Siya mao ang Mesiyas. Isip usa ka klase, pangitaa ang mga termino nga gigamit sa babayeng Samarianhon nga nagpasabot ngadto sa Manluluwas diha sa Juan 4:6–30. Unsay buot ipasabot niining mga termino mahitungod sa iyang kahibalo kon si kinsa si Jesus? Giunsa nato paglambo diha sa atong mga pagpamatuod nga Siya mao ang atong Manluluwas?

mga kapanguhaan nga icon

Dugang nga mga Kapanguhaan

Unsay buot ipasabot nga matawo pag-usab.

Si Elder David A. Bednar nagtudlo: “Ang pagkakabig … dako, dili gamay—usa ka espirituhanong pagkatawo pag-usab ug usa ka sukaranang kausaban sa unsay atong gibati ug gitinguha, unsay atong gihunahuna ug gibuhat, ug unsa kita. Sa pagkatinuod, ang lintunganay sa ebanghelyo ni Jesukristo nagkinahanglan sa sukaranan ug permanente nga kausaban sa atong pagkatawo nga mahimong posible pinaagi sa atong pagsalig diha sa ‘maayo nga buhat, ug kalooy, ug grasya sa Balaan nga Mesiyas’ (2 Nephi 2:8). Kon kita mopili sa pagsunod sa Ginoo, kita mipili nga mag-usab—espirituhanong magpakatawo pag-usab” (“Kinahanglang Matawo Kamo Pag-usab,” Liahona, May 2007, 20).

Si Presidente Dallin H. Oaks nagtudlo: “Gipakatawo kita pag-usab sa dihang kita misulod sa pakigsaad nga relasyon uban sa atong Manluluwas pinaagi sa pagpakatawo og usab sa tubig ug sa Espiritu ug sa pagdala ngari kanato sa pangalan ni Jesukristo. Mabag-o nato kana nga pagpakatawo pag-usab sa matag Igpapahulay kon kita moambit sa sakrament. “Ang mga Santos sa Ulahing mga Adlaw nagpamatuod nga kadtong mga natawo pag-usab sa ingon niini nga paagi mga espirituhanong mga anak ni Jesukristo (tan-awa sa Mosiah 5:7; 15:9–13; 27:25). Bisan pa, aron madawat ang gituyo nga mga panalangin niining natawo pag-usab nga kahimtang, kita kinahanglan gihapon nga motuman sa atong mga pakigsaad ug molahutay hangtod sa katap[o]san” (“Have You Been Saved?,” Ensign, Mayo 1998, 56).

Pagpalambo sa Atong Pagtudlo

Ang magtutudlo dili ingon nga maayo pa kay sa gitudloan. Ang imong tahas isip magtutudlo importante, apan dili lamang ikaw ang bugtong tinubdan sa inspirasyon diha sa klase. Tabangi ang mga sakop sa klase nga makakat-on gikan sa Espiritu ug mopakigbahin sa usag usa sa unsay ilang nakat-onan.