li Jesus naxwaklesi jun winq sa‘ xch‘aat

27 febrero–5 marzo

Mateo 8; Markos 2–4; Lukas 7

“Laa paab‘aal xkolok aawe”

Lix kawresinkil aawib‘ natikla naq nakawil Mateo 8; Markos 2–4; ut Lukas 7 rik‘in tijok. Li hu Kim, Taaqehin—Choq’ reheb’ li komon ut li junkab’alnaru chi tenq’ank aawe chi tzolok, ut naru tixk’e aana’leb’ chirix li k’utuk, rochb’een li k’a’ru k’utb’il arin.

reetalil li wotzok

Xkanab‘ankileb‘ chi wotzok

Eb‘ li komon sa‘ laa tzoleb‘aal maare ak xe‘xtaw li xninqal ru na‘leb‘ naq yookeb‘ chaq chixtzolb‘aleb‘ li sachb‘a-ch‘oolej sa‘eb‘ li ch‘ol a‘an (chi‘ilmanq resilaleb‘ li k‘irtesink sa‘ li tusleb‘ aatin re li xamaan a‘in sa‘ Kim, Taaqehin—Choq‘ reheb‘ li komon ut li junkab‘al). Naru taak’oxla xb’oqb’aleb’ li komon sa’ laa tzoleb’aal chixwotzb’al li na’leb’ xe’xtaw rik’in junaq li rochb’een, malaj rik’in chixjunil li tzoleb’aal.

reetalil li k‘utuk

Xk‘utb‘al li tzol‘leb‘

Mateo 8; Markos 2; Lukas 7

Neke’uxman li sachb’a-ch’oolej naq a’an rajom xch’ool li Dios, ut naq wan qapaab’aal chirix li Jesukristo.

• Chan ru taawoksiheb‘ li seraq‘ re li sachb‘a-ch‘oolej kixb‘aanu li Kolonel re xtenq‘ankileb‘ li komon chixnimob‘resinkil lix paab‘aaleb‘ chirix? Maare taapatz‘ reheb‘ naq te‘xtz‘iib‘a chiru li pizarron junjunq reheb‘ li sachb‘a-ch‘oolejil k‘irtesink li neke‘tawman sa‘ Mateo 8; Markos 2; ut Lukas 7. Naru neke‘xtz‘il rix chan ru naq eb‘ li kristiaan li ke‘k‘irtesiik ke‘xk‘ut xpaab‘aal chirix li Kristo. K‘a‘ru neke‘xk‘ut chiqu li seraq‘ a‘in chirix li paab‘aal ut eb‘ li sachb‘a-ch‘oolej? Eb‘ li komon naru neke‘aatinak chirix ajwi‘ jalaneb‘ chik na‘leb‘ chirix li paab‘aal ut eb‘ li sachb‘a-ch‘oolej li neke‘tawman sa‘ Mormon 9:15–21; Eter 12:12–16; Moroni 7:27–37; ut Tzol‘leb‘ ut Sumwank 35:8 (chi‘ilmanq ajwi‘ K‘utul Raqal reheb‘ li Loq‘laj Hu, “Sachb‘a-ch‘oolej”). Ma qilomeb‘ sachb‘a-ch‘oolej naq naqak‘anjela li qapaab‘aal chirix li Jesukristo?

• Li seraq‘ chirix li sachb‘a-ch‘oolej sa‘ Markos 2:1–12 naxk‘ut naq aajel ru li k‘anjelak sa‘ komonil re xtenq‘ankil li Kolonel re rilb‘aleb‘ li ani wankeb‘ rajom ru. Naru taapatz‘ reheb‘ li komon naq te‘ril wi‘chik li seraq‘ natawman sa‘eb‘ li loq‘laj hu ut te‘xwotz xna‘leb‘eb‘ chirix li raatin li Elder Chi Hong (Sam) Wong, “Junajinb‘il sa‘ xk‘amb‘aleb‘ wi‘chik” (Jolomil ch‘utub‘aj-ib‘ re octubre 2014; chi‘ilmanq ajwi‘ “Xkomon chik li k‘anjeleb‘aal”). K‘a‘ru naqatzol sa‘ Markos 2:1-12 chirix li k‘anjelak sa‘ junajil re xkolb‘aleb‘ li ani te‘raj tenq‘aak? (chi‘ilmanq ajwi‘ Markos 3:24–25).

Markos 4:35–41

Li Jesukristo wan xwankil chixk’amb’al chaq tuqtuukilal sa’ xyiheb’ li kaq-sut-iq’ re li yu’am a’in.

