Pebrero 6–12

Juan 2–4

“Masapul Kadakayo ti Mayanak a Mabaliwan”

Ti panangbasa iti Juan 2–4 ket nasayaat a wagas a pangrugi iti panagsagana a mangisuro. Isuratmo dagiti ania man a naespirituan nga impresion a maawatmo, ken usarem daytoy a balabala a mangsarak kadagiti nayon a nalawag a pannakaammo ken pannakaawat ken dagiti kapanunotan iti panangisuro.

Yawis ti Panagbibinninglay

Isurat ti tallo a paulo iti pisarra: Juan 2, Juan 3, ken Juan 4. Mabalin a maikkan dagiti miembro ti klase iti sumagmamano a minuto a mangrebyu kadagitoy a kapitulo ket kalpasanna isuratda iti baba ti tunggal paulo ti maysa a bersikulo a nakatulong kadakuada a makaawat kadagiti doktrina ken pasamak iti dayta a kapitulo. Paglilinnawagan dagiti bersikulo nga insuratda.

Isuro ti Doktrina

Juan 2:1–11

Dagiti milagro ni Jesucristo “impakitada ti dayagna.”

• Iti daytoy a balabala ita a lawas iti Umaykayo, Sumurot Kaniak—Para kadagiti Indibidual ken Pamilia maisingasing ti panangbasa iti Juan 2:1–11 manipud iti pannirigan ti maysa a tao a nakaimatang iti panangbalbaliw ni Jesus ti danum a nagbalin nga arak. Nalabit a mabalin a managiburay dagiti miembro ti klase kadagiti nalawag a pannakaammo ken pannakaawat a nagun-odda manipud iti panangaramid iti daytoy. Ania ti masursurotayo maipapan iti Mangisalakan manipud kadagitoy a bersikulo? Kasano nga impakita daytoy a milagro ti dayag ti Dios? (kitaen iti bersikulo 11).

Juan 2:13–22

Masaluadantayo dagiti sagrado a lugar ken bambanag.

• Tapno matulongan dagiti miembro ti klase a makasursuro manipud iti pakaammuan a pinapanaw ni Jesus dagiti agsuksukat ti pirak iti templo, mabalinmo a kiddawen kadakuada a mangpanunot kadagiti dadduma pay a banag, malaksid dagiti templo, nga ibilbilang ti Apo a sagrado. Ania ti maitulongtayo tapno mataginayon ti kinasagrado dagitoy a sagrado a banag?

Juan 3:1–21

Masapul a mayanaktayo a mabaliwan tapno makastrek iti pagarian ti Dios.

• Kasano a mailawlawagtayo iti maysa a tao no ania ti kaipapanan ti mayanak a mabaliwan? Ibilangyo ti panangawis kadagiti miembro ti klase a mangsanay no kasano a masungbatanda daytoy a saludsod a kaduada ti tao a katugawda. Bayat ti panangaramidda, mabalinda a paglilinnawagan dagiti saludsod kas kadagitoy: Ania ti maadaltayo manipud kadagiti balikas ni Jesus iti Juan 3:3–7? Kasano a makatulong ti panagbabawi, panagbuniag, ken kumpirmasion tapno mayanaktayo a mabaliwan? Mabalin a makanayon iti daytoy a panaglilinnawag dagiti palawag iti “Dagiti Nainayon a Resources.”

• Mamati dagiti dadduma a tao a saan a pudno a makapagbalbaliw ti maysa a tao. Nupay kasta, ni Nicodemo ti maysa a pagwadan ti maysa a tao a nagbalbaliw kas bunga ti panangsurotna iti ebanghelio ni Jesucristo. Tapno matulongan dagiti miembro ti klase a makitada daytoy, mabalinmo nga awisen ida a mangsukisok iti Juan 3:1–2; Juan 7:45–52; ken Juan 19:38–40. Ania ti masursurotayo manipud kadagitoy a binatog maipapan kadagiti ugali ken kannawidan ni Nicodemo? Kasano a nakapagbalbaliw isuna idi agangay? Ania dagiti pagarigan a maibinglaytayo maipapan kadagiti tao a nagbalbaliw gapu iti ebanghelio?

