Disiembre 26–Enero 1

Responsabletayo para iti Bukodtayo a Panagsursuro

Bayat ti panagbasam ken panagutobmo kadagiti binatog iti nasantuan a kasuratan iti daytoy a balabala, isuratmo dagiti naespirituan nga impresion a naawatmo. Daytoyto ti mangyawis iti Espiritu iti panagsaganam. Umaykayo, Sumurot Kaniak—Para kadagiti Indibidual ken Pamilia ken dagiti sumaganad a kapanunotan ket makatulong kenka a mangparegta kadagiti tao iti klasem a mangadal iti Baro a Tulag itoy a tawen.

Yawis ti Panagbibinninglay

Maysa kadagiti panggepmo kas maysa a mannursuro ket mangparegta kadagiti miembro ti klase nga agsursuro manipud kadagiti nasantuan a kasuratan iti bukodda ken kadua dagiti pamiliada. Ti pannakangngeg kadagiti padas dagiti dadduma ket mabalin a mangparegta kadakuada nga agsapsapul iti bukodda a padpadas. Iti kasta, iti rugi ti tunggal klase, kiddawem kadagiti miembro ti klase a mangibinglay kadagiti nasantuan a kasuratan manipud iti panagadalda a nangparegta wenno nakaawis iti imatangda.

Isuro ti Doktrina

Ti panagsursuro ket agkasapulan iti panagtignay iti pammati.

• Kasano a maparegtam dagiti miembro ti klasem nga umawat iti ak-aktibo nga akem iti panagsursuroda, imbes a panangted iti amin a pagrebbengan iti mannursuro? Ditoy ti maysa a kapanunotan. Ipasa ti maysa a nalukneng a banag iti maysa a miembro ti klase a kinasaritam a laklakaenna a sippawen daytoy. Usarem daytoy nga aktibidad a mangirugi iti panaglilinnawag maipapan kadagiti akem dagiti agad-adal ken mannursuro iti panagsursuro iti ebanghelio. Kas agad-adal, kasanotayo a “sippawen” no ania dagiti pannursuro kadagiti klasetayo? Mabalin a makatulong dagiti palawag a masarakan iti “Dagiti Nainayon a Resources” iti daytoy a panaglilinnawag.

• Addaan ti amin a miembro ti klase iti pagrebbengan a mangawis iti Espiritu iti klase. Tapno matulongan dagiti miembro ti klase a maawatanda daytoy, kiddawem kadakuada a mangbasa iti Alma 1:26 ken Doktrina ken Katulagan 50:13–22; 88:122–23 ken mangibinglay no ania ti maaramid dagiti mannursuro ken dagiti miembro ti klase tapno maawis ti Espiritu. Mabalin a makatulong nga isurat dagiti sungbatda iti pisarra iti babaen dagiti paulo kas kadagitoy: Ania ti maaramid ti mannursuro ken Ania ti maaramid dagiti agad-adal. Mabalin a mangaramid dagiti miembro ti klase iti maysa a poster a nakaisuratan dagiti sungbatda a mabalin a maiparang kadagiti sumaganad a lawas.

Nasken a maammuantayo ti kinapudno para iti bagbagitayo.

• Adu a binatog iti Baro a Tulag ti mangisuro kadagiti prinsipio a mabalin a mangiturong iti panagsapsapultayo iti kinapudno. Mairaman dagiti pagarigan iti Lucas 11:9–13; Juan 5:39; 7:14–17; ken 1 Taga Corinto 2:9–11. Mabalinmo nga awisen dagiti miembro ti klasem a mangbasa kadagitoy a binatog iti bukodda a panagadal tapno ibinglay no ania ti nasursuroda. Wenno mabalinyo a basaen dagitoy a binatog kas maysa a klase ket awisem dagiti miembro ti klase a mangiburay no kasano a nagun-odda dagiti pammaneknekda.

  

  Ti panagkagumaan a manggun-od iti adal babaen ti pammati ket makatulongto kadatayo a maaddaan iti bukodtayo a pammaneknek.

