Maysaka a Mannursuro iti Simbaan ni Jesucristo

Inawagannaka ti Dios a mangisuro kadagiti annakna iti wagas ti Mangisalakan. Nai-set apartka iti daytoy a takem [calling] babaen iti turay ti nasantuan a priesthoodna. Uray no awananka iti padas a kas mannursuro, no agbiagka a maikari, agkararag iti inaldaw, ken agadal kadagiti nasantuan a kasuratan, ikkannakanto ti Nailangitan nga Ama iti impluensia ken bileg ti Espiritu Santo nga agballigi (kitaen iti 2 Nephi 33:1).

Dagidiay naitalek kenka nga aywanam ket annak ti Nailangitan nga Ama, ken ammona no ania ti kasapulanda ken no kasano ti kasayaatan a makatulong kadakuada. Bayat ti nainkararagan a panangkalikagummo iti impluensia ti Espiritu Santo, tarabayennakanto iti panagsaganam ken bayat ti panangisursurom. Ipalgaknanto kenka no ania ti nasken nga isaom ken no ania ti nasken nga aramidem (kitaen iti 2 Nephi 32:5).

Ti napateg a panggep ti panangisuro ken panagsursuro iti ebanghelio ket mangpauneg iti pannakapasurot wenno kumbersion iti Nailangitan nga Ama ken ni Jesucristo. Ti panggepmo a tun-oyen kas maysa a mannursuro ket ti mangtulong kadagiti sursuruam nga aramidenda ti amin a kabaelanda nga agbalin a napasurot [converted]—maysa a panagkagumaan a maituloy iti labes ti oras ti panagklase. Awisem dagiti sursuruam a sireregta a makiraman iti panagsursuro maipapan ken ni Jesucristo ken agtignayda a mayannurot iti no ania ti masursuroda. Alllukoyem ida nga aramidenda ti bukod ken sangapamiliaan a panagadalda iti ruar ti klase a kangrunaan a pagtaudan ti panagsursuroda iti ebanghelio. Bayat ti panagtignayda a sipapammati babaen ti panagadalda nga agmaymaysa ken sangapamiliaan, maawisdanto ti Espiritu iti biagda, ken ti Espiritu ti mangisangbay iti pudno a pannakapasurot wenno kumbersion. Nasken a maiturong iti daytoy sagrado a panggep ti amin a banag nga aramidem kas maysa a mannursuro.

Isurom laeng ti doktrina ti naisubli nga ebanghelio ni Jesucristo kas masarakan kadagiti nasantuan a kasuratan ken balikas dagiti propeta iti ud-udina nga aldaw. Ti natarnaw a doktrina—agnanayon, saan nga agbalbaliw a kinapudno nga insuro ti Dios ken dagiti katulonganna—ket mangawis iti Espiritu ken addaan iti bileg a mangbalbaliw kadagiti biag.

Sagrado a panagtalek ti takem a mangisuro, ken gagangay a marikna ti talipupos sagpaminsan. Ngem laglagipem nga inawagannaka ti Nailangitan nga Amam, ken saannakanto a baybay-an iti kaano man. Daytoy ti aramid ti Apo, ken bayat ti panagserbim “iti amin a pusom, kabaelam, panunotmo ken pigsam” (Doktrina ken Katulagan 4:2), padakkelennanto dagiti kabaelam, sagutmo, ken talentom, ken ti serbisiom ti mangparaburto iti biag dagiti sursuruam.