“17–23 Aperila. Mataio 18; Luka 10: ‘Se A Se Mea Ou Te Faia Ou te Maua ai le Ola e Faavavau?,’” Sau, Mulimuli Mai ia te Au—Mo Le Aoga Sa: Feagaiga Fou 2023 (2022)
“17–23 Aperila. Mataio 18; Luka 10,” Sau, Mulimuli Mai ia te Au—Mo le Aoga Sa: 2023
O Le Samaria Agalelei, saunia e Dan Burr
17–23 Aperila
Mataio 18; Luka 10
“Se A Se Mea Ou Te Faia Ou te Maua ai le Ola e Faavavau
Faitau le Mataio 18 ma le Luka 10, ma tusifaamaumau ou lagona uunai faaleagaga. A o e mauaina uunaiga, e mafai ona e fesili, e pei ona fautuaina ai e Elder Richard G. Scott, “Po o i ai nisi mea e tatau ona ou iloa?” (“Ia Maua le Taitaiga Faaleagaga,” Liahona, Nov. 2009, 8).
Valaaulia le Fefaasoaai
O loo i ai i nei mataupu faataitaiga e tele o aoaoga o le talalelei e ese mai mea e aoao mai e le lalolagi ia i tatou. Atonu e mafai e tagata o le vasega ona faasoa mai nisi o faataitaiga na latou maua i a latou faitauga i lenei vaiaso. E faapefea ona faamanuiaina i tatou e le Alii pe a tatou faaaoga Ana aoaoga?
Aoao Atu le Aoaoga Faavae
E tatau ona tatou faamagalo atu isi pe afai tatou te fia maua le faamagaloga mai le Allii.
-
E mafai faapefea ona e faaaogaina le faataoto i le auauna le alofa e musuia ai lau vasega ina ia sili atu le faamagalo atu? Atonu e mafai ona e tusia fesili e pei o nei i le laupapa ma valaaulia tagata o le vasega e manatunatu loloto i ai a o toe faamatala e se tasi le faataoto: O ai e faatusa i ai le tupu? O ai e faatusa i ai le auauna le alofa? O ai e faatusa i ai le auauna? O a mea e faatusa i ai aitalafu? Valaaulia tagata o le vasega e manatunatu loloto po o a savali a le faataoto o i ai mo i latou taitoatasi. (Tagai foi “Punaoa Faaopoopo.”)
-
E mafai ona valaaulia le vasega e fatufatu se sootaga o le faataoto i le auauna le alofa e aoao mai ai lesona lava e tasi e uiga i le faamagalo atu ae faaaoga ai tulaga ma faamatalaga faaonaponei. (Mafaufau e faagalulue i latou i ni vaega.) Talanoa pe faapefea ona tali e le faataoto le fesili a Peteru e uiga i le pe faafia ona faamagalo atu.
Sa fetalai Iesu e uiga i tupe ma le aitalafu e aoao atu ai le faamagalo atu.
Ina ia maua le ola e faavavau, e tatau ona tatou alolofa i le Atua ma alolofa i o tatou tuaoi.
-
O se manatu lea e ono maua ai e tagata o le vasega se vaaiga fou i le faataoto i le Samaria agalelei: Valaaulia i latou e manatu faapea o loo latou suesueina se mataupu o se faaoolima ma se faomea i luga o le auala i le va o Ieriko ma Ierusalema. Fai i ni nai tagata o le vasega e o mai sauniuni e sui i tagata eseese oi le faataoto ma talanoa e uiga i lo latou aafia ai i le mataupu. Mo se faataitaiga, mata o a ni mafuaaga sa lei tutū ai le faitaulaga ma le sa Levi e fesoasoani i le tagata na manu‘a? Aisea na tu ai le Samaria? O a ni mafaufauga sa mafai e le pule o le faletalimalo ona faaopoopo atu? O a lagona o le tagata manu’a i isi tagata taitasi? Ia mautinoa e musuia tagata o le vasega i le talanoaga ia faapei o le Samaria agalelei ma le pule i le faletalimalo ma aloese mai le pei o le ositaulaga ma le sa Levi.
