Iesu o loo aoao atu i luga o le mauga

O Iesu o loo Lauga Atu i luga o le Mauga, saunia e Gustave Doré

13–19 Fepuari.

Mataio 5; Luka 6

“Amuia outou”

Tusifaamaumau ou lagona uunai a o e suesue i le Mataio 5 ma le Luka 6. O le a oo mai faaaliga a o e saili e taulima manaoga o lau vasega.

aikona o le fefaasoaai

Valaaulia le Fefaasoaai

Na saunoa Peresitene Iosefa Filitia Samita o le Lauga i luga o le Mauga o “se [lauga] sili na folafolaina, e tusa ai ma lo tatou iloa” (Aoaoga a Peresitene o le Ekalesia: Iosefa Filitia Samita [2013], 234). Valaaulia tagata o le vasega e faasoa mai o latou lagona pe aisea e sao ai lenei mea.

aikona o le aoao atu

Aoao Atu le Aoaoga Faavae

Mataio 5:1–12

O le fiafia tumau e maua i le ola ai i le ala na aoao mai e Iesu Keriso.

• I le Lauga i luga o le Mauga, sa valaaulia ai e le Faaola Ona soo e toe mafaufau i le uiga o le ola i se olaga faamanuiaina—se olaga o le fiafia tumau. Ina ia amata se talanoaga e uiga i le fiafia tumau, e mafai ona e fai i le vasega e faasoa mai po o a mea e afua ai ona latou fiafia. E tusa ai ma le Mataio 5:1–12, o le a le mea na fetalai Iesu e “amuia” ai i se tagata pe fiafia ai e faavavau? E faapefea ona ese aoaoga a Iesu mai isi ala o loo taumafai tagata e sue ai le fiafia?

• Mafaufau e lisi i luga o le laupapa nisi o uiga po o amioga mai fuaiupu 3–12, e pei o le “loto mama” po o “e faatupuina le filemu.” Ona valaaulia lea o tagata o le vasega e fautua mai le faafeagai o faaupuga taitasi. O le a se mea ua tatou aoaoina e uiga i nei uiga auaumama e ala i le mafaufau i o latou faafeagai? Fai i le vasega e manatunatu loloto po o a mea e mafai ona latou suia ina ia mafai ona avea ma ituaiga o tagata o loo faamatala mai i fuaiupu nei. O le a le mea o faaopoopo mai e le 3 Nifae 12:3, 6 i lo tatou malamalama i le Mataio 5:3, 6?

Iesu Keriso o lo’o aoao atu Ona so’o

Na aoao mai e le Faaola le ala e ola fiafia ai ma avea e faapei o lo tatou Tama oi le Lagi.

Mataio 5:14-16

O soo o le Faaola e tatau ona avea ma malamalama o le lalolagi.

• O le a le uiga o le avea ma “malamalama o le lalolagi”? (fuaiupu 14). O le a le uiga o le nana o lo tatou lamepa “i lalo o le mea e fua ai saito,”(fuaiupu 15), ma aisea e ono faaosoosoina ai i tatou e faia lenei mea? O le saunoaga a Peresitene Bonnie H. Cordon i le “Punaoa Faaopoopo” ma le 3 Nifae 18:24 e mafai ona fesoasoani i tagata o le vasega ia sili atu ona faamoemoeina e uiga i le avea ma se malamalama i isi. E mafai foi ona latou talanoa e uiga i tagata o e na avea ma malamalama ia i latou ma taitai atu i latou ia Iesu Keriso. E mafai faapefea ona tatou faataitai i nei tagata?

Mataio 5:17–48

Na aoao mai e Iesu Keriso se tulafono e maualuga atu e mafai ona taitai atu ai i tatou i le atoatoaga.