• Maare nakanaw chirix junjunq li ch’a’ajkilal yookeb’ chixk’ulb’al li komon sa’ laa tzoleb’aal. Rik’in naq chiqajunil wan li xyalb’al qix li naqak’ul sa’ li qayu’am, naq neke’ril li esilal sa’ Markos 4:35–41 naru naniman xpaab’aaleb’ li komon naq li Kolonel naru chixk’amb’al rik’ineb’ li tuqtuukilal. K’e jun ch’ina hu re li junjunq, ut ye reheb’ naq chi junpak’al te’xtz’iib’a jun li ch’a’ajkilal xe’xk’ul. Sa’ li junpak’al chik, ye reheb’ naq te’xtz’iib’a jun aatin sa’ Markos 4:35–41 li naxkawresiheb’ xch’ool chi xik rik’in li Kolonel naq yookeb’ chixk’ulb’al li ch’a’ajkilal. Kanab’eb’ li komon chixwotzb’al li k’a’ru xe’xtz’iib’a, wi wankeb’ xch’ool chixb’aanunkil.

• Li b‘ich “Qaawa‘, xwakli chik li iq‘ ” (Eb‘ li B‘ich, 59) na‘aatinak chirix li seraq‘ wan sa‘ Markos 4:35–41. Maare eb’ li komon te’ruuq chixsik’b’al li aatin sa’ li b’ich li na’aatinak chirix li k’a’ru yeeb’il sa’eb’ li loq’laj hu. Naru ajwi‘ taak‘ut jun jalam-uuch li wan wi‘ li yeeb‘il resil (chi‘ilmanq Hu reheb‘ li Jalam-uuch re li Evangelio, 40) ut tex‘aatinaq chirix li k‘a‘ru k‘utk‘u sa‘ li jalam-uuch. Chan chik ru tatruuq chixtenq’ankileb’ li komon chixtawb’al ru lix yaalalil ut lix wankilal li jaljookil ru aatin a’in?

li Jesus naxch‘anab‘ li kaq-sut-iq‘

Chalen li xiw toj li paab‘aal, xb‘aan laj Howard Lyon

Lukas 7:36–50

Naq nakuye’ li qamaak, naniman li qarahom choq’ re li Kolonel.

• K’a’ru naru naqatzol rik’in li kixb’aanu li ixq ut li kixk’ut li Kolonel sa’ Lukas 7:36–50 naq laa’o yooko chixsik’b’al xkuyb’al li qamaak? Chan ru naq li jalb‘a-k‘a‘uxlej nokoxnach‘ob‘resi rik‘in li Jesukristo? Chan ru naq li seraq‘ a‘an naxjal li qana‘leb‘ chirixeb‘ li neke‘maakob‘k?

reetalil li k‘anjeleb‘aal

Xkomon chik li k‘anjeleb‘aal

“Naq li Jesus kiril lix paab‘aaleb‘.”

Li Elder Chi Hog (Sam) Wong kixwotz li na‘leb‘ a‘in chirix li seraq‘ natawman sa‘ Markos 2:1–12:

“Ma us tinwotz eerik‘in jun muqb‘il b‘ihomal sa‘ li seraq‘ a‘in reheb‘ li loq‘laj hu. Naqataw sa‘ li raqal 5: “Ut naq li Jesus kiril li xpaab‘aaleb‘ (tz‘iib‘anb‘il chi salso). Laa‘in moko xinwil ta junxil—lix paab‘aaleb‘. …

“Aniheb‘ li komon a‘an kixpatz‘ li Jesus? Maare li kaahib‘ ke‘iiqan re lix ch‘ina ch‘aat li sik, malaj li sik ajwi‘, eb‘ li komon li ke‘tijok chirix, ut chixjunileb‘ li yookeb‘ rab‘inkil li raatin li Jesus ut sa‘ hasb‘ ke‘xpatz‘ sa‘eb‘ li raam naq taab‘anumanq li sachb‘a-ch‘oolej. Naru ajwi‘ roksinkil jun sum aatin, jun yuwa‘b‘ej, jun alalb‘ej malaj jun rab‘inb‘ej, jun misioneer, un awa‘b‘ej re li xmolameb‘, jun ixq awa‘b‘ej re Komonil re Tenq‘ank, jun obiisp malaj jun najtil amiiw. Chiqajunilo tooruuq chixtenq‘ankil qib‘ chiqib‘il qib‘. Tento naq k‘eeb‘ilaqo qib‘ chi anchal qach‘ool chixsik‘b‘aleb‘ li neke‘raj li xk‘amb‘aleb‘ wi‘chik” (“Junajinb‘il sa‘ xk‘amb‘aleb‘ wi‘chik,” Jolomil ch‘utub‘aj-ib‘ re octubre 2014).

Xkawresinkil qib‘ jo‘ aj k‘utunel

Ch‘olob‘ lix nawom aach‘ool chi kok‘ aj xsa‘. Wi nakaye xyaalaleb‘ li yaalil na‘leb‘ chi anchal aach‘ool, k‘a‘jo‘ naq taaruuq chi wank xwankil sa‘ xch‘ooleb‘ li ani tzolb‘ileb‘ aab‘aan. Ink‘a‘ na‘ajman ru naq utz‘u‘ujinb‘il laa waatin malaj naq najt tat-aatinaq. Maare yal taach’olob’ xyaalal li sachb’a-ch’oolej naq wan li evangelio sa’ laa yu’am.