Da Maria ken Elisabet

Enero 2–8

Mateo 1; Lucas 1

“Maaramid koma Kaniak kas iti Saom”

Sakbay a basaem ti ania man a nayon a material iti panagadal, basaen ken utobem ti Mateo 1 ken Lucas 1, ket isuratmo dagiti naespirituan nga impresionmo. Bay-an a tarabayennaka ti Espiritu iti panagsaganam. Kalpasanna agsukisok kadagiti kapanunotan iti daytoy a balabala ken iti Umaykayo, Sumurot Kaniak—Para kadagiti Indibidual ken Pamilia.

icon iti panagbibinninglay

Yawis ti Panagbibinninglay

Ti kangrunaan a panggep da Mateo, Lucas, ken dagiti dadduma pay a mannurat iti Ebanghelio ket mangipaneknek a ni Jesucristo ti Anak ti Dios. Mangted iti sumagmamano a minuto kadagiti miembro ti klase a mangrebyu iti Mateo 1 wenno Lucas 1 ken mangibinglay iti maysa a bersikulo a mangpatibker iti pammatida ken ni Jesucristo. Mangisingasing iti klase a bayat ti panagadalda iti Baro a Tulag iti daytoy a tawen, mabalin a mangidulinda iti listaan dagiti binatog a mangipaneknek a ni Jesucristo ti Anak ti Dios. Mabalinmo nga idulin daytoy a listaan kas maysa a klase.

icon iti panangisuro

Isuro ti Doktrina

Mateo 1:18–25; Lucas 1:5–80

Agtrabaho ti Nailangitan nga Ama babaen dagiti napudno nga annakna tapno maipatungpal dagiti panggepna.

• Ad-adda a maaddaan dagiti miembro ti klase kadagiti napateg a padas bayat ti panagadalda iti Baro a Tulag iti daytoy a tawen no makaalada kadagiti adalen manipud kadagiti padas dagiti tao a nabasada. Tapno matulongan ida a mangaramid iti daytoy, mabalinmo nga isurat ti nagnagan dagiti tao iti Mateo 1 ken Lucas 1 iti pisarra, kasta met dagiti reperensia iti nasantuan a kasuratan maipapan kadagitoy a tao, kas iti sumaganad:

  • Maria (Lucas 1:26–56)

  • Jose (Mateo 1:18–25)

  • Elisabet (Lucas 1:5–7, 24–25, 40–45, 57–60)

  • Zacarias (Lucas 1:5–23, 59–64)

  Ania ti masursurotayo manipud kadagitoy a pakaammuan a makatulong kadatayo ita?

• Tapno matulongan dagiti miembro ti klase nga agpanunot iti naun-uneg maipapan ken ni Maria ken ti akemna iti plano ti Ama, mabalinmo nga ipabuya dagiti video nga “An Angel Foretells Christ’s Birth to Mary” ken “Mary and Elisabeth Rejoice Together” (ChurchofJesusChrist.org). Wenno mabalin nga aggigiddankayo a mangbasa iti Lucas 1:26–38, 46–56, a mangsapsapul kadagiti banag nga insao ni Maria a mangiparangarang kadagiti banag maipapan iti kababalinna. Ania ti masursurotayo pay maipapan ken ni Maria?

Lucas 1:5–25

Umay dagiti bendision ti Dios iti bukodna a panawen.

• Mabalin nga adda dagiti tao iti klasem a, kas kada Elisabet ken Zacarias, agbibiag a sililinteg ngem saanda pay a nakaawat iti bendision a ninamnama. Ibilang ti panangawis iti klase tapno sukisoken ti Lucas 1:5–25, a mangsapsapul kadagiti adalen a masursuroda manipud kada Elisabet ken Zacarias maipapan iti panagur-uray iti Apo. Ania ti dadduma pay a pagarigan ti panagur-uray iti panawen ti Apo a mabalin nga ibinglay dagiti miembro ti klase manipud kadagiti bukodda a biag wenno manipud kadagiti pakaammuan iti nasantuan a kasuratan? Ania ti masursurotayo manipud kadagitoy a pagarigan? Mabalin a paglilinnawagan dagiti miembro ti klase ti palawag iti “Dagiti Nainayon a Resources.”

Lucas 1:26–38

“Iti Dios awanto ti di mabalin.”

• No dadduma mabalin a masdaaw dagiti miembro ti klase tapno—kas iti inaramid ni Maria—no kasano a maipatungpal ti plano ti Dios para kadakuada wenno mabalin a maipatungpal dagiti kari kadakuada. Tapno matulongan a maawatan dagiti miembro ti klase a babaen ti bileg ti Dios posible ti amin a banag, mabalinmo nga ipakita ti ladawan a Ti Pannakaiwaragawag: Agparang ni Anghel Gabriel ken ni Maria (Libro ti Arte ti Ebanghelio, num. 28) ket awisen ida nga aggigiddan a mangbasa iti Lucas 1:26–38. Ania ti masursurotayo maipapan ti panangparmek iti kasla imposible babaen ti panangadal kadagiti balikas ken tignay ni Maria? Kiddawem kadagiti miembro ti klase a mangibinglay kadagiti padas a nakatulongan ida ti Dios a mangipatungpal iti maysa a banag nga impagarupda nga imposible.

resources icon

Dagiti Nainayon a Resources 

Panangur-uray iti Apo.

Ti panangbigbig a kaadduan kadatayo ti agduadua no apay a nasken nga urayentayo dagiti bendision ti Dios, kinuna ni Elder Jeffrey R. Holland:

“Ti sungbat iti kasta a saludsod ket ‘Wen, maipaay ti Dios ti madagdagus a milagro ngem pagangayanna masursurotayo a dagiti oras ken panawen iti mortal a panagdaliasattayo ket Kukuana ken Isuna laeng ti mangiwanwan.’ … Ti pammati kaipapananna ti panagtalek iti Dios iti nasayaat a panawen ken dakes a panawen, uray pay no iraman dayta ti sumagmamano a panagitured agingga a makitatayo ti takiagna a naipalgak para kadatayo. …

“… Dagiti ‘aguray iti Apo maparaburanto iti pigsada [ken] agtayabdanto a kasla kadagiti agila; saandanto a mabbanog no agtarayda; … saandanto a kumapsut no magnada’ [Isaias 40:31; nainayon ti panangyunay-unay]. Ikarkararagko nga ‘iti agangay’—iti kabiitan wenno mabayag—dagidiay a parabur ket sumangbay iti tunggal maysa kadakayo nga agbirbirok iti pannakagin-awa iti leddaangyo ken pannakawayawaya iti ladingityo. Paneknekak ti ayat ti Dios ken ti Pannakaisubli ti nadayag nga ebangheliona, a sungbat iti tunggal pakaseknan a sangsanguentayo iti biag iti aniaman a wagas” (“Waiting on the Lord,” Liahona, Nob. 2020, 116–17).

Panangpadur-as iti Panangisurotayo

Allukoyem dagiti miembro ti klase nga agadal kadagiti nasantuan a kasuratan iti pagtaengan. Maysa a wagas a mayallukoymo ti panagadal iti pagtaengan ket mangted iti gundaway kadagiti miembro ti klase a mangibinglay kadagiti takuat ken nalawag a pannakaammo ken pannakaawat manipud iti bukod ken sangapamiliaan a panagadalda (kitaen iti Panangisuro iti Wagas ti Mangisalakan, 29).