Iesu o loo aoao atu i le matafaga

Iesu o Loo Aoao Atu Tagata i le Matafaga, saunia e James Tissot.

20–26 Fepuari

Mataio 6–7

“Ua Ia Aoao Atu ia te i Latou e Pei o Se ua i ai le Pule”

A o e tapenapena e aoao atu, amata i le tapenaina o oe lava. Suesue le Mataio 6–7, ma tusifaamaumau ou lagona uunai. O le a fesoasoani lea e te maua ai faaaliga i le auala e sili ona e taulima ai manaoga o lau vasega. Ona saili lea i lenei otootoga mo manatu faafaiaoga.

aikona o le fefaasoaai

Valaaulia le Fefaasoaai

Valaaulia tagata o le vasega e faasoa mai pe o fea fuaitau i le Lauga i luga o le Mauga latou te manatu e sili ona manaomia i aso nei. Fautuaina tagata o le vasega e faaopoopo atu i manatu o isi.

aikona o le aoao atu

Aoao Atu le Aoaoga Faavae

Mataio 6–7

Afai tatou te faalogo ma faatino aoaoga a le Alii, o le a fauina o tatou olaga i luga o se faavae mausali.

• O a aoaoga patino mai le Mataio 6–7 o le a sili ona aoga ia i latou e te aoaoina? Mafaufau e tusi i luga o le laupapa ni mau mai le Mataio 6–7 o loo i ai i nei aoaoga. E mafai e le vasega ona filifili se tasi o mau e suesue le leoa i ai ona tusi lea i le laupapa soo se upumoni faaleagaga latou te aoaoaina. Pe o faapefea ona tosina o tatou olaga i nei aoaoga?

• Na faaiu e le Faaola Lana lauga i se faataoto e ono fesoasoani i lau vasega e malamalama atili lelei ai i le taua o le ola i aoaoga a le Faaola (tagai Mataio 7:24–27; tagai foi Helamana 5:12) Ina ia vaai faalemafaufau i lenei faataoto, e mafai e tagata o le vasega ona galulue faatasi e fau se faavae malosi e faaaoga ai poloka, ipu inu, po o nisi ‘anomea ona tofotofo lea o le malosi o a latou faavae. Atonu e mafai ona latou faaigoaina a latou ‘anomea i mea latou te mafai ona fai e faaaoga ai aoaoga a le Faaola. E mafai faapefea i le faia o nei mea ona fesoasoani tatou te tatalia ai afā o le olaga?

Mataio 6:5–13

Sa aoaoina i tatou e le Faaola i le ala e tatalo ai.

• O le suesue i le Tatalo a le Alii e mafai ona fesoasoani i tagata o le vasega e faailoa ai pe mafai faapefea ona latou faaleleia a latou lava tatalo e ala i le mulimuli i le faataitaiga a le Faaola. E mafai ona e valaaulia i latou e tusi i luga o le laupapa fasifuaitau mai le Mataio 6:9–13 (po o le Luka 11:1–4) lea e tulaga ese ia i latou. A o tatou mafaufau loloto i upu a le Faaola, o le a se mea ua tatou aoaoina e uiga i le tatalo? E ono aoga i tagata o le vasega ona faaupu nisi o fasifuaitau a le Faaola e pei o mea latou te faiatu ai i a latou lava tatalo. Mo se faataiaiga, “Ia e foai mai i le aso nei a matou meaai e tatau ma le aso” e mafai ona faaupu faapea “Faamolemole fesoasoani mai i a’u taumafaiga e saunia mea mo lo’u aiga.”

• A uma ona faitau le Mataio 6:5–13 o se vasega, e mafai ona outou talanoaina fesili e pei o nei: Ua faapefea ona faamalosia e le tatalo lou sootaga ma le Tama Faalelagi? Na faapefea ona fesoasoani le tatalo ia te oe e iloa ai le finagalo o le Atua?

Mataio 7:7–11

E tali mai le Tama Faalelagi i tatalo.

• Ina ia fesoasoani i tagata o le vasega ia faamalolosia lo latou faatuatua o le a faafofogaina e le Atua ma tali mai ia latou tatalo, e mafai ona e tusia le ole atu, saili, ma le tu’itu’i atu i luga o le laupapa. Ona valaaulia lea o le vasega e sailiili i tusitusiga paia mo faataitaiga o tagata o e sa “ole atu,” “saili,” ma “tu’itu’i atu” (mo faataitaiga, tagai 1 Nifae 11:1; Eteru 2:18–3:6; Talafaasolopito—Iosefa Samita 1:11–17). O a ni mea ua tatou aoao mai nei faataitaiga e uiga i le mauaina o tali i a tatou tatalo?

• O nisi o anotusi taua mo le Mataio 7:7–11 e mafai ona maua i le Faaliliuga a Iosefa Samita o le Mataio 7:12–17 (i le faaopoopoga i le Tusi Paia). I fuaiupu nei, na fuafua ai e soo o Iesu ni mafuaaga e ono aumai e tagata mo le le sailia o le upumoni mai le Tama Faalelagi. E mafai ona e fai i tagata o le vasega e mafaufau faapea e i ai se latou uo e musu e saili atu mo se taitaiga po o faamanuiaga mai le Alii. O a ni mea e mafai e le vasega ona fai atu e fautuaina ai lenei uo? Faamata e faapefea ona latou faaaogaina upu a le Faaola i le Mataio 7:7–11?

Mataio 7:15–20

E mafai ona tatou iloa ia perofeta pepelo i o latou fua.

• Atonu ua iloa e lau vasega ni filosofia pepelo ma isi mea taufaasese a le tiapolo, pe o luga o le upega tafailagi pe mai isi faapogai. Atonu foi ua latou faalogo i isi o faitio i auauna a le Alii. E mafai faapefea ona e fesoasoani ia latou malamalama pe faapefea ona iloatino perofeta pepelo ma aoaoga mai perofeta moni? E mafai ona e faaali atu ni nai fasi fualaau aina ma fesili pe o a ni o tatou manatu i laau na o mai ai. E faapefea ona fesoasoani lenei mea na fai tatou te malamalama ai i le Mataio 7:15–20? E mafai foi ona outou faitau faatasi ni savali talu ai nei mai perofeta soifua. O a “fua” po o taunuuga e maua mai i le mulimuli i a latou fautuaga?

  fua

  E mafai ona tatou iloa perofeta moni i o latou fua.

• O leMataio 7:15–20 e mafai ona fesoasoani e fausia ai le faatuatua o tagata o le vasega i le misiona paia a le Perofeta o Iosefa Samita. O a fua o galuega na ausiaina e Iosefa Samita? Mo nisi manatu, tagai i le savali a Elder Neil L. Andersen “Iosefa Samita” (Liahona, Nov. 2014, 28–31). E mafai faapefea ona tatou faaaogaina le talafaatusa a le Faaola i le Mataio 7:15–20 e tuu atu ai le molimau i a tatou uo ma aiga e uiga i le Perofeta o Iosefa?

Faaleleia o Lo Tatou Aoao Atu

Aua le fefe i le leai o se tali. “O fesili lelei e umi se taimi e tali ai. E manaomia ai le mafaufau loloto, suesuega, ma musumusuga. O le taimi e te faaaluina e faatalitali ai mo ni tali i se fesili e mafai ona avea ma se taimi paia o le mafaufau loloto. Aloese mai le faaosoosoga e vave faamaea lea taimi e ala i le taliina o la oe lava fesili po o le se’e atu i se isi mataupu” (Aoao Atu i le Ala a le Faaola,31).