Ni Juan Bautista a mangbumbuniag ken ni Jesus

Ti stained-glass a tawa iti Templo ti Nauvoo Illinois, ni Tom Holdman

Enero 23–29

Mateo 3; Marcos 1; Lucas 3

“Isaganayo ti Dalan ti Apo”

Bayat ti panangbasam ken panangutobmo iti Mateo 3; Marcos 1; ken Lucas 3, isuratmo dagiti impresion a maawatmo. Daytoyto ti mangawis iti Espiritu bayat ti panagsaganam a mangisuro. Mainayon kadagiti kapanunotan iti panangisuro iti daytoy a balabala, dagiti kapanunotan iti panagadal iti Umaykayo, Sumurot Kaniak—Para kadagiti Indibidual ken Pamilia ket mabalin a maibagay iti klaseyo.

icon iti panagbibinninglay

Yawis ti Panagbibinninglay

Tapno matulongan dagiti miembro ti klase a mangibinglay no kasano a parparaburan ti biagda ti panagsursuro manipud iti Baro a Tulag, mabalinmo nga isurat ti sumaganad a saludsod iti pisarra: Ania ti inaramidyo gapu iti nabasayo iti Baro a Tulag itoy a lawas? Awisem ti sumagmamano a miembro ti klase a mangibinglay kadagiti sungbatda.

icon iti panangisuro

Isuro ti Doktrina

Mateo 3:1–12; Lucas 3:2–18

Isagana dagiti disipulo ti bagbagida ken dagiti dadduma pay tapno umawat ken ni Jesucristo.

• Kasano nga agsaganatayo para iti isasarungkar ti maysa a napateg a sangaili? Makatulong kenka ti saludsod a kas iti daytoy a mangipakaammo iti panaglilinnawag maipapan ti no kasano nga insagana ni Juan Bautista dagiti tao nga umawat ken ni Jesucristo. Mabalinmo a bingayen ti klase iti tallo a grupo. Mabalin a basaen ti kada grupo ti Mateo 3:1–6; Mateo 3:7–12; wenno Lucas 3:10–15, a mangsapsapul no kasano nga insagana ni Juan Bautista dagiti tao nga umawat ken ni Jesucristo iti biagda. Pagsisinnublaten ti tunggal grupo iti panangibinglay no ania ti nasarakanda.

Ni Juan Bautista nga agikaskasaba

Ni Juan Bautista nga Agikaskasaba iti Let-ang, ni Robert T. Barrett

Lucas 3:2–14

Nasken a mangisangbaytayo iti “bungbunga a maikari iti panagbabawi.”

• Iti Lucas 3:8, insuro ni Juan Bautista dagiti tao a sakbay a mabalinda a mabuniagan, nasken nga ipakitada dagiti “bungbunga,” wenno pakakitaan, ti panagbabawida. Kasano a makatulongkayo kadagiti miembro ti klase a mangbigbig iti pakakitaan ti bukodda a panagbabawi? Mabalin a pagsukisokem ida iti Lucas 3:8–14 ken sapulenda no ania ti imbilang ni Juan a “bungbunga” ti panagbabawi. Mabalinda pay nga irebyu ti Moroni 6:1–3 ken Doktrina ken Katulagan 20:37. Mabalinmo ti mangidrowing iti kayo nga agbunga iti pisarra ket panaganam kadagiti miembro ti klase ti bunga iti kayo iti “bungbunga” ti panagbabawi a masarakanda. Mabalin a daytoy pay ti napintas a gundaway a pagsasaritaan no ania ti kayat a sawen ti sipupudno nga agbabawi.

Mateo 3:13–17

Surotentayo ni Jesucristo babaen iti panagbuniagtayo ken panangawat iti Espiritu Santo.

• Tapno marebyu ti estoria maipapan iti panagbuniag ni Jesucristo, padasem daytoy a kapanunotan: Kiddawem kadagiti miembro ti klase no kasano a mausarda ti Mateo 3:13–17 a mangisuro iti maysa a tao, kas iti ubing wenno maysa a tao a sabali ti pammatina, maipapan iti panagbuniag. (Mabalinda pay nga usaren ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.) Ania dagiti napateg nga elemento ti panagbuniag a yunay-unayda? Mabalinda ti mangsanay kadagiti kapanunotanda babaen ti panangisuro iti tunggal maysa.

• Tapno matulongan dagiti miembro ti klase a mangpanunot iti pateg ti panagbiag kadagiti katulaganda iti panagbuniag, mabalinmo nga awisen ti maysa a tao a mangbasa iti palawag ni Elder Bednar iti “Dagiti Nainayon a Resources.” Mabalin a paggugusto dagiti miembro ti klase ti mangibinglay kadagiti riknada maipapan iti bukodda a panagbuniag ken kadagiti katulaganda iti panagbuniag. Mabalinda pay a kantaen ti maysa a himno maipapan iti Mangisalakan, kas iti “Come, Follow Me” (Hymns, no. 116).

• Insuro ni Juan Bautista a mabuniagan ti Mangisalakan “iti Espiritu Santo, ken iti apuy” (Mateo 3:11). Mapasamak ti panagbuniag iti apuy no nakumpirmaan ken awatentayo ti sagut ti Espiritu Santo. Apay a nasken nga adda kadatayo ti sagut ti Espiritu Santo tapno dumur-as iti pagarian ti Dios? Ania ti epekto ti panagbuniag iti apuy ken iti Espiritu Santo kadatayo? (kitaen iti Alma 5:14). Ti video a “Baptism of the Holy Ghost” (ChurchofJesusChrist.org) ket makatulong iti daytoy a panaglilinnawag.

resources icon

Dagiti Nainayon a Resources

Dagiti katulagantayo iti panagbuniag.

Insuro ni Elder David A. Bednar: “Karaman ti katulagan ti panagbuniag dagiti tallo a napapateg a panagkumit: (1) tapno siaayat a mangawat iti bagbagitayo iti nagan ni Jesucristo, (2) tapno kanayon a laglagipen Isuna, ken (3) tapno tungpalen dagiti bilinna. Ti naikari a bendision gapu iti panangdayaw iti daytoy a katulagan ket ‘tapno kanayon nga agtaeng [kadatayo] ti Espirituna’ [Doktrina ken Katulagan 20:77]. Ngarud, ti panagbuniag ket napateg a panagsagana iti panangawat iti maiparbeng a gundaway para iti kanayon a panangkadkadua ti maikatlo a miembro ti Kinadios” (“Always Retain a Remission of Your Sins,” Liahona, Mayo 2016, 60).

Para iti pagarigan ti maysa nga ubing a lalaki a mangtungtungpal kadagiti katulaganna iti panagbuniag, kitaen ti estoria iti umuna a paset iti mensahe ni Sister Carole M. Stephens “We Have Great Reason to Rejoice” (Liahona, Nob. 2013, 115–17).

Panangpadur-as iti Panangisurotayo

Isuro ti kangrunaan a doktrina. Insuro ni Hyrum Smith, “Ikasabayo dagiti umuna a pagbatayan ti Ebanghelio—ikasaba kadakuada manen; matakuatanyonto nga iti inaldaw, maipalgakto kadakayo dagiti baro a kapanunotan ken nayon a lawag maipanggep kadakuada. Mabalinmo a padur-asen kadakuada ti pannakaawat a silalawag kadakuada. Kalpasanna kabaelamto ti mangaramid kadakuada a nalawlawag a maawatandaka dagiti sursuruam” (iti History, 1838–1856 [Manuscript History of the Church], volume E-1, 1994, josephsmithpapers.org).