Ni Jesus a nakatakder iti let-ang

Iti Let-ang, ni Eva Koleva Timothy

Enero 30–Pebrero 5

Mateo 4; Lucas 4–5

“Adda Kaniak ti Espiritu ti Apo”

Bayat ti panangadalmo iti Mateo 4 ken Lucas 4–5, isuratmo dagiti naespirituan nga impresionmo. Daytoyto ti mangyawis iti inspirasion maipapan ti no kasano ti kasayaatan a maipaay dagiti kasapulan ti klasem. Mabalin met nga ibilangmo ti panangusar iti Umaykayo, Sumurot Kaniak—Para kadagiti Indibidual ken Pamilia kasta met daytoy a balabala tapno mangsarak kadagiti nayon pay a kapanunotan.

icon iti panagbibinninglay

Yawis ti Panagbibinninglay

Iraman daytoy a lawas ti panagbasa iti daytoy a palawag: “Pagsidsiddaawanda ti isursurona: ta ti saona adda pannakabalinna” (Lucas 4:32; kitaen met iti Marcos 1:22). Awisen dagiti miembro ti klase a mangiburay kadagiti bersikulo iti Mateo 4 ken Lucas 4–5 a nangtulong kadakuada a mangrikna iti bileg ti doktrina para kadagiti bagida.

icon iti panangisuro

Isuro ti Doktrina

Mateo 4:1–11; Lucas 4:1–13

Inikkannatayo ti Nailangitan nga Ama iti pannakabalin a mangkedked iti sulisog.

• Ti pakaammuan maipapan ti Mangisalakan a mangkedked ken ni Satanas ket makatulong kadagiti miembro ti klase a mangbigbig kadagiti wagas a panggandatan ni Satanas a mangsulisog kadakuada. Mabalin a pumili dagiti miembro ti klase iti maysa kadagiti pannulisog iti Mateo 4:1–11 wenno Lucas 4:1–13 ket mangpanunot maipapan kadagiti kabaruanan, mainaig a sulisog (mabalin a makatulong ti palawag iti “Additional Resources”). Apay a makatulong a mangammo a naipasango ti Mangisalakan kadagiti isu met la a pannulisog a sangsanguentayo ita? Apay a kabaelan ni Cristo ti nagkedked iti pannulisog? Para iti dadduma pay a pagarigan dagiti tao iti nasantuan a kasuratan a nagkedked ken ni Satanas, kitaen iti Genesis 39:7–20; 2 Nephi 4:16–35; ken Moises 1:10–22.

• Ania ti makatulong kadagiti miembro ti klase a mangkedked iti sulisog? Mabalinmo nga idawat kadakuada a mangrebyu iti Mateo 4:1–11 wenno Lucas 4:1–13 tapno masursuroda no kasano a nakatulong ti pannakaammo iti Mangisalakan kadagiti nasantuan a kasuratan iti panangsangona ken ni Satanas, kas inaramidna idi kinunana, “Adda a naisurat.” Ikkan dagiti miembro ti klase iti gundaway a mangsarak iti “Sulisog” iti Pangiwanwan iti Nasantuan a Kasuratan para kadagiti nasantuan a kasuratan a mabalin a mangpatibker ken mangpapigsa kadakuada no mariknada a masulisogda.

Lucas 4:16–32

Ni Jesucristo ti naipadto a Mesias.

• Tapno matulongan dagiti miembro ti klase a maawatanda a nasaysayaat ti pakaammuan iti Luke 4:16–32, mabalinmo nga ilawlawag a dagiti pangawag a Mesias ken Cristo ket agpada a kayatna a sawen “ti pinulotan.” Bayat ti panangbasa dagiti miembro ti klase iti Lucas 4:18–21, kiddawem kadakuada a mangpanunot maipapan iti no ania ti kaipapanan ti makuna a ni Jesus ti Cristo, ti Mesias, wenno ti Maysa a Napulotan. Mabalin a makatulong pay kadakuada iti panangbasa iti “Anointed One” iti Bible Dictionary. Kasano nga ipakdaar ni Jesus nga Isu ti Mesias ita? Mabalin a mangiburay dagiti miembro ti klase no kasano a naammuanda a ni Jesucristo ti Mangisalakanda.

