Ni Jesus a mangisursuro iti bantay

Ni Jesus nga Agikaskasaba iti Sermon iti Bantay, ni Gustave Doré

Pebrero 13–19

Mateo 5; Lucas 6

“Nagasatkayo”

Isuratmo dagiti naespirituan nga impresionmo bayat ti panagadalmo iti Mateo 5 ken Lucas 6. Umayto ti paltiing bayat ti panagkalikagummo a mangipaay kadagiti kasapulan ti klasem.

icon iti panagbibinninglay

Yawis ti Panagbibinninglay

Kinuna ni Presidente Joseph Fielding Smith a ti Kaskasaba iti Bantay ti “kaindaklanan a [kaskasaba] a naikasaban, kas iti pannakammotayo” (Teachings of Presidents of the Church: Joseph Fielding Smith [2013], 234). Awisem dagiti miembro ti klase a mangiburay kadagiti riknada maipapan iti no apay a pudno daytoy.

icon iti panangisuro

Isuro ti Doktrina

Mateo 5:1–12

Sumangbay ti agnanayon a ragsak manipud iti panagbiag iti wagas nga insuro ni Jesucristo.

• Iti Kaskasaba iti Bantay, inawis ti Mangisalakan dagiti disipulona tapno mangamiris manen no ania ti kaipapanan ti agbiag iti naparaburan wenno nagasat a biag—maysa a biag nga addaan iti manayon a ragsak. Tapno mangirugi iti panaglilinnawag maipapan iti manayon a ragsak, mabalinmo nga idawat kadagiti miembro ti klase a mangibinglay no ania dagiti mangparagsak kadakuada. Segun iti Mateo 5:1–12, ania ti kinuna ni Jesus a mamagbalin iti tao a “nagasat,” wenno agnanayon a naragsak? Kasano a maigidiat dagiti pannursuro ni Jesus iti dadduma pay a wagas a panangpadas dagiti tao nga agsapul iti ragsak?

• Ibilang ti panangisurat iti pisarra kadagiti sumagmamano a kababalin wenno talugading manipud kadagiti bersikulo 3–12, kas iti “nadalus ti pusoda” wenno “mamagkakappia.” Kalpasanna awisen dagiti miembro ti klase a mangisingasing iti kasungani ti tunggal balikas. Ania ti maadaltayo kadagitoy a kababalin babaen ti panangibilang kadagiti kasunganida? Idawatmo kadagiti miembro ti klase a mangutob no ania ti mabalinda a baliwan tapno agbalinda a kita ti tao a nailadawan kadagitoy a bersikulo. Ania ti inayon ti 3 Nephi 12:3,6 iti pannakaawattayo iti Mateo 5:3,6?

Ni Jesus a mangisursuro kadagiti disipulo

Insuro ti Mangisalakan no kasano ti agbiag a naragsak ken agbalin a kas iti Amatayo iti Langit.

Mateo 5:14–16

Nasken nga agbalin a silaw ti lubong dagiti disipulo ti Mangisalakan.

• Ania ti kayat a sawen ti agbalin a “silaw ti lubong”? (bersikulo 14). Ania ti kayat a sawen ti mangilemmeng iti silawtayo iti “sirok ti maysa a salop” (bersikulo 15), ken apay a masulisogtayo a mangaramid iti daytoy? Ti palawag ni Presidente Bonnie H. Cordon iti “Dagiti Nainayon a Resources” ken 3 Nephi 18:24 ket mabalin a makatulong kadagiti miembro ti klase nga ad-adda a mangipasnek nga agbalinda a silaw para kadagiti dadduma. Mabalinda pay a pagsasaritaan maipanggep kadagiti tao a nagserbi a silaw kadakuada ken nangiturong kadakuada ken ni Jesucristo. Kasano a matuladtayo dagitoy a tao?

Mateo 5:17–48

Insuro ni Jesucristo ti nangatngato a linteg a makaiturong kadatayo iti kinaan-anay.

