Tuugamau Togalaau

3–9 Aperila

Eseta

“Le Tuugamau e, O Fea o i ai Lou Manumalo?”

A o e tapenapena e aoao atu i lenei vaiaso, mafaufau pe mafai faapefea e le talanoaga a lau vasega i le Aso Sa o le Eseta ona fausia ai le faatuatua ia Iesu Keriso ma Lana Togiola.

aikona o le fefaasoaai

Valaaulia le Fefaasoaai

Fesili i tagata o le vasega pe faapefea ona latou tali atu i fesili e pei o le “O le a le Togiola a Iesu Keriso?” ma le “E mafai faapefea ona ou maua faamanuiaga o le Togiola a Keriso?” Valaaulia i latou e faasoa mai soo se mau sa latou faitauina i lenei vaiaso e fesoasoani e tali ai nei fesili.

aikona o le aoao atu

Aoao Atu le Aoaoga Faavae

Ua laveaiina i tatou e Iesu Keriso mai le agasala ma le oti, faamalolosia i tatou i o tatou vaivaiga, ma faamafanafanaina i tatou i o tatou tofotofoga.

• Pe o malamalama tagata o lau vasega e faamafanafana i tatou e Iesu i o tatou tofotofoga ma faamalosia i tatou i o tatou vaivaiga, faapea foi ma le laveaia o i tatou mai le agasala ma le oti? O se tasi auala e fesoasoani ai ia latou maua nei mataupu faavae o le tusi lea o nei upu i luga o le laupapa: Agasala, Oti, Tofotofoga, Vaivaiga. E mafai e tagata taitasi o le vasega ona faitau se tasi o mau o lisi i le “Punaoa Faaopoopo” ma manatunatu loloto pe faapefea ona fesoasoani le Faaola ia i tatou e faatoilalo pe onosaia nei mea. E mafai e le vasega ona tusi mea latou te aoao mai nei mau i lalo o ulutala taitasi ma faasoa mai a latou molimau i le Faaola ma Lana Togiola.

  Iesu i luga o le satauro

  Faasatauroga, saunia e Louise Parker

• Atonu e mafai ona fesoasoani se lesona faitino faigofie e faapupula ai le eseesega o le faamama mai agasala ma le faaatoatoaina: E mafai ona e tusia i luga o le laupapa ia nai laina muamua mai le Moronae 10:32, ae faaaofia ai sipelaga po o kalama sese. Ona valaaulia lea o se tasi o le vasega e solo ese (ae aua le faasa’oina) mea sese. Pe ua foia ai i lea mea le faafitauli? O a lesona ua tatou aoao mai lenei mau ma lenei lesona faitino e uiga i le aafiaga o le Togiola a le Faaola e mafai ona i o tatou luga? E mafai foi ona fesoasoani le saunoaga lea mai ia Peresitene Dieter F. Uchtdorf : “Afai o le uiga o le faaolataga e na o le solo ese ai o a tatou measese ma agasala, o lona uiga o le faaolataga—po o le a le matagofie—e le faataunuua ai faamoemoega o le Tama mo i tatou. E maualuga tele naua Ona faamoemoega: E finagalo o Ia i Ona atalii ma afafine ia avea e faapei o Ia” (“O Le Meaalofa o le Alofatunoa,” Liahona, Me 2015,108).

• E mafai ona fesoasoani tala ma talafaatusa tatou te malamalama ai i le Togiola a Keriso. Atonu e te manao e faasoa atu se tala po o se talafaatusa mai savali o le konafesi aoao i le “Punaoa Faaopoopo.” Pe e mafai foi ona outou matamata faatasi i le “Handel’s Messiah: Debtor’s Prison” (vitio), ChurchofJesusChrist.org, ma talanoaina pe faapefea e le Togiola a Iesu Keriso ona faasaoloto mai tatou mai i o tatou falepuipui. Ona mafai lea e tagata o le vasega ona faasoa mai soo se manatu po o ni lagona o ia i latou e uiga i le Faaola ma Lana Togiola mo i tatou.

Mataio 28:1–10; Luka 24:13–35; Ioane 20:1–29; 1 Korinito 15:3–8, 55--58

Na molimau mai molimau i le Feagaiga Fou faapea na manumalo Iesu Keriso i le oti.

• Mafaufau e iloilo le tala faatusi paia o le uluai Eseta—le Toetu o Iesu Keriso. E mafai ona e valaaulia se tagata o le vasega e toe faamatala le tala i ana lava upu (tagai Ioane 20:1–17). E mafai foi ona e faaalia se vitio o le Tusi Paia, e pei o le “Ua Toetu o Ia” (ChurchofJesusChrist.org).

• Atonu o le a maua e lau vasega se malamalama loloto atu i le taua o molimau i le Toetu o Iesu Keriso pe afai latou te vaai faalemafaufau o i latou o ni loia po o ni fai lipoti o talafou o loo suesueina se mau faapea na toetu mai Keriso. Valaaulia i latou e sue i mau ia tagata e mafai ona avea ma molimau (tagai Mataio 28:1–10; Luka 24:13–35; Ioane 20:19–29; 1 Korinito 15:3–8, 55–58). E mafai foi ona latou tusia se aotelega puupuu o mea atonu e fai mai ai nei tagata pe a latou molimau atu i le faamasinoga pe faatalanoaina ai foi mo se lipoti o ni talafou.

• O se tasi auala e faaloloto ai lo tatou talisapaia o le Toetu o le Faaola o le mafaufau pe faapefea ona tatou faamatalaina o tatou talitonuga i isi. E faapefea ona faasoa mai e tagata o le vasega a latou molimau ia Iesu Keriso i tulaga nei: o se tagata o le aiga ua maua i se ma’i tuga; o se uo ua maliu se sa pele; o se tuaoi ua fesili pe aisea tou te faamanatu ai le Eseta. Fautuaina i tatou e tilotilo i mau (pei o na e i le “Punaoa Faaopoopo”) a o fuafua a latou tali. Valaaulia nisi o tagata o le vasega e faasoa mai o latou manatu.

aikona o punaoa

Punaoa Faaopoopo

Mau e uiga i le Togiola ma le Toetu o le Faaola.

• Isaia 25:8; 53:3–6

• Ioane 20:11-17

• Roma 8:31–39

• 2 Nifae 9:5–12

• Mosaea 3:5–10

• Alema 7:10–14; 11:42–44

• 3 Nifae 11:8–17; 27:13–20

• Moronae 7:41

• Mataupu Faavae ma Feagaiga 19:15–19

O Savali e uiga i le Togiola ma le Toetu o le Faaola.

• Dale G. Renlund, “Mafaufau i le Agaglelei ma le Silisiliese o le Atua,” Liahona, Me 2020, 41–44

• Gerrit W. Gong, “Leoleo Mamoe Lelei, Tamai Mamoe a le Atua,” Liahona, Me 2019, 97–100

• Sharon Eubank, “O Keriso: O Le Malamalama e Susulu i le Pogisa,” Liahona, Me 2019, 73–76.

• Cristina B. Franco, “O Le Mana Faaola o Iesu Keriso,” Liahona, Nov. 2020, 60–62

Faaleleia o Lo Tatou Aoao Atu

Avea o se meafaigaluega a le Agaga. “O lou faamoemoega o se faiaoga e le o le tuuina atu o se lesona manaia ae ia fesoasoani i isi e maua aafiaga o le Agaga Paia, o ia o le faiaoga moni” (Aoao Atu i le Ala a le Faaola,10).