O Le Liuaina o Keriso

O Le Liuaina, saunia e Carl Heinrich Bloch

10–16 Aperila

Mataio15–17; Mareko 7–9

“O Oe o le Keriso”

O se tasi o ou faamoemoega autu o se faiaoga o le fesoasoani lea i isi e fausia lo latou faatuatua ia Iesu Keriso. Teuloto le mea lea a o e suesueina tusitusiga paia i lenei vaiaso. O le a se mea ua e maua e mafai ona fesoasoani i tagata o le vasega e talitonu loloto atili ai ia te Ia?

aikona o le fefaasoaai

Valaaulia le Fefaasoaai

O se tasi ala e mafai ona faamalosiauina ai tagata o le vasega e suesue ia tusitusiga paia e le tagata lava ia ma faatasi ai ma o latou aiga o le valaaulia lea o i latou e faasoa i vaiaso taitasi pe o faapefea ona fesoasoani la latou suesuega i tusitusiga paia ia i latou e maua ai faaaliga ma faamanuiaina ai o latou olaga. Mo se faataitaiga, na faapefea e a latou suesuega o nei mataupu ona aafia ai filifiliga na latou faia i lenei vaiaso?

aikona o le aoao atu

Aoao Atu le Aoaoga Faavae

Mataio 16:13–17

O se molimau ia Iesu Keriso e oo mai e ala i faaaliga.

• Pe i ai se tagata o lau vasega na tatau ona ia faamalamalama atu i se tasi pe na faapefea ona latou iloa e moni le talalelei? I le Mataio 16:13–17, o le a le mea na aoao mai e le Faaola e uiga i le auala tatou te maua ai se molimau? E mafai ona e faasoa atu le ala na maua ai e Alema lana molimau (tagai Alema 5:45–46) po o le mea na aoao atu e le Alii ia Oliva Kaotui e uiga i faaaliga (tagai Mataupu Faavae ma Feagaiga 6:14–15, 22–23; 8:2–3). O le a sou manatu i se tali a Peteru po o Alema po o Oliva Kaotui pe ana fesili atu se tasi ia i latou pe faapefea ona latou iloa e moni le talalelei?

• Atonu e i ai ni tagata i lau vasega o loo tatalo mo faaaliga patino ae e le iloa pe faapefea ona iloa pe a oo mai. I le HearHim.ChurchofJesusChrist.org, e mafai ona e maua ai vitio ia e faasoa mai ai e taitai o le Ekalesia le auala latou te iloa ai le siufofoga o le Alii. E mafai ona e matamata i se tasi pe sili atu o nei vitio i le vasega ma talanoa e uiga i mea o loo aoao mai e vitio e uiga i le mauaina o faaaliga. O a isi aoaoga po o mau e mafai e lau vasega ona mafaufau i ai e ono fesoasoani i se tasi ia iloa faaaliga patino? (Mo se faataitaiga, tagai i le 1 Tupu 19:11–12; Kalatia 5:22–23; Enosa 1:1–8; Mataupu Faavae ma Feagaiga 6:22–24; 8:2–3; 9:7–9.)

Mataio 16:13–19; 17:1–9

E manaomia ki o le perisitua mo lo tatou faaolataga.

• Ina ia amata se talanoaga e uiga i ki o le perisitua, e mafai ona e tusia ni mau faapenei i luga o le laupapa: Mataio 16:19; Mataupu Faavae ma Feagaiga 107:18–20; 128:8–11; 132:18–19, 59; Talafaasolopito—Iosefa Samita 1:72; ma “Ki o le Perisitua” i le Taiala i Tusitusiga Paia (scriptures.ChurchofJesusChrist.org). Ona valaaulia lea o tagata o le vasega e faitau se tasi pe sili atu o fuaitau ma faasoa mai se mea na latou aoaoina mai ai e uiga i ki o le perisitua. Aisea tatou te manaomia ai ki o le perisitua?