• Sumagmamano kadagiti nailadawan a kasasaad iti Mateo 5 ket idi panawen ti Mangisalakan, ngem sapasap dagiti pagbatayan nga insurona. Tapno matulongan a makita dagiti miembro ti klase dagiti panangyaplikarda iti biagda, awisem ida a pumili iti maysa kadagiti sumaganad a binatog ken mangpanunot maipapan iti pagwadan iti kabaruanan nga aldaw a mangiladawan no ania ti isursuro ti Mangisalakan: dagiti bersikulo 21–24; 27–30; 33–37; 38–39; 40–42; ken 43–44. Mabalinda a maaramid daytoy a saggaysa wenno iti babassit a grupo ket ibinglayda dagiti pagariganda iti klase.

• Kasano a matulongam dagiti miembro ti klase a mangkita a ti kayat a sawen ti bilin ti Mangisalakan nga agbalin a “naan-anay” (Mateo 5:48) kas iti inlawlawag ni Presidente Russell M. Nelson, nga agbalin a “kumpleto” wenno “nalpasen”? (“Perfection Pending,” Ensign, Nob 1995, 86–88). Mabalinmo ti manggetteng iti maysa a ladawan ni Jesus iti maysa a puzzle, ken mangawis kadagiti miembro ti klase a mangisurat iti likud ti tunggal pedaso iti maysa a pannursuro manipud iti Mateo 5 a mariknada a naparegtada a mangyaplikar iti biagda. Bay-an ida nga agtitinnulong a mangkumpleto ti puzzle. Kasano a matulongannatayo ti Pannubbot ni Jesucristo nga agbalin a “naan-anay” wenno “nalpasen”? (kitaen iti Bible Dictionary, “Grace”). Ania dagiti balikas ni Presidente Joy D. Jones iti “Dagiti Mainayon a Resources” a makanayon iti pannakaawattayo iti daytoy a proseso?

resources icon

Dagiti Nainayon a Resources 

Panagbalin a maysa a silaw.

Insuro ni Presidente Bonnie H. Cordon: “Ti awis ti Apo tapno parayrayentayo dagiti silawtayo ket saan laeng nga iwagiswagis ti silnag ti lawag ken pagbalinen ti lubong a naranranniag. Daytoy ket ti panangipokus ti silawtayo kadagiti dadduma tapno makitada ti dalan nga agsubli ken ni Crsito. Daytoy ti pannakaummong ti Israel iti daytoy a paset ti belo—a tumulong kadagiti dadduma a mangkita ti sumaganad nga addang iti panagaramid ken panangtungpal kadagiti sagrado a katulagan iti Dios” (“That They May See,” Liahona, Mayo 2020, 79).

Panagkalikagum a manggun-od iti kinaan-anay.

Inlawlawag ni Presidente Joy D. Jones:

“Ay-ayaten ti Dios ti agkagumaan, ken mangyeg ti bendision ti agkagumaan. Agtultuloytayo nga agpraktis. Kankanayontayo nga agdur-as no agkagumaantayo a mangsurot iti Apo. Saanna a namnamaen ti kinanaan-anay ita. Agtultuloytayo a sumang-at iti bukodtayo a Bantay Sinai. Kas kadagiti naglabas a panawen, ti panagdaliasattayo, kinapudnona, kasapulan ti panagkagumaan, aramid, ken adal, ngem ti panagkumittayo ket mangipaay kadagiti agnanayon a parabur. …

“Situtured nga ipakdaartayo ti debosiontayo iti Nailangitan nga Amatayo ken Mangisalakantayo, ‘nga addaan iti natibker a pammati kenkuana, a naan-anay nga agpannuray kenkuana a mannakabalin a mangisalakan’ [2 Nephi 31:19]. Sirarag-o nga itultuloytayo daytoy a panagdaliasat iti kangatuan nga espirtual a potensialtayo” (“An Especially Noble Calling,” Liahona, Mayo 2020, 16–17).

Panangpadur-as iti Panangisurotayo

Paaduem ti pannakiraman dagiti miembro ti klase. Mabalin a maaramid ti adu nga aktibidad kas maysa a klase, iti babassit a grupo, iti sagsangaparis, wenno kas maysa a panaglilinnawag iti panel. Usarem ti nadumaduma a pamay-an a mangpalugod kadagiti tao a makiraman a mabalin a no saan a maaddaan iti gundaway. (Kitaen iti Panangisuro iti Wagas ti Mangisalakan, 33.)