Iesu o loo faatuina le tagata mai le moega

27 Fepuari–5 Mati.

Mataio 8; Mareko 2–4; Luka 7

“Ua E Ola i Lou Faatuatua”

E amata lau tapenaga e aoao atu a o e suesue ma le agaga tatalo i le Mataio 8; Mareko 2–4; ma le Luka 7. E mafai e leSau, Mulimuli Mai ia te Au—Mo Tagata Taitoatasi ma Aiga ona faaleleia lau suesuega ma uunaia ai manatu faafaiaoga e faaopoopo i mea o tuu atu i i.

aikona o le fefaasoaai

Valaaulia le Fefaasoaai

Atonu na maua e tagata o lau vasega ni malamalamaaga mamana i a latou suesuega faaletagata lava ia o nei mataupu (tagai i le lisi o faamalologa a le Faaola i le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga). Mafaufau e valaaulia tagata o le vasega e faasoa atu o latou malamalamaaga i se paga po o le vasega atoa.

aikona o le aoao atu

Aoao Atu le Aoaoga Faavae

Mataio 8; Mareko 2; Luka 7

E tutupu vavega e tusa ai ma le finagalo o le Atua ma lo tatou faatuatua ia Iesu Keriso.

• E mafai faapefea ona e faaaogaina tala o vavega a le Faaola e fesoasoani ai i tagata o le vasega e faateleina lo latou faatuatua ia te Ia? E mafai ona e fai atu ia i latou e lisi i luga o le laupapa nisi o faamalologa faavavega mai le Mataio 8; Mareko 2; ma le Luka 7. E mafai e tagata o le vasega ona talanoaina pe na faapefea e tagata o e na faamaloloina ona faaalia lo latou faatuatua ia Keriso. O a mea o aoao mai e nei tala e uiga i le faatuatua ma vavega? E mafai e tagata o le vasega ona faasoa mai ni upumoni faaopoopo e uiga i le faatuatua ma vavega mai le Mamona 9:15–21; Eteru 12:12–16; Moronae 7:27–37; ma le Mataupu Faavae ma Feagaiga 35:8 (tagai foi Bible Dictionary, “Miracles”). O anafea na tatou vaai ai i vavega ao tatou faaaogaina le faatuatua ia Iesu Keriso?

• O le tala i le vavega i le Mareko 2:1–12 o loo aoao mai ai, faatasi ai ma isi mea, le taua o le galulue faatasi i le lotogatasi e fesoasoani ai i le Faaola i le auauna atu ia i latou e i ai manaoga faaleagaga pe faaletino. Mafaufau e valaaulia tagata o le vasega e toefaamanatu le tala mai tusitusiga paia ma faasoa mai ni malamalamaaga faaopoopo mai le savali a Elder Chi Hong (Sam) Wong “Laveai i le Lotogatasi” (Liahona, Nov. 2014, 14–16; tagai foi “Punaoa Faaopoopo”). O le a se mea e mafai ona tatou aoao mai le Mareko 2:112 e uiga i le taua o le galulue faatasi e laveai i latou e manaomia le fesoasoani? (tagai foi Mareko 3:24–25).

Mareko 4:35–41

Ua ia Iesu Keriso le mana e aumaia ai le filemu i le lotolotoi o afā o le olaga.

• Atonu ua e silafia ni nai luitau o loo feagai ma tagata o lau vasega. Talu ai e tofu uma i tatou ma ni tofotofoga i ni taimi i o tatou olaga, o le toe faamanatu o le tala i le Mareko 4:35–41 e mafai ona fausia ai le faatuatua o le vasega e mafai e le Faaola ona aumaia ia i latou le filemu. Tuu atu ia tofu le tagata ma se fasipepa, ma fai i ai e tusi i le isi itu se tofotofoga sa latou feagai. I le isi itu, fai i ai e tusi ai se mea mai le Mareko 4:35–41 lea e musuia ai i latou e liliu atu i le Faaola i le taimi o o latou tofotofoga. Fautuaina le vasega e faasoa mai mea sa latou tusia, pe afai latou te maua lagona lelei e fai ai.

• O le viiga “Matai e, Ua Sou le Vasa” (Viiga, nu. 58, o loo faavae i le tala o i le Mareko 4:35–41. Atonu e maua e tagata o le vasega ni upu o le viiga e fesootai ma fasifuaitau i mau. E mafai foi ona e faaali atu se ata o loo faaalia ai le vaaiga (tagai Tusi Ata o le Talalelei,, nu. 40) ma talanoaina pe o le fea le taimi ua faaalia mai e le tusiata. O a nisi auala e mafai ona e fesoasoani ai i tagata o le vasega ia malamalama i le uiga ma le mana o lenei vavega?

Iesu i le vaa o loo faatoafilemuina le matagi

Mai le Fefe i le Faatuatua, saunia e Howard Lyon

Luka 7:36–50

Ao faamagaloina i tatou i a tatou agasala, e faalolotoina lo tatou alofa mo le Faaola.

• O le a se mea e mafai ona tatou aoaoina mai le faataitaiga a le fafine ma aoaoga a le Faaola i le Luka 7:36–50 a o tatou sailia le faamagaloga mo a tatou lava agasala? E faapefea ona fesoasoani le salamo ia i tatou e faalatalata atili atu ai ia Iesu Keriso? E faapefea e lenei tala ona aafia ai le ala tatou te vaai atu ai ia i latou o e ua agasala?

aikona o punaoa

Punaoa Faaopoopo

“Ina ua silafia e Iesu lo latou faatuatua.”

Na faasoa mai e Elder Chi Hong (Sam) Wong le malamalamaaga lenei e uiga i le tala o i le Mareko 2:1–12:

“Sei ou faasoa atu ia te outou se tasi o oa natia o loo maua i lenei tala faaletusi paia. O loo i ai i le fuaiupu 5: ‘Ina ua silafia e Iesu lo latou faatuatua’ (ua faaopoopo le faamamafa). Ou te lei iloaina lenei mea i le taimi ua mavae—lo latou faatuatua. …

“O ai na tagata na ta’ua e Iesu? E mafai ona aofia ai le toafa o e na fataina le tagata supa, o le tagata supa lava ia, tagata o e na tatalo mo ia, ma i latou o e na i ai iina na faalogologo i le talaiga a Iesu ma vivii lemu i o latou loto mo le vavega o le a vave ona oo mai. E mafai foi ona aofia ai se toalua, se matua, se atalii po o se afafine, se faifeautalai, se peresitene o le korama, se peresitene o le Aualofa, se epikopo, ma se uo o nofo mamao. E mafai ona tatou fesoasoani uma le tasi ma le isi. E tatau ona tatou punouai ma le naunautai e le aunoa i le saili e laveai mai i latou e manaomia” (“Laveai i le Lotogatasi,” Liahona, Nov. 2014, 16).

Faaleleia o Lo Tatou Aoao Atu

Tuu atu soo le molimau. O lau molimau faatauvaa, ma faamaoni o upumoni faaleagaga e mafai ona i ai se uunaiga mamana i luga o i latou e te aoaoina. E le tau teuteuina ma faaumi lau molimau. E mafai, mo se faataitaiga, o se molimau faigofie o le vavega o le i ai o le talalelei i lou olaga.