• Dagiti Aramid 17:10–12 ti mangiladawan kadagiti Santo a nagsukisok kadagiti nasantuan a kasuratan ken nakagun-od iti bukodda a saksi ti kinapudno. Tapno maparegta dagiti miembro ti klase a mangsurot iti pagwadanda, aggigiddan a basaenyo dagitoy a bersikulo ket awisem dagiti miembro ti klase a mangibinglay kadagiti binatog ti nasantuan a kasuratan a nangpapigsa iti pammaneknekda iti ebanghelio.

Kasano a maaramidtayo a napatpateg ti panagadal iti nasantuan a kasuratan?

• Ti panangpadur-as iti kaugalian a panagadal iti nasantuan a kasuratan ket mabalin a mapannubok para kadagiti miembro ti klase a makarikna nga awananda iti kasapulan a panawen, pannakaawat, wenno paglaingan. Ania ti maaramidmo a makatulong kadakuada nga agballigi? Tapno matulongan dagiti miembro ti klase a makagun-od iti panagtalek a mangadal kadagiti nasantuan a kasuratan, mabalinmo nga ibinglay ti impormasion manipud iti “Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan” iti Umaykayo, Sumurot Kaniak—Para kadagiti Indibidual ken Pamilia. Nalabit a mabalinmo wenno dagiti dadduma pay a miembro ti klase ti mangibinglay kadagiti kapadasanna iti panagusar kadagitoy sumagmamano a kapanunotan wenno dagiti sabali pay a napapateg a padas iti panagadal kadagiti nasantuan a kasuratan. Mabalinmo pay ti pumili iti maysa a kapitulo iti Baro a Tulag ket padasen ti panagadal iti daytoy kas maysa a klase nga usaren ti sumagmamano kadagitoy a kapanunotan.

Dagiti Nainayon a Resources

Pananggun-od kadagiti naespirituan a pannakaammo para iti bagbagitayo.

Insuro ni Propeta Joseph Smith: “Dagiti banag ti Dios ket napateg la unay; maadal laeng babaen iti panawen ken kapadasan, ken naannad a panangutob, ken napasnek a panagpanunot. Ti panunotmo, O, tao! no iturongmo ti maysa a kararua iti pannakaispal, no kasapulan nga agennatka kas kangato dagiti langit, ken no agbirokka ken utobem ti kasipngetan a yuyeng ken ti nalawa a sakup ti kinaagnanayon—masapul a kumamangka iti Dios. Anian a naim-imbag ken nadaydayaw dagiti kapanunotan ti Dios, ngem dagiti awan kaes-eskanna a pattapatta ti puso ti tao!” (Teachings of Presidents of the Church: Joseph Smith [2007], 267).

Inlawlawag ni Elder David A. Bednar: “No ti laeng ammoyo wenno ammok maipapan ken ni Jesucristo ken iti naisubli nga ebangheliona ket ti isursuro wenno ibagbaga dagiti tao kadatayo, ti ngarud pundasion ti pammaneknektayo Kenkuana ken ti nadayag nga aramid iti ud-udina nga aldaw ket nabangon iti rabaw ti kadaratan. Ditayo mabalin nga agsanggir laeng wenno bumulod iti lawag wenno pannakaawat iti ebanghelio manipud kadagiti sabali a tao—uray kadagiti ay-ayaten ken pagtalkantayo” (“Prepared to Obtain Every Needful Thing,” Liahona, Mayo 2019, 102).

Panangpadur-as iti Panangisurotayo

Agtalinaed a nakapokus iti doktrina. Siguraduen a dagiti paglilinnawagan iti klase ket agtalinaed a nakaipamaysa kadagiti nasantuan a kasuratan ken pannursuro dagiti propeta. Mabalinmo nga aramiden daytoy babaen ti panagdamag kadagiti saludsod kas kadagitoy: “Ania dagiti kinapudno ti ebanghelio a masursurotayo manipud kadagiti masao a nangngegantayo?” wenno “Makaibinglay kadi ti maysa a tao iti nasantuan a kasuratan a mainaig iti napaglilinnawagantayo?” (Kitaen iti Panangisuro iti Wagas ti Mangisalakan, 20–21.)