Ni Jesus a Mangisursuro kadagiti Tao iti Igid ti Baybay, ni James Tissot

Pebrero 20–26

Mateo 6–7

“Insurona Ida a kas Maysa nga Addaan iti Turay”

Bayat ti panagsaganam a mangisuro, rugiam babaen ti panangisaganam iti bagim. Adalem ti Mateo 6–7, ken isuratmo dagiti naespirituan nga impresionmo. Daytoy ti mangtulongto kenka nga umawat iti paltiing maipapan ti no kasano ti kasayaatan a maipaay dagiti kasapulan ti klasem. Kalpasanna sukisoken daytoy a balabala para kadagiti kapanunotan iti panangisuro.

Yawis ti Panagbibinninglay

Mangawis kadagiti miembro ti klase a mangibinglay no ania kadagiti binatog iti Kaskasaba Iti Bantay ti mariknada a kasapulan unay ita nga agdama. Allukoyem dagiti miembro ti klase a mangnayon iti nalawag a pannakaammo ken pannakaawat iti tunggal maysa.

Isuro ti Doktrina

Mateo 6–7

No dumngeg ken agtignaytayo babaen dagiti pannursuro ti Apo, mabangonto ti biagtayo iti maysa a natibker a pundasion.

• Ania dagiti nalawag a pannursuro manipud iti Mateo 6–7 ti agbalinto a kangrunaan a pagimbagan kadagiti sursuruam? Ibilangmo nga isurat iti pisarra ti sumagmamano a reperensia manipud iti Mateo 6–7 a naglaon kadagitoy a pannursuro. Mabalin dagiti miembro ti klase ti pumili iti maysa kadagiti reperensia nga adalenda a siuulimek ket kalpasanna isuratda iti pisarra dagiti ania man a naespirituan a kinapudno a masursuroda. Kasano nga inaringan dagitoy a pannursuro ti biagtayo?

• Inggibus ti Mangisalakan ti kaskasabana iti maysa a pangngarig a mabalin a makatulong iti klasem a makaawat a nasaysayaat iti kinapateg ti panagbiag babaen dagiti pannursuro ti Mangisalakan (kitaen iti Mateo 7:24–27; kitaen met iti Helaman 5:12). Tapno mailadawan iti panunot daytoy a pangngarig, mabalin nga agtitinnulong dagiti miembro ti klase a sangkamaysada a mangbukel iti napigsa a pundasion nga usarenda dagiti bloke, tasa, wenno dadduma pay a material ket kalpasanna subokenda ti pigsa dagiti pundasionda. Nalabit a mabalinda pay a markaan dagiti material a pangbukelda kadagiti banag a maaramidda a mangyaplikar kadagiti pannursuro ti Mangisalakan. Kasano a makatulong ti panagaramid kadagitoy a banag a mangsarked kadagiti bagyo ti biag?

Mateo 6:5–13

Sinuruannatayo ti Mangisalakan no kasano ti agkararag.

• Ti panagadal iti Kararag ti Apo ti mabalin a makatulong kadagiti miembro ti klase a mangilasin no kasano a mapasayaatda dagiti bukodda a kararag babaen ti panangsurot iti pagwadan ti Apo. Mabalinmo nga awisen ida a mangisurat iti ragup ti balikas iti pisarra manipud iti Mateo 6:9–13 (wenno Lucas 11:1–4) a napateg kadakuada. Bayat ti panangutobtayo kadagiti balikas ti Mangisalakan, ania ti masursurotayo maipapan iti panagkararag? Mabalin a makaisuro kadagiti miembro ti klase a baliwan ti pannakaisao [paraphrase] ti sumagmamano a ragup ti balikas ti Mangisalakan a kas dagiti banag a mabalin nga isaoda iti bukodda a kararag. Kas pagarigan, “Itedmo kadakami ita ti taraonmi iti inaldaw” ket mabalin a baliwan ti pannakaisao kas iti “Tulongannak koma iti panangikarigatak a mangipaay iti kasapulan ti pamiliak.”

• Kalpasan a mabasa ti Mateo 6:5–13 kas maysa a klase, mabalin a paglilinnawagan dagiti saludsod kas iti: Kasano a napatibker ti panagkararag iti relasionmo iti Nailangitan nga Ama? Kasano a natulongannaka ti panagkararag a nangammo iti pagayatan ti Apo?

