ti babai a mangibingbinglay iti ebanghelio iti istasion ti tren

Enero 16–22

Juan 1

Nasarakanmi ti Mesias

Bayat ti panangbasa ken panangutobmo iti Juan 1, agkararag para iti naespirituan a pannarabay iti pagrebbengam a mangisuro iti pammaneknek ni Juan. Isuratmo dagiti impresion a maawatmo. Ti Umaykayo, Sumurot Kaniak—Para kadagiti Indibidual ken Pamilia ken dagiti kapanunotan iti daytoy a balabala ket makatulong kenka a mangparegta kadagiti tao iti klasem tapno maawatan ken mayaplikarda ti doktrina iti daytoy a kapitulo.

icon iti panagbibinninglay

Yawis ti Panagbibinninglay

Tapno matulongan dagiti miembro ti klase a mangibinglay no ania ti nasursuroda, mabalinmo a paisurat kadakuada dagiti saludsod, masao wenno nalawag a pannakammo ken pannakaawat [insights] manipud iti panagbasada kadagiti pedaso ti papel ken ikabil dagitoy iti maysa a pagikkan wenno container. Mangala dagiti pedaso ti papel manipud ti container a paglilinnawagan kas maysa a klase.

icon iti panangisuro

Isuro ti Doktrina

Juan 1:1–5

Kadua idin ni Jesucristo “ti Dios idi punganay.”

• Ania ti insuro ni Juan maipapan iti Cristo sakbay daytoy a biag? Apay a nasken a maammuan dagiti akem ni Cristo sakbay daytoy a biag? Mabalin a makatulong nga isurat dagitoy a saludsod iti pisarra ket pasapul kadagiti miembro ti klase dagiti sungbat iti Juan 1:1–5 (kitaen met iti Patarus ni Joseph Smith, Juan 1:1–5 [iti Bible appendix]; Moises 1:32–33; Topical Guide, “Jesus Christ, Antemortal Existence of”). Mabalin pay nga ibinglay dagiti miembro ti klase no ania ti naadalda maipapan kadagiti akem ni Cristo sakbay daytoy a biag “Ti Sibibiag a Cristo: Ti Pammaneknek Dagiti Apostol” (ChurchofJesusChrist.org).

• No kayatmo nga usaren dagitoy a bersikulo tapno pagsasaritaan maipapan dagiti pinarsua ti Apo, mabalinmo a basaen ti Juan 1:3 ket mangiparang kadagiti ladawan a mangipakita iti kinapintas ti daga. Mabalinmo nga ipabuya ti video nga “Our Home” (ChurchofJesusChrist.org). Awisen dagiti miembro ti klase a mangibinglay no kasano a tinulongan ida dagiti pinarsua ti Mangisalakan a mangrikna iti ayatna.

Juan 1:1–14

Ni Jesucristo ti Silaw.

• Ibilang ti panangkiddaw kadagiti miembro ti klase a mangsapul iti tunggal pagarigan ti balikas a silaw iti Juan 1:1–14. Apay a nasayaat a balikas ti silaw a mangiladawan ken ni Jesucristo? Mabalin nga ibinglay kadagiti miembro ti klase no kasano a mangipaay iti naespirituan a silaw ti Mangisalakan ken ti ebangheliona iti biagda. Kas paset daytoy a panaglilinnawag, mabalinmo nga awisen dagiti miembro ti klase a mangbasa ti ad-adu pay maipapan iti Silaw ni Cristo iti Doktrina ken Katulagan 84:45–46; 88:11–13, wenno mabalinmo nga itudo kadakuada ti “Silaw ni Cristo” iti Bible Dictionary. Kasano a maibinglaytayo ti silaw ti Mangisalakan kadagiti dadduma?

  lawag ti init babaen ti nabukel a batbato iti igid ti baybay

  Mangted iti naespirituan a silaw ti Mangisalakan ken ti ebangheliona.