Juan 4:5–34

Mangidiaya ni Jesucristo kadatayo iti “nabiag a danum” ken ti “taraon” iti panangaramid iti trabaho ti Dios.

• Kasapulan dagiti bagitayo ti taraon ken danum iti inaldaw. Intudo ni Jesus dagitoy sapasap a kasapulan idi insurona ti babai a taga Samaria ken dagiti disipulona (kitaen iti John 4:5–34). Tapno matulongan dagiti miembro ti klase a maawatanda no ania ti isursuro ti Mangisalakan, mabalinmo ti mangikabil kadagiti ladawan ti taraon ken danum iti pisarra ket awisem dagiti miembro ti klase nga isuratda iti baba ti tunggal ladawan dagiti kinapudno maipapan kadagiti naespirituan a taraon ken danum a kas insuro ni Jesus. Kasano a mapennek ti Mangisalakan ti naespirituan a panagbisin ken naespirituan a pannakauwawtayo ?

  

  Mangidiaya ni Jesucristo kadatayo iti nabiag a danum.

• Iti panangpanunot maipanggep iti panagdur-as ti pammaneknek ti babai a taga Samaria maipapan ken ni Jesucristo ket makatulong kadagiti miembro ti klase a mangutob no kasano a naammuanda nga Isu ti Mesias. Kas maysa a klase, sapulenyo dagiti balikas nga inusar ti babai a taga Samaria a nangibasar iti Mangisalakan iti Juan 4:6–30. Ania ti kayat a sawen dagitoy a balikas maipapan ti pannakaammona no asino ni Jesus? Kasano a dimmur-astayo kadagiti pammaneknektayo nga Isu ti Mangisalakantayo?

Dagiti Nainayon a Resources

Ania ti kayat a sawen ti mayanak a mabaliwan.

Insuro ni Elder David A. Bednar: Ti pannakapasurot wenno kumbersion … ket naindaklan, saan a bassit—maysa a naespirituan a pannakayanak manen ken kangrunaan a panagbalbaliw iti no ania ti marikna ken tarigagayan, no ania ti panunoten ken aramidentayo, ken no aniatayo. Kinapudnona, ti kaipapanan ti ebanghelio ni Jesucristo ket agkasapulan iti kangrunaan ken manayon a panagbalbaliw iti mismo a kinataotayo a naaramid a posible babaen iti panagpannuraytayo iti ‘pammateg, ken panangngaasi, ken parabur ti Nasantuan a Mesias’ (2 Nephi 2:8). No pilientayo ti sumurot iti Maestro, pilientayo ti agbalbaliw—naespirituan a mayanak manen” (“Ye Must Be Born Again,” Liahona, Mayo 2007,20).

Insuro ni Presidente Dallin H. Oaks: “Nayanaktayo a nabaliwan idi sumrektayo iti katulagan iti pannakinaig iti Mangisalakan babaen ti pannakayanak iti danum ken iti Espiritu ken babaen ti panangawattayo iti nagan ni Jesucristo. Mabalintayo a pabaruen dayta a pannakayanak manen iti tunggal Sabbath no makiranudtayo iti sakramento. Impatalged dagiti Santo iti Ud-udina nga Aldaw a dagiti nayanak a nabaliwan iti kastoy a wagas ket naespirituan nga annak a lallaki ken babbai ni Jesucristo (kitaen iti Mosiah 5:7; 15:9–13; 27: 25). Nupay kasta, tapno maamiris dagiti naisangrat a bendision daytoy a kasasaad ti pannakayanak a nabaliwan, nasken latta nga agtungpaltayo kadagiti katulagantayo ken agibtur agingga iti panungpalan” (“Have You Been Saved?,” Ensign, Mayo 1998, 56).

Panangpadur-as iti Panangisurotayo

Saan a nalalaing ti mannursuro ngem iti agad-adal. Napateg ti akemmo a kas maysa a mannursuro, ngem saan a sika laeng ti pagtaudan ti inspirasion iti klase. Tulongam dagiti miembro ti klase a masursuruan manipud iti Espiritu ken agbibinninglay iti tunggal maysa no ania ti nasursuroda.