Panangusar iti Umaykayo, Sumurot Kaniak—Para iti Sunday School

Panagsagana a Mangisuro iti Sunday School

Nasken a sentro iti panagsursuro iti ebanghelio ti bukod ken sangapamiliaan a panagadal iti pagtaengan. Pudno daytoy para kenka ken para kadagiti sursuruam. Bayat ti panagsaganam a mangisuro, rugiam babaen ti kaadda dagiti bukodmo a padas kadagiti nasantuan a kasuratan. Mapasamakto ti kapatgan a panagsaganam bayat ti panagtungpalmo iti ebanghelio, panagsukisokmo kadagiti nasantuan a kasuratan ken panagkalikagummo a manggun-od iti inspirasion ti Espiritu Santo.

Ti Umaykayo, Sumurot Kaniak—Para kadagiti Indibidual ken Pamilia ket napateg a paset ti agpada a bukod a panagadalmo ken panagsaganam a mangisuro. Makatulongto kenka daytoy a manggun-od iti naun-uneg a pannakaawat kadagiti pagbatayan iti doktrina a masarakan kadagiti nasantuan a kasuratan. Daytoyto pay ti mangted kabaelan kenka a mangparegta ken mangawis kadagiti miembro ti klase a mangusar iti Umaykayo, Sumurot Kaniak—Para kadagiti Indibidual ken Pamilia tapno mapasayaat ti bukod ken sangapamiliaan a panagadalda iti nasantuan a kasuratan (para iti tulong iti panangaramid iti daytoy, kitaen iti “Dagiti Kapanunotan para iti Panangyallukoy iti Bukod ken Sangapamiliaan a Panagadal” iti daytoy a resource). Bayat ti panangaramidmo, laglagipem nga agbalinka a managrikna kadagiti miembro ti klase a dagiti kasasaadda iti pamilia ket mabalin a saan a makasuporta iti masansan a sangapamiliaan a panagadal iti nasantuan a kasuratan ken home evening.

Bayat ti panagsaganam, umayto kenka dagiti kapanunotan ken impresion maipapan kadagiti tao a sursuruam. Umawatkanto kadagiti nalawag a pannakaammo ken pannakaawat maipapan iti no kasano a mangbendisionto iti biagda dagiti pagbatayan iti nasantuan a kasuratan. Maiwanwankanto a mangparegta kadakuada a mangtakuat kadagita a pagbatayan bayat ti panagsursuroda manipud kadagiti nasantuan a kasuratan para iti bagbagida.

Dagiti Kapanunotan iti Panangisuro

Bayat ti panagsaganam a mangisuro, mabalin a magun-odmo ti nayon a pammaregta babaen ti panagsukisok kadagiti balabala iti panangisuro iti daytoy a resource. Saanmo a panunoten dagitoy a kapanunotan a kas nagsasaruno nga addang a pangiturong no di ketdi kas singsingasing tapno mangpataud iti bukodmo nga inspirasion. Am-ammom dagiti miembro ti klasem, ket maam-ammomto ida a nasaysayaat kabayatan ti aggigiddan a panagsursuroyo iti klase. Am-ammo met ida ti Apo, ket Isunto ti mangparegta kenka kadagiti kasayaatan a wagas a pakatulongam kadagiti miembro ti klase a mapatibker ti panagsursuroda iti ebanghelio iti pagtaengan.

Adu ti dadduma pay a resources ti adda a magun-od nga usarem bayat ti panagsaganam, agraman kadagiti kapanunotan iti Umaykayo, Sumurot Kaniak—Para kadagiti Indibidual ken Pamilia ken dagiti magasin iti Simbaan. Para iti ad-adu pay nga impormasion maipapan kadagitoy ken dadduma pay a resources, kitaen iti benneg a napauluan iti “Dagiti Nainayon a Resources” iti daytoy a resource.

Dagiti Sumagmamano a Banag a Laglagipen

• Kasamayan ti panagsursuro iti ebanghelio no naisentro daytoy iti pagtaengan. Kas maysa a mannursuro, addaanka iti napateg a responsibilidad a mangsuporta, mangparegta, ken mangpadur-as iti panagsursuro dagiti miembro ti klase iti ebanghelio iti pagtaengan.

• Umun-unegto ti pannakapasurot wenno kumbersion dagiti miembro ti klase ken ni Jesucristo ken iti ebangheliona no maawatan ken yaplikarda ti pudno a doktrina. Allukoyem ida nga agsurat ken agtignay a mayannurot kadagiti impresion nga awatenda manipud iti Espiritu Santo.

• Ti panangisuro ket ad-adda pay ngem iti panag-lecture, ngem ad-adda pay daytoy ngem iti panangidaulo laeng iti maysa a panaglilinnawag. Paset ti akemmo ti mangyallukoy iti pannakiraman a mangitandudo ken maibatay kadagiti nasantuan a kasuratan. Nasken pay nga ibinglaymo dagiti naparegta a nalawag a pannakaammo ken pannakaawat [insights] a naawatmo bayat ti panagadalmo kadagiti nasantuan a kasuratan.

• Laglagipem nga addaan ti adu a miembro ti klase iti napapateg a padas iti panagadal iti pagtaengan kadagiti isu met laeng a nasantuan a kasuratan nga ilawlawagmonto iti klase. Mabalinmo ti mangsuporta iti panagadalda iti nasantuan a kasuratan babaen ti panangted kadakuada iti masansan a gundaway a mangibinglay no ania ti nasursuroda iti pagtaengan.

• Kayat ti Nailangitan nga Ama nga agballigika kas maysa a mannursuro. Impaayannaka iti adu a resources a makatulong kenka, a pakairamanan dagiti teacher council meeting. Kadagitoy a miting mabalinmo ti makiinnuman kadagiti dadduma pay a mannursuro maipapan kadagiti karit a pakaipasanguam. Mabalinmo pay nga ilawlawag ken usaren dagiti pagbatayan iti panangisuro a kas ken ni Cristo.

• Kasayaatan a makasursuro dagiti tao no addaanda kadagiti gundaway a mangisuro. No dadduma, ibilangmo ti panangpalugod kadagiti miembro ti klase, agraman dagiti agtutubo, tapno mangisuro iti maysa a paset ti adalen. Ibataymo daytoy a pangngeddeng kadagiti kasapulan ken kabaelan dagiti miembro ti klase. No awisem ti maysa a miembro ti klase a mangisuro, maaddaanka iti oras a mangtulong kenkuana nga agsagana a nasapsapa babaen ti panangusar kadagiti kapanunotan a masarakan iti daytoy a resource ken iti Umaykayo, Sumurot Kaniak—Para kadagiti Indibidual ken Pamilia. Laglagipem a kas naawagan a mannursuro, sika ti kangrunaan nga akinrebbeng no ania ti maisuro iti klase.

Iraman daytoy a resource dagiti balabala [outline] iti panangisuro para iti tunggal lawas ti tawen. Kadagiti Domingo no saan a maangay ti Sunday School gapu iti sapasap a komperensia, komperensia iti stake wenno ania man a dadduma pay a gapu, maallukoy nga ituloy dagiti miembro ti klase ti panagbasada iti Baro a Tulag iti pagtaengan a mayannurot iti iskediul a nabalabala iti Umaykayo, Sumurot Kaniak—Para kadagiti Indibidual ken Pamilia. No maangay ti Sunday School, mabalinmo a pilien no laktawan wenno pagtiponen dagiti balabala.