• Tapno matulongam dagiti miembro ti klase a mangiladawan iti maisursuro maipanggep iti Mangisalakan iti Juan 1, mabalin a mangipakitaka kadagiti nadumaduma a ladawan (a pakairamanan ti ladawan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia) a mangipakita kadagiti aspekto ti biag ken nadiosan a mision ni Jesucristo. Mabalin a sukisoken dagiti miembro ti klase ti Juan 1:1–14, a mangsapsapul kadagiti balikas wenno ragup ti balikas a mabalin nga agserbi kas paulo para kadagiti ladawan.

Juan 1:35–51

Magun-odtayo ti bukodtayo a saksi maipapan ti Mangisalakan ket kalpasanna mangawis iti dadduma pay nga “umay ken mangkita.”

• Iti Juan 1, ti awis nga “umay ken mangkita” ket agparang a mamindua (kitaen iti bersikulo 39, 46). Mabalin nga addaantayo iti gundaway a mangkita iti Mangisalakan iti wagas nga inaramid da Andres ken Natanael, ngem masungbatantayo ti isu met laeng nga awis. Ania ti mabalin a kaipapanan ti “umay ken mangkita” iti panawentayo nga agdama?

• Mabalin a basaen dagiti miembro ti klase ti Juan 1:35–51 ken ibinglayda no ania ti naadalda manipud kadagitoy a bersikulo maipanggep iti panangawis kadagiti dadduma a mangammo maipapan ken ni Cristo (kitaen met iti “Dagiti Nainayon a Resources” wenno ti video nga “Inviting Others to ‘Come and See’” iti ChurchofJesusChrist.org). Mabalinda pay nga ibinglay no kasano a nabirokanda dagiti simple ken gagangay a wagas a panangawis kadagiti dadduma nga “umay ken mangkita.”

resources icon

Dagiti Nainayon a Resources

Mabalintayo nga awisen dagiti dadduma nga “umay ken mangkita.”

Insuro ni Elder Neil L. Andersen:

“Sinuruannatayo ti Mangisalakan no kasano nga ibinglay ti ebanghelio. Magustuak ti estoria maipapan ken ni Andres, a nagsaludsod, ‘Maestro, sadino kadi ti pagnaedam?’ [Juan 1:38]. Mabalin koma nga insungbat ni Jesus iti lugar a pagnaedanna. Ngem ketdi kinunana ken ni Andres, ‘Umayka ket kitaem’ [Juan 1:39]. Kayatko a panunoten a kunkuna ti Mangisalakan, ‘Umayka ket kitaem saan laeng a ti lugar a pagnaedak no di ketdi pay no kasano ti panagbiagko. Umayka ket kitaem no asinoak. Umayka ket riknaem ti Espiritu.’ Saanmi nga ammo ti amin a banag maipapan iti dayta nga aldaw, ngem ammomi nga idi nasarakan ni Andres ti kabsatna a ni Simon, impakdaarna, ‘Nasarakanmi … ni Cristo’ [Juan 1:41].

“Kadagiti mangipakita iti essem iti pannakisarsaritatayo, mabalintayo a suroten ti pagwadan ti Mangisalakan babaen ti panangawis kadakuada nga ‘umay ken mangkita.’ Addanto dagiti umawat iti awistayo, ket addanto met dagiti saan nga umawat. Ammotayo amin nga adda maysa a tao a naawis iti namin-adu a gundaway sakbay ti panangawatna iti awis nga ‘umay ken mangkita’” (“It’s a Miracle,” Liahona, Mayo 2013, 79).

Panangpadur-as iti Panangisurotayo

Tulongam dagiti agad-adal a mangyarig kadagiti nasantuan a kasuratan iti bagbagida. Ti isu met laeng nga awis nga inted ni Cristo kadagiti disipulona—nga umay ken mangkita—ket makatulong kadagiti sursuruam nga agtarigagay a mangsurot iti Mangisalakan. Allukoyem dagiti agad-adal a mangyaplikar kadagiti pagbatayan a masarakan kadagiti nasantuan a kasuratan iti bukodda a biag ken mangawis iti dadduma pay a mangaramid met iti kastoy. (Kitaen iti 1 Nephi 19:23; Panangisuro iti Wagas ti Mangisalakan, 21.)