• Ina ia fesoasoani i tagata o le vasega e faamalolosia a latou molimau i le toefuataiga o ki o le perisitua i aso e gata ai, e mafai ona e fai i le afa o le vasega e suesue le Mataio 17:1–9 ae suesue e le isi afa le Mataupu Faavae ma Feagaiga 110. Ona mafai lea ona latou faasoa atu o le tasi i le isi i mea sa latou aoaoina ma maitau mea e talitutusa ai tala e lua. O le vitio “Priesthood Keys: The Restoration of Priesthood Keys” (ChurchofJesusChrist.org) e mafai foi ona fesoasoani.

faatagata o Peteru o loo uuina ki

O ki o le perisitua o le pule lea e faatonutonu ai le faaaogaaga o le perisitua.

Mareko 9:14–30

Pe a sailia le faatuatua sili atu, tatou te amata i le faatuatua ua ia i tatou.

• Sa faaaoga e Elder Jeffrey R. Holland le tala i se tamā sa sailia se faamalologa mo lona atalii e aoao ai pe faapefea ona tatou o i le Alii pe a tatou lagonaina ua le lava lo tatou faatuatua (tagai “Le Alii e, Ua Ou Faatuatua,” Liahona, Me 2013, 93–95). A uma ona faitau faatasi o se vasega le Mareko 9:14–30 e mafai ona outou talanoaina faatasi mea e tolu na matauina e Elder Holland (tagai “Punaoa Faaopoopo”).

aikona o punaoa

Punaoa Faaopoopo

O maitauga e tolu e fesoasoani tatou te maua atili ai le faatuatua.

Ina ua uma ona toe faamatala mai le tala o loo maua i le Mareko 9:14–29, na aoao mai Elder Jeffrey R. Holland:

“O le mea muamua e maitauina i lenei tala o le taimi e feagai ai ma luitau o le faatuatua, sa faamautu muamua e le tamā lona malosi ma o iina na ia faailoa atu ai le mea e gata ai. O lana uluai tautinoga lava o lona ioeina e aunoa ma se faatuai: ‛Le Alii e, ua ou faatuatua.’ Ou te fia fai atu ia i latou uma o ē moomoo ia tele atu se faatuatua, ia manatua lenei tagata! I taimi o le atuatuvale po o le le mautonu po o taimi e fesouaiina ai, tausisi i le faatuatua lena ua ia te oe, tusa lava pe itiiti lena faatuatua. …

“Lona lua o mea e maitau e fai sina ese mai le mea muamua. A oo mai faafitauli ma tulai mai ni fesili, aua nei amataina lau sailiga mo le faatuatua i lou faapea pe o le a le tele e te le o maua, ma e amata ai i lou ‘le faatuatua.’ … Ou te le o faapea atu e te faafoliga ua ia te oe le faatuatua e le o i ai. O lea ou te fai atu ia e faamaoni i le faatuatua lena ua ia te oe. …

“Maitauga mulimuli: a oo mai le le mautonu po o faigata, aua e te fefe e fesili mo se fesoasoani. Afai tatou te mananao i ai ma le lotomaualalo ma le faamaoni e pei ona faia e lenei tama, e mafai ona tatou maua” (“Le Alii e, Ua Ou Faatuatua,” Liahona, Me 2013, 93–94).

Faaleleia o Lo Tatou Aoao Atu

Fai ni fesili e valaaulia ai molimau. O le faia o fesili e fautuaina ai tagata o le vasega e tuu atu molimau e mafai ona avea o se ala lelei e valaaulia ai le Agaga. Mo se faataitaiga, a talanoaina le Mataio 16:13–17, e mafai ona e fesili, “O le a se mea ua e aoaoina e uiga i le Faaola ua faamalosia ai lau molimau ia te Ia o le Faaola?” (Tagai Aoao Atu i le Ala a le Faaola,32.)