• Mabalin nga adda sumagmamano a makatulong nga adalen a sursuruen babaen ti panangsukisok no apay a saan nga inawat dagiti tao ti Nazaret ni Jesus a kas naipadto a Mesias. Ania dagiti rason, kas pagarigan, a naisingasing iti Lucas 4:22–24? Mabalin nga idasig dagiti miembro ti klase dagitoy kadagiti kababalin dagiti balo iti Zarefat ken Naaman iti Daan a Tulag, dagiti tao a saan nga Israelita (kitaen iti Lucas 4:25–27). Mabalinmo a kasarita a nasapsapa ti sumagmamano a miembro ti klase ket kiddawem kadakuada nga umay a nakasagana a manggupgop iti tunggal maysa kadagitoy a pakaammuan (kitaen iti 1 Ar-ari 17:8–24; 2 Ar-ari 5:1–17; Lucas 4:16–30). Ania ti isuro kadatayo dagitoy a pakaammuan maipapan iti pammatitayo ken ni Jesucristo? Adda kadi makitatayo nga ania man a mensahe para kadatayo kadagiti balikas ti Mangisalakan kadagiti tao ti Nazaret?

Mateo 4:18–22; Lucas 5:1–11

Ti panangsurot ken Cristo ket panangtallikud iti pagayatantayo ken panangawat iti pagayatanna.

• No dadduma ti pangiturong ti Apo nga itedna kadatayo ket awan kaipapananna iti damo. Mabalin a sukisoken dagiti miembro ti klase ti Lucas 5:1–11, a mangsapsapul no ania ti indawat ti Mangisalakan ken ni Pedro ken no apay a nalabit a nagduadua ni Pedro kadagiti pammilinna. Kasano a maaringan daytoy a padas dagiti marikna ni Pedro maipapan iti Mangisalakan ken ti bagina? Mabalinmo nga awisen dagiti miembro ti klase a mangibinglay kadagiti padas a nangipakitaanda iti pammatida iti nadiosan a pannarabay, iti baet ti saan a kaadda ti naan-anay a pannakaawat. Ania ti bungana idi inaramatda ti pammatida?

  Ni Jesus a mangaw-awag kada Pedro ken Andres iti igid ti baybay

  “Umayka surotennak, ket pagbalinenkayto a dumadaklis kadagiti tao” (Mateo 4:19).

• Kas kadagiti agdakdaklis “pinanawanda amin” tapno sumurot ken ni Jesucristo (Lucas 5:11), adda dagiti banag a nasken a tallikudantayo tapno agbalintayo a disipulona. Ania ti masursurotayo manipud iti Mateo 4:18–22 maipapan kadagiti ugali ken pammati da Pedro, Andres, Santiago, ken Juan? Mabalin a makatulong no mangitugotka iti maysa nga iket iti klase. Kalpasanna awisen dagiti miembro ti klase a mangisurat kadagiti banag a kayatda a tallikudan wenno natallikudandan tapno sumurot ken ni Cristo ket ikabilda dagitoy iti iket. Ibilangmo ti panangawis iti sumagmamano a miembro ti klase a mangibinglay no kasano a nagbalbaliwen ti biagda gapu ta pinilida a tallikudan ti amin tapno sumurot iti Mangisalakan.

resources icon

Dagiti Nainayon a Resources

Dagiti kita ti sulisog.

Kalpasan ti panagsarita maipapan kadagiti sulisog a nakaipasanguan ti Mangisalakan iti let-ang, imbaga ni Presidente David O. McKay ti tallo a kategorya ti sulisog:

“(1) Sulisog iti pagganasan wenno pagtarigagayan;

“(2) Panangpatgan iti palangguad, pagustuan, wenno parammag;

“(3) Panagtarigagay kadagiti nailubongan a kinabaknang wenno bileg ken panangituray kadagiti daga wenno naindagaan a tagikua dagiti tao” (Teachings of Presidents of the Church: David O. McKay [2003], 82).

Panangpadur-as iti Panangisurotayo

Agyamanka kadagiti sursuruam. “Saan koma a nakaipamaysa unay ti pasnekmo iti adalen tapno malipatam ti agyaman kadagiti agad-adal kadagiti kontribusionda. Nasken a maammuanda a pagyamanam ti kinatallugodda a mangiburay kadagiti nalawag a pannakaawat ken pannakaammoda ken pammaneknekda” ((Panangisuro iti Wagas ti Mangisalakan, 33).