tallo a lallaki nga agdaldaliasat babaen dagiti kamelio

Agdayawtayo Koma Kenkuana,ni Dana Mario Wood

Enero 9–15

Mateo 2; Lucas 2

Immaykami Agdaydayaw Kenkuana

Sakbay a basaem dagiti kapanunotan iti daytoy a balabala, adalem ti Mateo 2 ken Lucas 2, ket isuratmo dagiti naespirituan nga impresionmo. Matulongannakayonto daytoy nga umawat iti paltiing no kasano ti kasayaatan a maipaay dagiti kasapulan ti klasem.

icon iti panagbibinninglay

Yawis ti Panagbibinninglay

Kasano a maallukoymo dagiti miembro ti klase a mangibinglay kadagiti nalawag a pannakaammo ken pannakaawat ken padasda bayat ti panagadalda kadagitoy nasantuan a kasuratan a bukod ken kadua dagiti pamiliada? Nupay kasla saanda a pamiliar kadagiti pakaammuan iti pannakayanak ti Mangisalakan iti Mateo 2 ken Lucas 2, mabalin a kanayon a makagun-odda kadagiti baro a naespirituan a pannakaammo ken pannakaawat. Ibilang ti panangawis kadagiti sumagmamano a miembro ti klase a mangiburay iti mensahe a nasarakanda a nakaawis iti imatangda iti baro a wagas.

icon iti panangisuro

Isuro ti Doktrina

Mateo 2:1–12; Lucas 2:1–38

Adu dagiti saksi iti pannakayanak ni Cristo.

• Dagiti pakaammuan dagiti agdaydayaw iti Mateo 2:1–12 ken Lucas 2:1–38 ket makatulong kadagiti miembro ti klase a mangutob kadagiti wagas a pangipakitaanda iti ayatda para iti Mangisalakan. Irebyum ti tsart maipapan kadagiti saksi iti pannakaipasngay ni Cristo iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia. Mabalin nga addaan ti sumagmamano a tao iti klasem iti nalawag a pannakaammo ken pannakaawat [insights] nga ibinglay manipud iti daytoy nga aktibidad, wenno mabalinyo nga aramiden ti aktibidad kas maysa a klase. Apay a a napateg a naggapu dagitoy a saksi ni Cristo iti nadumaduma a kita ti biag? Kasano a masurottayo dagiti pagwadanda?

  pastor ken karnero

  Nagbalin dagiti pastor a sumagmamano kadagiti umuna a saksi ti pannakayanak ti Mangisalakan.

• Sakbay a nagdaydayaw dagitoy a saksi iti ubing a Cristo, nagsapulda Kenkuana. Tapno matulongan dagiti miembro ti klase a makasursuro manipud iti pagwadanda, mabalinmo nga isurat iti pisarra dagiti sumaganad a paulo: Dagiti Pastor, Ana, Simeon, ken Mamasirib. Kalpasanna mabalin a sukisoken dagiti miembro ti klase ti Mateo 2 ken Lucas 2 ken mangisurat iti pisarra no ania ti inaramid dagitoy a tao a nangbirok iti Mangisalakan. Ania ti isingasing dagitoy a pakaammuan maipapan iti sumagmamano kadagiti wagas a pakabirokantayo ken ni Cristo?

Mateo 2:13–23

Makaawat dagiti nagannak iti paltiing a mangsalaknib kadagiti pamiliada.

• Tapno mairugi ti panaglilinnawag maipapan no kasano ti panangtarabay ti Nailangitan nga Ama kada Jose ken Maria iti akemda a kas nagannak ti Mangisalakan, ibilang ti panangawis kadagiti miembro ti klase a mangisurat iti pisarra kadagiti sumagmamano a peggad a pakaipaspasanguantayo ita. Ania ti masursurotayo manipud iti Mateo 2:13–23 maipapan iti no kasano a masalaknibannatayo kadagitoy a peggad? Kasano a nakatulong kadatayo ti bukod a paltiing a masaluadantayo iti peggad dagiti pamiliatayo wenno ti dadduma pay a patpatgentayo? Ania a balakad ti naited dagiti propeta ken apostol tapno matulongandatayo a mangsarak iti naespirituan a kinatalged?

