Si Jesus nagtudlo sa daplin sa baybayon

Jesus Teaching the People by the Seashore [Nagtudlo si Jesus sa mga Tawo sa Daplin sa Baybayon], ni James Tissot

Pebrero 20–26

Mateo 6–7

“Kanila Nagpanudlo man Siya ingon nga May Kagah[o]m”

Samtang mangandam ka sa pagtudlo, sugdi pinaagi sa pag-andam sa imong kaugalingon. Tun-i ang Mateo 6–7, ug i-rekord ang imong espirituwal nga mga impresyon. Makatabang kini kanimo nga makadawat og pagpadayag kon unsaon pagtubag ang mga panginahanglan sa imong klase. Dayon pangitaa kining latid alang sa mga ideya sa pagtudlo.

pagpaambit nga icon

Dapita ang Pagpaambit

Dapita ang mga sakop sa klase sa pagpakigbahin kon hain sa mga tudling diha sa Wali sa Bukid nga sa ilang pamati mao ang labing gikinahanglan karon. Awhaga ang mga sakop sa klase sa pagdugang og mga ideya sa usag usa.

icon sa pagtudlo

Itudlo ang Doktrina

Mateo 6–7

Kon kita maminaw ug molihok sa mga pagtulun-an sa Ginoo, ang atong kinabuhi matukod diha sa lig-on nga pundasyon.

• Unsa nga piho nga mga pagtulun-an gikan sa Mateo 6–7 ang mas makabenepisyo niadtong imong tudloan? Ikonsiderar ang pagsulat diha sa pisara og pipila ka pakisayran gikan sa Mateo 6–7 nga naglangkob niining mga pagtulun-an. Ang mga sakop sa klase mahimong mopili og usa sa mga pakisayran nga tun-an sa hilom ug dayon isulat diha sa pisara ang bisan unsa nga espirituwal nga mga kamatuoran nga ilang makat-onan. Sa unsang paagi nga kining mga pagtulun-an nakaimpluwensiya sa atong kinabuhi?

• Gitapos sa Manluluwas ang Iyang wali pinaagi sa usa ka sambingay nga mahimong makatabang sa imong klase nga mas makasabot sa kaimportante sa pagsunod sa mga pagtulun-an sa Manluluwas (tan-awa sa Mateo 7:24–27; tan-awa usab sa Helaman 5:12). Aron mapanglantawan kini nga sambingay, ang mga sakop sa klase mahimo nga magtinabangay aron makatukod og lig-on nga pundasyon gamit ang mga bloke, mga tasa, o ubang mga materyal ug dayon testingan ang kalig-on sa mga pundasyon niini. Mahimo usab nilang butangan og label ang ilang mga materyal sa building pinaagi sa mga butang nga ilang mabuhat aron magamit ang mga pagtulun-an sa Manluluwas. Sa unsang paagi nga ang pagbuhat niining mga butanga makatabang kanato sa pagbuntog sa mga unos sa kinabuhi?

Mateo 6:5–13

Gitudloan kita sa Manluluwas kon unsaon sa pag-ampo.

• Ang pagtuon sa Pag-ampo sa Ginoo mahimong makatabang sa mga sakop sa klase nga mahibalo kon unsaon nila sa pagpalambo sa ilang kaugalingong mga pag-ampo pinaagi sa pagsunod sa ehemplo sa Ginoo. Mahimo nimo silang dapiton sa pagsulat diha sa pisara sa mga pulong gikan sa Mateo 6:9–13 (o Lucas 11:1–4) nga importante ngadto kanila. Samtang mamalandong kita sa mga pulong sa Manluluwas, unsa may atong makat-onan mahitungod pag-ampo? Mahimong makatudlo kini sa mga sakop sa klase sa pag-usab sa pipila ka mga pulong sa Manluluwas isip mga butang nga tingali ilang isulti sa ilang kaugalingong mga pag-ampo. Pananglitan, ang “Hatagi kami karon sa pagkaon namo sa matag-adlaw” mahimong usbon nga “Palih[o]g tabangi ko sa akong mga paningkamot nga makasangkap sa akong pamilya.”

• Human sa pagbasa sa Mateo 6:5–13 isip usa ka klase, makahisgot ka sa mga pangutana sama niini: sa unsang paagi ang pag-ampo nagpalig-on sa imong relasyon uban sa Langitnong Amahan? Sa unsang paagi ang pag-amo mitabang kanimo sa pagkahibalo sa kabubut-on sa Dios?

