O Iesu o loo talanoa ma Nikotemo

6–12 Fepuari

Ioane 2–4

“E Ao Ina Toe Fanau Mai Outou”

O le faitauina o le Ioane 2–4 o se auala lelei lea e amata tapenapena ai e aoao atu. Tusifaamaumau soo se lagona uunai e te maua, ma faaaoga le otootoga lenei e sue a ni malamalamaaga faaopoopo ma manatu e aoao atu ai.

aikona o le fefaasoaai

Valaaulia le Fefaasoaai

Tusi ulutala e tolu i le laupapa: Ioane 2, Ioane 3, ma le Ioane 4. E mafai e le vasega ona faaaoga ni nai minute e toefamanatu ai mataupu nei e tolu, ona tusi lea i lalo ifo o ulutala taitasi se fuaiupu e fesoasoani latou te malamalama ai i le aoaoga faavae ma mea o loo tutupu i lena mataupu. Talanoa i fuaiupu sa latou tusia.

aikona o le aoao atu

Aoao Atu le Aoaoga Faavae

Ioane 2:1–11

O vavega a Iesu Keriso na “faaalia [ai] lona mamalu.”

• O leotootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga o loo fautuaina ai le faitauina o le Ioane 2:1–11 mai le vaaiga a se tasi sa i ai ina ua faaliliu e Iesu le vai i le uaina. Atonu e mafai e tagata o le vasega ona faasoa mai ni malamalamaaga na latou maua mai le faia o lenei mea. O a ni mea ua tatou aoao ai e uiga i le Faaola mai nei fuaiupu? Na faapefea e lenei vavega ona faaalia ai le mamalu o le Atua? (tagai fuaiupu 11).

Ioane 2:13–22

E mafai ona tatou puipuia nofoaga ma mea paia.

• Ina ia fesoasoani i tagata o le vasega e aoao mai i le tala o le tutuliesea e Iesu o le au faatau tupe mai le malumalu, e mafai ona e fai atu ia i latou e mafaufau i isi mea, e faaopoopo atu i malumalu, lea e manatu le Alii e paia. E mafai faapefea ona tatou fesoasoani e faatumauina le paia o nei mea paia?

Ioane 3:1–21

E tatau ona toe fanauina i tatou e ulu atu ai i le malo o le Atua.

• E mafai faapefea ona tatou faamatalaina i se tasi le uiga o le toe fanau mai? Fuafua e valaaulia tagata o le vasega e faataitai pe faapefea ona latou taliina lenei fesili ma le tagata o loo nofo i o latou autafa. A o latou faia, e mafai ona latou talanoaina fesili e pei o nei: O le a se mea ua tatou aoao mai i upu a Iesu i le Ioane 3:3–7? E faapefea e le salamo, papatisoga, ma le faamauga ona fesoasoani ia i tatou ia toe fanauina? O fuaitau i le “Punaoa Faaopoopo” e mafai ona faaopoopo i lenei talanoaga.

• O nisi tagata e talitonu e le mafai ona suia moni lava se tagata. Peitai, o Nikotemo, o se faataitaiga o se tasi na suia ona o se taunuuga o le mulimuli i le talalelei a Iesu Keriso. Ina ia fesoasoani ia vaai tagata o le vasega i lea mea, e mafai ona e valaaulia i latou e saili i le Ioane 3:1–2; Ioane 7:45–52; ma le Ioane 19:38–40. O a mea ua tatou aoao mai nei fuaitau i uiga ma talitonuga o Nikotemo? Na faapefea ona vave suia o ia? O a ni faataitaiga e mafai ona tatou faasoa mai e uiga i tagata na suia ona o le talalelei?

Ioane 4:5–34

Ua ofo mai e Iesu Keriso ia i tatou le “vaiola” ma le “meaai” mo le faia o le galuega a le Atua.

• E manaomia e o tatou tino meaai ma le vai i aso taitasi. Sa faasino Iesu i nei manaoga lautele ina ua Ia aoao atu le fafine Samaria ma Ona soo (tagai Ioane 4:5–34). Ina ia fesoasoani ia malamalama tagata o le vasega i le mea na aoao atu e le Faaola, e mafai ona e tuu ni ata o meaai ma vai i le laupapa ma valaaulia tagata o le vasega e tusi i lalo o ata taitasi upumoni e uiga i meaai ma vai faaleagaga na aoao atu e Iesu. E faapefea ona faamalie e le Faaola lo tatou matelaina faaleagaga ma le fia inu faaleagaga?

  vaitafe laitiiti

  Ua ofo mai e Iesu Keriso ia i tatou le vai o le ola.

• O le tomanatu i le agaigai i luma o le molimau a le fafine Samaria ia Iesu Keriso, e mafai ona fesoasoani i lau vasega e manatunatu pe na faapefea ona latou iloa o Ia o le Mesia. I le avea ai o se vasega, vaavaai mo faaupuga na faaaoga e le fafine Samaria e faasino ai i le Faaola i le Ioane 4:6–30. O a mea o faaataata mai e nei faaupuga e uiga i lona iloa pe o ai Iesu Keriso? Ua faapefea ona tatou tuputupu ae i a tatou molimau o Ia o lo tatou Faaola?

aikona o punaoa

Punaoa Faaopoopo

O le a le uiga o le toe fanauina?

Na aoao mai Elder David A. Bednar: “O le liua … e maoae, e le laitiiti—o se toefanau mai faaleagaga ma le suiga autu o mea tatou te lagonaina ma naunau i ai, o mea tatou te mafaufau i ai ma fai, ma o tatou ituaiga o tagata. Ioe, o le ute moni o le talalelei a Iesu Keriso e aofia ai se suiga taua ma le mautu i o tatou lava natura, e mafai i lo tatou faalagolago i ‘galuega, ma le alofa mutimutivale ma le alofa tunoa o le Mesia Paia’ (2 Nifae 2:8). A o tatou filifili e mulimuli i le Matai, ua tatou filifili ia suia—ia toe fanau faaleagaga” (“E Ao Ina Toe Fanau Mai Outou,” Liahona, Me 2007, 20).

Na aoao mai Peresitene Dallin H. Oaks: “Na toe fanauina i tatou ina ua tatou ulu atu i se sootaga faalefeagaiga ma lo tatou Faaola e ala i le fanauina i le vai ma le Agaga ma e ala i le tauaveina i o tatou luga o le suafa o Iesu Keriso. E mafai ona tatou toe faafouina lena toefanau i Sapati taitasi pe a tatou aai ma feinu i le faamanatuga. “Ua faamautu e le Au paia o Aso e Gata Ai o i latou ua toe fanauina i le ala lea, o ni atalii ma ni afafine ua fanauina faaleagaga o Iesu Keriso (tagai Mosaea 5:7; 15:9–13; 27:25). E ui o lea, ina ia mafai ona iloa ia faamanuiaga faamoemoeina o lenei tulaga toe fanauina, e tatau lava ona tatou tausia a tatou feagaiga ma tumau e oo i le iuga” (“Have You Been Saved?,” Ensign, May 1998, 56).

Faaleleia o Lo Tatou Aoao Atu

E le sili atu le faiaoga i lo le tagata aoao. O lau matafaioi o se faiaoga e taua, ae e le o oe o le punavai e tasi o musumusuga i le vasega. Fesoasoani i tagata o le vasega e aoao mai le Agaga ma fefaasoaai le tasi i le isi i mea latou te aoaoina.