• O nisi o tulaga o loo faamatala mai i le Mataio 5 sa patino i ona po o le Faaola, ae o mataupu faavae na Ia aoao atu e aofia ai tagata uma. Ina ia fesoasoani i le vasega e vaai i le faatatauga i o latou olaga, valaaulia i latou e filifili se tasi o nei fuaitau ma mafaufau i se faataitaiga faaonaponei e faapupula mai ai le mea sa aoao mai e le Faaola: fuaiupu 21–24; 27–30; 33–37; 38–39; 40–42; ma le 43–44. E mafai ona latou faia lenei mea taitoatasi pe i ni vaega ma faasoa mai i le vasega a latou faataitaiga.

• E mafai faapefea ona e fesoasoani i tagata o le vasega ia iloa o le uiga o le poloaiga a le Faaola ia “atoatoa” (Mataio 5:48) pei ona faamalamalama mai e Peresitene Russell M. Nelson, ia “atoa lelei” po o le “mae’a”? (“Perfection Pending,” Ensign, Nov. 1995, 86–88). E mafai ona e ‘oti’oti se ata o Iesu i se paso, ma valaaulia le vasega e tusi i tua o fasi paso taitasi se aoaoga mai le Mataio 5 e musuia i latou e faaaoga i o latou olaga. Tuu i latou e galulue faatasi e faamae’a le paso. E fesoasoani faapefea le Togiola a Iesu Keriso ia i tatou ia “atoa lelei” pe “mae’a”? (tagai Bible Dictionary, “Grace”). O le a se mea ua faaopoopo mai e upu a Peresitene Joy D. Jones i le “Punaoa Faaopoopo” i lo tatou malamalama i lenei faagasologa?

aikona o punaoa

Punaoa Faaopoopo

Avea o se malamalama.

Na aoao mai Peresitene Bonnie H. Cordon: “O le valaaulia a le Alii e faasusulu atu lo tatou sulu e lē na o le talotalo solo o lo tatou sulu ma faia ia atili malamalama ai le lalolagi. E faatatau i le faataulai atu o lo tatou sulu ina ia mafai ai e isi ona iloa atu le ala ia Keriso. O le faapotopotoina o Isaraelu i lenei itu o le veli—fesoasoani i isi ia vaai i le laasaga e sosoo ai i luma i le osia ma le tausia o feagaiga paia ma le Atua” (“Ina ia Latou Vaai,” Liahona, Me 2020, 79).

Sailia o le atoatoa.

Na aoao mai Peresitene Joy D. Jones:

“E fiafia le Alii i taumafaiga, ma o taumafaiga e aumaia ai taui. Tatou te faaaoao pea. O loo tatou alualu pea i luma pe a tatou taumafai e mulimuli i le Alii. E le o faamoemoe mai o Ia ia atoatoa i le asō. Tatou te fe’a’ei pea i la tatou lava Mauga o Sinai. E pei o taimi ua mavae, e manaomia e la tatou faigamalaga se taumafaiga, galue malosi, ma le suesue, peitai o lo tatou tautino atu ia alualu i luma e aumai ai ni taui e faavavau. …

“Sei o tatou tautino atu ma le lototoa lo tatou tuuto i lo Tama Faalelagi ma lo tatou Faaola, ‛ma le faatuatua lē mafaagaeetia ia te ia, ma le faalagolago atoa i galuega a ia o lē ua malosi aoao e laveai’ [2 Nifae 31:19]. Ia tatou faaauau pea ma le fiafia lenei malaga agai atu i lo tatou gafatia aupito maualuga faaleagaga” (“O Se Valaauga e Faapitoa lava le Tamalii,” Liahona, Me 2020, 16–17).

Faaleleia o Lo Tatou Aoao Atu

Faateleina le auai o tagata o le vasega. E tele gaoioiga e mafai ona faia o se vasega, i vaega toalaiti, i paga, po o se talatalanoaga. . Faaaoga metotia eseese e mafai ai e tagata ona auai, o e le ono maua se avanoa. (Tagai Aoao Atu i le Ala a le Faaola,33.)