Mateo 7:7–11

Sungbatan ti Nailangitan nga Ama dagiti kararagtayo.

• Tapno makatulong kadagiti miembro ti klase a mangpapigsa iti pammatida a denggen ken sungbatanto ti Dios dagiti kararagda, mabalinmo nga isurat ti agdawat, agsapul, ken agtuktok iti pisarra. Kalpasanna mabalin dagiti miembro ti klase ti agsukisok kadagiti nasantuan a kasuratan kadagiti pagarigan dagiti tao a “nagdawat,” “nagsapul,” ken “nagtuktok” (kas pagarigan, kitaen iti 1 Nephi 11:1; Ether 2:18–3:6; Joseph Smith—Pakasaritaan 1:11–17). Ania ti masursurotayo manipud kadagitoy a pagarigan maipapan iti pananggun-od kadagiti sungbat dagiti kararagtayo?

• Masarakan ti sumagmamano a napapateg a konteksto para iti Mateo 7:7–11 iti Patarus ni Joseph Smith ti Mateo 7:12–17 (iti Bible appendix). Kadagitoy a bersikulo, nimannama dagiti disipulo ni Jesus ti sumagmamano a rason a mabalin nga ited dagiti tao iti saanda a panagsapul iti kinapudno manipud iti Nailangitan nga Ama. Mabalinmo a kiddawen kadagiti miembro ti klase a mangiladawan iti panunotda nga adda maysa a gayyemda nga agkedked nga agsapul iti pannarabay wenno bendision manipud iti Apo. Ania ti mabalin nga isao dagiti miembro ti klase a mangallukoy iti daytoy a gayyem? Kasano a mausarda dagiti balikas ti Mangisalakan iti Mateo 7:7–11?

Mateo 7:15–20

Mailasintayo dagiti pudno ken palso a propeta babaen dagiti bungada.

• Nalabit a nakitan dagiti miembro ti klasem dagiti palso a pilosopia ken dadduma pay a panangallilaw ti kabusor, iti man internet wenno manipud iti dadduma pay a pagtaudan. Mabalin pay a nangngegandan dagiti dadduma nga agdillaw kadagiti katulongan ti Apo. Kasano a matulongam a maawatanda no kasano ti mangilasin kadagiti palso a propeta ken pannursuro manipud kadagiti pudno a propeta ken pannursuro? Mabalinmo nga iparang ti sumagmamano a pedaso ti bunga ket saludsodem no ania ti mabalin nga ipagaruptayo maipapan kadagiti kayo a naggapuanda. Kasano a matulongannatayo daytoy nga ehersisio tapno maawatantayo ti Mateo 7:15–20? Mabalin pay nga aggigiddankayo a mangbasa iti sumagmamano a nabiit pay a mensahe manipud kadagiti sibibiag a propeta. Ania dagiti patauden a “bungbunga” wenno dagiti pagbanagan ti panangsurot iti balakadda?

  

  Maammuantayo dagiti pudno a propeta babaen dagiti bungada.

• TiMateo 7:15–20 ket makatulong a mangpatibker iti pammati dagiti miembro ti klase iti nadiosan a mision ni Propeta Joseph Smith. Ania dagiti bunga ti aramid nga impatungpal ni Joseph Smith? Para iti sumagmamano a kapanunotan, kitaen iti mensahe ni Elder Neil L. Andersen “Joseph Smith” (Liahona, Nob. 2014, 28–31). Kasano a mausartayo ti analohia ti Mangisalakan iti Mateo 7:15–20 tapno mangibinglay iti pammaneknek kadagiti gagayyem ken pamiliatayo maipapan ken ni Propeta Joseph?

Panangpadur-as iti Panangisurotayo

Saan nga agbuteng iti panagulimek. “Agkasapulan iti oras dagiti napipintas a saludsod tapno masungbatan. Agkasapulan dagitoy iti panagutob, panagsukisok, ken inspirasion. Ti oras a bubosem iti panagur-uray kadagiti sungbat iti maysa a saludsod ket mabalin a maysa a sagrado nga oras ti panagutob. Liklikam ti sulisog a mangigibus iti daytoy nga oras a nasapa unay babaen ti panangsungbatmo iti bukodmo a saludsod wenno iti ipapanmo iti sabali pay a topiko” (Panangisuro iti Wagas ti Mangisalakan, 31).