Lucas 2:40–52

Kas maysa nga agtutubo, impamaysa ni Jesus ti panagaramid iti pagayatan ti Amana.

• Ti estoria ni Jesus a mangisursuro iti templo idi 12 laeng ti tawenna ket mabalin a nangnangruna a nabileg kadagiti agtutubo nga agpampanunot maipapan iti mabalin a maitulongda iti aramid ti Dios. Mabalin a bingayem ti klase iti kada paris nga aggigiddan a mangbasa iti Lucas 2:40–52 (kitaen iti nalawag a pannakaammo ken pannakaawat manipud iti Patarus ni Joseph Smith a masarakan iti Lucas 2:46, footnote c). Maaddaan ti tunggal sangaparis iti sumagmamano a minuto a mangibinglay iti tunggal maysa no ania ti mangparegta kadakuada maipapan iti daytoy a pakaammuan. Ania dagiti gundaway nga adda kadatayo tapno maibinglay no ania ti ammotayo maipapan ti ebanghelio? Ania dagiti padas a maibinglaytayo?

• Ania ti isuro kadatayo ti Lucas 2:40–52 maipapan iti langa ni Jesus kas maysa nga agtutubo? Ti pagtuladan para iti bukod a panagdur-as a naisingasing iti Lucas 2:52 ket makaparegta iti panaglilinnawag maipapan iti no ania ti ar-aramidentayo tapno agbalin nga ad-adda pay a kas ken ni Cristo. Mabalinmo nga isingasing nga utoben dagiti miembro ti klase no kasano a dumurdur-asda iti sirib (mainaig iti kinasaririt), kinatayag (mainaig iti bagi), parabur iti Dios (mainaig iti kinaespirituan, ken parabur iti dadduma (mainaig iti pannakilangen). Mabalinda pay a mangituding kadagiti panggepda a tun-oyen iti maysa wenno dua kadagitoy a tay-ak. No kalikagumam ti mangituloy iti panaglilinnawag maipanggep iti panagbalin a kas ken ni Cristo kadagitoy a benneg, aglalo no agisursuroka kadagiti agtutubo, padasem nga usaren ti palawag iti “Dagiti Nainayon a Resources.”

resources icon

Dagiti Nainayon a Resources

Mangtultulong kadagiti ubbing ken agtutubo a dumakkel “iti kinasirib ken kinatayag, ken ti gundaway iti Dios ken iti tao.”

Inladawan ni Presidente Steven J. Lund ti programa ti Ubbing ken Agtutubo [Children and Youth], a naibatay a kas paset iti Lucas 2:52, iti kastoy a wagas:

“Ti Ubbing ken Agtutubo [Children and Youth] ket maysa a ramit a mangtulong iti tunggal ubing iti Primary ken agtutubo a dumakkel iti kinadisipulo ken maaddaan iti pannirigan a napno iti pammati a mangipakita iti langa ti kinaragsak. Mabalinda ti agsakbay ken agtarigagay kadagiti dalan ken pagilasinan iti dana ti katulagan, a pakabuniagan ken pakakumpirmaanda iti sagut ti Espiritu Santo ken iti mabiit a pannakikamengda kadagiti korum ken klase ti Young Women, a pakariknaanda iti rag-o ti panangtulong iti dadduma babaen ti panagsasaruno nga aramid ti panagserbi a kas ken Cristo. Agplanoda kadagiti panggepda a tun-oyen, dakkel ken bassit, a mangtedto iti timbeng iti biagda ken mangtulong kadakuada nga agbalin a kas ti Mangisalakan” (“Finding Joy in Christ,” Liahona, Nob. 2020, 36–37).

Panangpadur-as iti Panangisurotayo

Iramanmo dagiti agad-adal a saan a nagadal kadagiti nasantuan a kasuratan iti pagtaengan. Nupay sumagmamano a miembro ti klase ti mabalin a saan pay a nakabasa iti Mateo 2 ken Lucas 2 sakbay ti klase, mabalin latta a mangibinglayda kadagiti napapateg a nalawag a pannakaammo ken pannakaawat [insights]. Siguraduem nga amin a miembro ti klase ket addaan iti gundaway a makiraman ken makatulong iti panaglilinnawag.