saito ua saunia e selesele

20–26 Mati

Mataio 13; Luka 8;13

“O Le Ua i ai Taliga e Faalogo ai, ina Faalogo Mai ia o Ia”

A o e faitau, mafaufau i fesili atonu o i ai a le vasega a o latou taumafai e malamalama i savali a faataoto. O le a se mea e ono faigata ona malamalama ai? E mafai faapefea e au suesuega ona saunia oe e tali atu i a latou fesili?

aikona o le fefaasoaai

Valaaulia le Fefaasoaai

Toefaamanatu ma le vasega “Manatu e Faaleleia ai Au Suesuega Faaletagata Lava Ia o Tusitusiga Paia” i le Sau, Mulimuli Mai ia te Au—Mo Tagata Taitoatasi ma Aiga. Valaaulia tagata o le vasega e fefaasoai metotia na latou faaaogaina e suesue ai le Mataio 13 ma le Luka 8; 13.

aikona o le aoao atu

Aoao Atu le Aoaoga Faavae

Mataio 13:1–23

E tatau ona saunia o tatou loto e talia le upu a le Atua.

• E mafai faapefea ona e faaaogaina le faataoto i le lulu saito e musuia ai tagata o lau vasega e saunia o latou loto e talia le upu a le Atua? E mafai ona e tusia le Soo ma le Isi i luga o le laupapa. Valaaulia le vasega e faitau le Mataio 13:10–17 ma vaavaai pe faapefea ona faamatala e le Faaola ia eseesega o Ona soo ma isi o e sa faalogo i Ana faataoto. Ona fai lea i tagata o le vasega e sailiili ia fuaiupu 18–23, ma vaavaai mo mea atonu na afua ai ona “le lagona” e o tatou taliga pe moeiini o tatou mata i mea faaleagaga. O le a le faatonuga o tatou maua i o tatou aso mai le Atua ma Ana auauna? E mafai faapefea ona tatou atiina ae le “eleele lelei” e maua ai la latou taitaiga? (fuaiupu 23).

• E mafai ona e valaaulia ni nai tagata o le vasega e o mai sauniuni e faiaoga i se vaega mai le savali a Peresitene Dallin H. Oaks “O Le Faataoto o le Lulu Saito” (Liahona, Me 2015, 32–35). O le a se mea ua faaopoopo e lenei savali i lo tatou malamalama i lenei faataoto?

Mataio 13:24–35, 44–53

E fesoasoani faataoto a Iesu tatou te malamalama ai i le tuputupu ae, taunuuga ma le taua o Lana Ekalesia.

• E mafai faapefea ona e fesoasoani i tagata o le vasega ia malamalama i upumoni e uiga i le Ekalesia ia ua aoao mai i faataoto a Iesu i le Mataio 13? E mafai ona e lisiina ni nai faataoto i luga o le laupapa (tagai i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ma le Aoaoga a Peresitene o le Ekalesia: Iosefa Samita [2007], 293–303). E mafai e tagata o le vasega ona suesue se tasi pe sili atu o faataoto taitoatasi pe i ni vaega toalaiti ma faasoa mai mea ua latou aoaoina e uiga i le tuputupu ae ma le taunuuga o le Ekalesia a Keriso.

o se tamaloa o loo fagota ma se upega

O le malo o le lagi e pei o se upega a se faifaiva.

• O le a se mea ua tatou aoaoina e uiga i le taua o le avea o se tasi o le Ekalesia mai faataoto i le oa i le fanua ma le penina tau tele, o loo maua i le Mataio 13:44–46? O nisi tagata o lau vasega (po o tagata latou te iloa) atonu na ositaulaga—pe tele pe laiti—ia avea o ni tagata o le Ekalesia. Valaaulia tagata o le vasega e faasoa mai ni osigataulaga sa latou faia pe na vaaia o fai e isi ina ia auai i le Ekalesia. O a faamanuiaga na oo mai o se taunuuga? Valaaulia le vasega e manatunatu pe o le a le mea ua uunaia i latou e ositaulaga mo le Faaola.

Mataio 13:24–30, 36–43

I le iuga o le lalolagi, o le a faapotopoto ai e le Alii le au amiotonu ma faatamaia le au amioleaga.

• E mafai faapefea ona e fesoasoani i lau vasega e aumai ni lesona mai le faataoto i le saito ma le titania o le a fesoasoani ia i latou e tumau faamaoni ai o ni Au Paia o Aso e Gata Ai? Amata i le valaaulia o se tasi o le vasega e aotele mai le faataoto ma lona faaliliuga. O a ni lesona i lenei faataoto mo o tatou aso? Aisea e taua ai le iloa e faataga e le Alii Ana Au Paia e “tupu lua pea” (Mataio 13:30) ma e amioleaga seia oo i le taimi o le seleselega? E mafai faapefea ona tatou tausia lo tatou faatuatua ia malosi ae o loo siomia uma i tatou e le amioleaga. E mafai faapefea ona fesoasoani mai Keriso ia i tatou? O leMataupu Faavae ma Feagaiga 86:1–7 ma le saunoaga a Elder L. Tom Perry i le “Punaoa Faaopoopo” e mafai ona tuuina mai ai ni malamalamaaga faaopoopo i le faaaogaina o lenei faataoto i aso e gata ai.

aikona o punaoa

Punaoa Faaopoopo

E tatau ona tatou faafaileleina le lelei.

Na aoao mai Elder L. Tom Perry: “O lena fili tuai o tagata uma ua ia mauaina le anoanoai o togafiti ua ia mafai ona mafaufau i ai e faasalalau solo ai le titania. Ua ia maua ni auala latou te ulu atu ai e oo lava i le paia o o tatou lava fale. O auala leaga ma faalelalolagi ua matua salalau solo lea ua foliga mai ua leai se auala moni e veleeseina ai. Ua oo mai i fesootaiga eseese ma oo mai ai i masini ua tatou atiaeina tatou te aoao ai ma faafiafia ai i tatou. Ua matua ola faatasi ma fetiinai le saito ma le titania. O se tausimea e pulea le fanua e tatau, i lona malosi atoa, ona faafaileleina le mea lelei ma faia ia matuai malosi ai ma matagofie ia leai ai se titania e moomia i le mata po o le taliga” (“Mauaina o le Filemu Tumau ma le Fausiaina o Aiga e Faavavau,” Liahona, Nov. 2014, 44).

Faaleleia o Lo Tatou Aoao Atu

Faaogatotonu lou aoao atu i aoaoga faavae. Ia mautinoa e taulai le talanoaga a lau vasega i le aoaoga faavae autu i mau. E mafai ona e faia lenei mea i le fai atu i tagata aoao e muai faitau ia mau, ma faaogatotonu talanoaga a lau vasega i mau, ma fai i tagata o le vasega e faasoa mai a latou molimau i aoaoga faavae moni. (Tagai Aoao Atu i le Ala a le Faaola, 20–21.)