Iesu o loo savavali ma soo o loo tauaveina ato falaoa

27 Mati–2 Aperila.

Mataio 14; Mareko 6; Ioane 5–6

“Aua Tou Te Matata’u”

A o e sauniuni e aoao atu mai le Mataio 14; Mareko 6; ma le Ioane 5–6, vaavaai mo savali e talafeauga ma lau vasega. A o e faia, mafaufau pe faapefea ona e faagauai tagata o lau vasega i se aafiaga anoa ma tusitusiga paia.

aikona o le fefaasoaai

Valaaulia le Fefaasoaai

O se tasi auala e amata ai se talanoaga o le valaaulia lea o ni nai tagata o le vasega e tofu filifili se mataupu mai le faitauga ma faasoa mai se savali mai lena mataupu e taua ia i latou. A o latou faasoa mai, e mafai ona fai atu e isi tagata ni fesili pe faaopoopo atu ni o latou malamalamaaga.

aikona o le aoao atu

Aoao Atu le Aoaoga Faavae

Ioane 5:16–47

O Iesu Keriso o le Alo Pele o le Tama Faalelagi.

• I le Ioane 5, sa saunia e Iesu ni malamalamaaga e uiga ia te Ia lava, Lona Tama, ma Lana sootaga ma le Tama. Ina ia fesoasoani i le vasega e sue nei malamalamaaga, taumafai e vaevae i latou i ni vaega ma tuu atu ia i latou ni nai minute e lisi mai ai ni upumoni se tele e mafai ona latou maua i fuaiupu 16–47 e faatatau i uiga o le Atua ma Iesu Keriso ma le La sootaga. Valaaulia vaega e feauauai i le faitauina o upumoni mai a latou lisi. E fesoasoani faapefea nei upumoni ia tatou malamalama atili ai i lo tatou Tama Faalelagi ma Lona Alo? E mafai faapefea ona tatou mulimuli i le faataitaiga a Iesu Keriso o le usiusitai i le Tama?

• O se gaoioiga i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ua valaaulia tagata aoao e mata’itu taimi uma na faaaoga ai e Iesu le upu Tama i le Ioane 5: 16–47. Valaaulia ni nai tagata o le vasega e faasoa mai mea sa latou aoaoina a o latou faamaeaina le gaoioiga. Fai atu ia i latou e faasoa mai ni malamalamaaga na latou maua e uiga i le Tama Faalelagi ma Lona Alo Pele.

Mataio 14:15–21; Mareko 6:33–44; Ioane 6:5–14

E mafai e le Faaola ona faalautele o tatou taulaga maualalo e faataunuu ai Ona faamoemoega.

• O le a se mea e fesoasoani i le vasega e maua ai le faauigaga patino i le vavega a Iesu o le fafagaina o le lima afe? E mafai ona e fesili pe faapefea e le faitauina o le vavega ona faateleina lo latou faatuatua i le gafatia o le Faaola e faamanuia ai i latou taitoatasi. E mafai ona latou talanoa i se taimi na latou lagonaina ai le faalauteleina pe faateleina e le Faaola o a latou taumafaiga e fesoasoani ai i lo latou faataunuuina o se mea sa foliga mai e le mafai. Ma le isi, a o lei amataina le vasega, e mafai ona e fai atu i tagata o le vasega e aumai i le vasega se ata po o se mea faitino e faatusa i lo latou aafiaga.

  areto ma i’a

  Na fafagaina faavavega e Iesu le 5,000 o tagata i falaoa e lima ma i’a e lua.

• O le vitio “The Feeding of the 5,000” (ChurchofJesusChrist.org) e ono fesoasoani i tagata o le vasega e manatunatu loloto ai i le vavega o loo faamatala mai i nei fuaitau. O a faamatalaga e mafai ona tatou maua i lenei tala ua faateleina ai lo tatou faatuatua i le Faaola? O a auala e mafai ai e le Faaola ona fafagaina i tatou faaleagaga? O anafea na fafagaina ai ma lagolagoina i tatou e Iesu Keriso?

Mataio 14:22–33

Ua valaaulia i tatou e Iesu Keriso e tuuese o tatou atuatuvalega ma masalosaloga ina ia mafai ai ona tatou o atu atoatoa ia te Ia.

• O le tala o i le Mataio 14:22–33 e mafai ona fesoasoani i tagata o le vasega e faateleina ai lo latou faatuatua i le Faaola ma lo latou naunau e mulimuli ia te Ia. Valaaulia le vasega e faitau le tala lenei, mata’itu upu na fetalaia e Keriso, Peteru, ma isi Aposetolo. Mata na faapefea ona fesoasoani upu a Iesu ia Peteru e maua ai le faatuatua e tuua le vaa ae savali i luga o le vai? E faatatau faapefea apoapoaiga a Iesu “ia olioli” ma “aua tou te matata’u” (fuaiupu 27) ia i tatou i aso nei? O le a se mea e mafai ona tatou aoao mai ia Peteru e uiga i le uiga o le avea o se soo o Iesu Keriso ma faalagolago ia te Ia? E mafai ona e fautuaina tagata o le vasega e mafaufau e uiga i ai ma faasoa mai aafiaga na latou faatinoa e pei o Peteru, e mulimuli ai i le Faaola, tusa lava pe na lei mautinoa le taunuuga. Fai atu ia i latou e faasoa mai mea na latou aoaoina mai o latou aafiaga. Na faapefea ona oo mai Iesu Keriso e laveai i tatou i taimi o lo tatou fefefe po o le masalosalo?

Ioane 6:22–71

I le avea ai ma soo o Keriso, e tatau ona tatou naunau e talitonu ma talia le upumoni, e tusa lava pe faigata.

• O mea na tutupu i le Ioane 6 e mafai ona maua ai se vaaiga aoga pe a fesiligia e tagata le aoaoga faavae, talafaasolopito, po o aiaiga faavae a le Ekalesia a Keriso. Ina ia fesoasoani i tagata o lau vasega ia malamalama i nei mea na tutupu, e mafai ona e tusia fesili e pei o nei i luga o le laupapa mo i latou e tali ai: O a mea na faamoemoeina e tagata? (tagai fuaiupu 26). O le a le mea na ofo atu e Keriso ia i latou nai lo lena? (tagai fuaiupu 51). O le a le mea na le malamalama i ai tagata? (tagai fuaiupu 41–42, 52). E mafai foi ona e fai atu ni fesili faapenei e fesoasoani ai i tagata o le vasega e faaaoga lenei tala i o latou olaga: O a nisi o auala e mafai ona tatou filifili ai e savavali faatasi ma Keriso e tusa lava pe i ai ni a tatou fesili po o ni masalosaloga? (tagai fuaiupu 66). O a ni aoaoga faavae; sauniga, po o isi “upu o le ola faavavau” e na o le Ekalesia toefuataiina a Keriso e mafai ona maua ai? (tagai fuaiupu 67–69). Mo ni malamalamaaga mai se Aposetolo i ona po nei, tagai i le savali a Peresitene M. Russell Ballard “O Ai Tatou Te O I Ai?,” (Liahona, Nov. 2016, 90–92).

Faaleleia o Lo Tatou Aoao Atu

Faalogo. “O le faalogo o se faatinoga o le alofa. … Ole atu i le Tama Faalelagi e fesoasoani ia te oe e te malamalama ai i mea o loo fai mai ai tagata o lau vasega. Ao e gauai atu ma le faaeteete i a latou savali faaleo pe le faaleoa, o le a e iloa ma malamalama atili i o latou manaoga, o latou atugaluga, ma o latou naunautaiga” (Aoao Atu i le Ala a le Faaola,34).