Maysa a Pagtuladan para iti Panangisuro

Tunggal balabala iti daytoy a resource ket mangsurot iti pagtuladan ti panangawis iti panagbibinninglay ken panangisuro iti doktrina. Iti adu a gundaway, bayat ti panangisurom, mabalin a pagsusukoten dagiti elemento daytoy a pagtuladan wenno aramiden iti sabali nga urnos. Kas pagarigan, ibilang a ti panangbinglay ket maysa a gundaway a mangisuro iti doktrina, ken ti panangisuro iti doktrina ket nasken a mangiraman kadagiti awis a mangibinglay. Palugodan a maaramid a gagangay daytoy a panagbalbaliw, a sursuroten dagiti parikna ti Espiritu tapno maipaay ti kasapulan dagiti sursuruam.

Yawis ti Panagbibinninglay

Kas paset ti tunggal klase, awisem dagiti miembro ti klase a mangibinglay kadagiti nalawag a pannakaammo ken pannakaawat [insights] ken padpadasda iti napalabas a lawas bayat ti panagadalda kadagiti nasantuan a kasuratan nga agmaymaysa ken sangapamiliaan ken panangyaplikar no ania ti nasursuroda. Tulongam a makita dagiti miembro ti klase a napateg ti bukodda a panagsursuro iti ruar ti klase. Umayto ti bukodda a pannakapasurot wenno kumbersion saan laeng a babaen ti panagsursuroda iti Domingo no di ketdi babaen pay kadagiti inaldaw a padasda. No mangngegan dagiti miembro ti klase dagiti padas ken pammaneknek ti tunggal maysa maipapan ken ni Jesucristo ken ti ebangheliona, nalabit nga ad-adda a maparegtada nga agkalikagum a maaddaan kadagiti kasta met la a bukodda a padas.

Saan nga amin ket makabasanto kadagiti kapitulo para iti tunggal adalen, ken uray pay dagiti dadduma a nakaaramid ket mabalin a makarikna a saanda a komportable a mangibinglay. Siguraduem a marikna ti amin a miembro ti klase a napategda a paset ti klase, adda man wenno awan ti maibinglayda.

Isuro ti Doktrina

Nasken nga sika ken dagiti miembro ti klasem ket agpokus ken ni Jesucristo ken iti doktrinana—dagiti agnanayon a kinapudno ti ebanghelio—a masarakan kadagiti naituding nga adalen a binatog iti nasantuan a kasuratan. Ti Umaykayo, Sumurot Kaniak—Para kadagiti Indibidual ken Pamilia ket makatulong kenka a nasaysayaat a maawatam ti doktrina nga isuromto. Bayat ti panangilawlawagmo iti doktrina manipud kadagiti nasantuan a kasuratan, ania dagiti bersikulo, adaw, padas, saludsod, ken nainayon a resources a mabalinmo nga ibinglay? Kasano a mausarmo dagitoy a resources a makatulong kadagiti miembro ti klase a mangtakuat ken mangawat kadagiti pagbatayan ti ebanghelio? Kasano a matulongam ida a mangbukel iti pammatida iti Nailangitan nga Ama ken ni Jesucristo?