Mateo 7:7–11

Ang Langitnong Amahan motubag sa mga pag-ampo.

• Aron matabangan ang mga sakop sa klase nga mapalig-on ang ilang pagtuo nga ang Dios modungog ug motubag sa ilang mga pag-ampo, mahimo nimong isulat diha sa pisara ang pangayo, pangita, ug panuktok. Dayon dapita ang mga sakop sa klase sa pagsiksik sa mga kasulatan alang sa mga ehemplo sa mga tawo nga “nangayo,” “nangita,” ug “nanuktok” (pananglitan, tan-awa sa 1 Nephi 11:1; Ether 2:18–3:6; Joseph Smith—Kasaysayan 1:11–17). Unsa ang atong makat-onan gikan niining mga ehemplo mahitungod sa pagbaton og mga tubag sa atong mga pag-ampo?

• Ang ubang importante nga konteksto alang sa Mateo 7:7–11 makita diha sa Hubad ni Joseph Smith sa Mateo 7:12–17 (appendix sa Biblia). Niining mga bersikulo, ang mga disipulo ni Jesus nagpaabot sa pipila ka rason nga tingali ihatag sa mga tawo bahin sa dili pagpangita sa kamatuoran gikan sa Langitnong Amahan. Mahimo nimong hangyoon ang mga sakop sa klase sa pag-hunahuna nga sila adunay higala nga nagduha-duha nga magtinguha og giya o mga panalangin gikan sa Ginoo. Unsa kaha ang masulti sa mga sakop sa klase aron sa pagdasig niini nga higala? Unsaon kaha nila paggamit ang mga pulong sa Manluluwas diha sa Mateo 7:7–11?

Mateo 7:15–20

Makaila kita sa tinuod ug sa mini nga mga propeta pinaagi sa ilang mga bunga.

• Ang mga sakop sa imong klase mahimong nakasugat og sayop nga mga pilosopiya ug ubang mga pagpanglingla sa kaaway, maanaa man sa internet o gikan sa laing mga tinubdan. Mahimong nakadungog usab sila sa uban nga misaway sa mga sulugoon sa Ginoo. Unsaon nimo sa pagtabang kanila nga makasabot kon unsaon pag-ila ang mini nga mga propeta ug mga pagtulun-an gikan sa unsay tinuod? Mahimo nimong i-display ang pipila ka piraso sa bunga ug ipangutana kon unsay atong mahunahuna mahitungod sa gigikanan niini nga mga kahoy. Sa unsang paagi nga kining kalihokan makatabang kanato nga makasabot sa Mateo 7:15–20? Mahimo usab kamo nga magbasa og dungan sa pipila ka bag-ohay nga mga mensahe gikan sa buhi nga mga propeta. Unsa nga “mga bunga” o mga resulta ang mahimo sa pagsunod sa ilang tambag?

  bunga

  Makaila kita sa tinuod nga mga propeta pinaagi sa ilang mga bunga.

• Ang Mateo 7:15–20 mahimong makatabang sa pag-ugmad sa pagtuo sa mga sakop sa klase diha sa balaang misyon ni Propeta Joseph Smith. Unsa ang mga bunga sa buhat nga nahimo ni Joseph Smith? Alang sa ubang mga ideya, tan-awa sa mensahe ni Elder Neil L. Andersen sa “Joseph Smith” (Liahona, Nob. 2014, 28–31). Unsaon nato paggamit sa analohiya diha sa Mateo 7:15–20 sa pagpamatuod ngadto sa atong mga higala ug pamilya mahitungod ni Propeta Joseph?

Pagpalambo sa Atong Pagtudlo

Ayaw og kahadlok sa kahilom. “Ang maayo nga mga pangutana nagkinahanglan og panahon sa pagtubag. Nagkinahanglan kini og pagpamalandong, pagsiksik, ug inspirasyon. Ang panahon nga imong gigahin sa paghulat og mga tubag sa usa ka pangutana mahimong usa ka sagrado nga panahon sa pagpamalandong. Likayi ang tintasyon nga hunungon dayon kini nga panahon pinaagi sa pagtubag sa imong kaugalingong pangutana o pagbalhin ngadto sa laing butang” (Pagtudlo sumala sa Pamaagi sa Manluluwas, 31).