-
E faapefea ona tali e le faataoto i le Samaria agalelei ia fesili na fesili ai Iesu i le Luka 10:25–29? Valaaulia tagata o le vasega e talanoa e uiga i taimi na latou lagonaina ai le faapei o le “tasi tagata” (fuaiupu 30) lea sa matua manaomia le fesoasoani. Na faapefea ona o’o mai le fesoasoani? E faapefea e i tatou o ni tagata o le uarota ona galulue faatasi e fesoasoani i isi, faapei ona fai e le Samaria agalelei ma le pule o le faletalimalo?
Tatou te filifili “lena mea lelei” i le faia o filifiliga i aso taitasi e tau atu i le ola e faavavau.
-
A uma ona faitau o se vasega le Luka 10:38–42 e mafai ona e fesili i le vasega pe faapefea ona latou tali atu i le fautuaga a le Faaola pe a na fai o latou o Mareta. E ono aafia faapefea a latou filifiiga i le lumanai ona o lenei aafiaga? E mafai faapefea ona tatou iloa o mea i o tatou lava olaga e manaomia ai le tele o le taimi ma le gauai atu i ai? E mafai e tagata o le vasega ona suesue le savali a Peresitene Dallin H. Oaks “Lelei, Lelei Tele, Lelei Silisili” (Liahona, Nov. 2007, 104–8) e sue ai fautuaga e mafai ona fesoasoani ia i latou.
Punaoa Faaopoopo
O aitalafu i le faataoto i le auauna le alofa.
I le manatunatu ai i aitalafu o loo nofo aitalafu ai i le faataoto i le auauna le alofa, na saunoa ai Elder Jeffrey R. Holland:
“O loo i ai sina eseesega o manatu i le au atamamai e faatatau i le tau o le tupe o loo ta’ua i i—ma ia faamagalo le vaega e faasino i mea tautupe a le I.S.—ae i le faafaigofieina o le matematika, afai o le aitalafu laitiiti sa lei faamagaloina e 100 taleni, po o le $100 i le tatou tupe i le taimi nei, o lona uiga o le aitalafu 10,000 taleni o le faamagalo fua la e tai latalata atu i le $1 piliona—pe sili atu!
“I le avea ai ma se aitalafu patino, o se numera tele naua lena—tatou te matua le malamalama lava i ai. (E leai se tasi e faia se faatau tele faapena!) Ae, mo faamoemoega o lenei faataoto, e tatau ona le malamalama i ai; e tatau ona sili atu ma lo tatou gafatia e malamalama i ai, le faia o se tala e sili atu ma lo tatou gafatia e toe totogi. O le mafuaaga ona e le o se tala lenei e faatatau i ni auauna se toalua na fefinauai i le Feagaiga Fou. O se tala e faatatau ia i tatou, o le aiga pa’ū o le tagata—o tagata aitalafu faaletino, solitulafono, ma o pagota uma. O i tatou uma o ni tagata aitalafu, ma o le i’uga o le faafalepuipuiina o i tatou uma taitoatasi. Ma o iina semanu tatou te tumau ai pea pe ana leai le alofa tunoa o se Tupu o le e faasaolotoina i tatou ona e alofa o Ia ia i tatou ma ua ‘mutimutivale lona agaalofa ia te i tatou’ [Mataupu Faavae ma Feagaiga 121:4]” (“Ia Atoatoa Ona Lelei o La Outou Amio—I Le Iuga,” Liahona, Nov. 2017, 41).
Faaleleia o Lo Tatou Aoao Atu
Mulimuli i le faataitaiga a le Faaola. A o e faitauina ia tala i le Faaola o loo aoao atu i le Feagaiga Fou, vaavaai mo lesona i Lana faataitaiga lea e mafai ona fesoasoani e avea ai oe ma faiaoga sili atu. Mo se faataitaiga, i le Luka 10:25–37, o le a le mea na faia e Iesu e aoao atu ai le aoao tulafono e uiga i le auala e maua ai le ola e faavavau?