li trigo li ok re chi q‘ole‘k

20–26 marzo

Mateo 13; Lukas 8; 13

“Ani wan xxik, chi‘ab‘inq”

Naq nakawil ru li hu, k’oxla k’a’ru te’xpatz’ li komon sa’ laa junkab’al naq neke’xyal xq’e chixtawb’al ru li esil sa’eb’ li jaljookil ru aatin. K’a’ru naru taach’a’ajko’q chiruheb’ xtawb’al ru? Chan ru naq rik’in tzolok tatruuq chixkawresinkil aawib’ re xsumenkil lix patz’omeb’?

reetalil li wotzok

Xkanab‘ankileb‘ chi wotzok

Numsi chiru li tzoleb‘aal “Li na‘leb‘ re xchaab‘ilob‘resinkil lix tzolb‘aleb‘ li loq‘laj hu aajunes” sa‘ Kim, Taaqehin—Choq‘ reheb‘ li komon ut li junkab‘al. Patz‘ reheb‘ li komon naq te‘xwotz chan ru naq xe‘tzolok chirix Mateo 13 ut Lukas 8; 13.

reetalil li k‘utuk

Xk‘utb‘al li tzol‘leb‘

Mateo 13:1–23

Tento taawanq qach’ool chi kawresinb’il re xk’ulb’al li raatin li Dios.

• Chan ru naru taawoksi li jaljookil ru aatin chirix laj awinel re xk’eeb’aleb’ xch’ool li komon sa’ laa tzoleb’aal re te’xkawresi lix ch’ooleb’ chixk’ulb’al li raatin li Dios? Naru taatz’iib’a Eb’ li tzolom ut Jalaneb’ chik chiru li pizarron. Ye reheb’ li komon naq te’ril sa’ Mateo 13:10–17, ut te’xsik’ chan ru naq li Kolonel kixye naq jalan wi’ eb’ lix tzolom chiruheb’ li jun ch’ol chik li ke’ab’in reheb’ lix jaljookil ru aatin? Chirix a‘an, patz‘ reheb‘ li komon naq te‘ril li raqal 18–23, re xsik‘b‘al k‘a‘ raj ru tixk‘e “xjipal qaxik” ut k‘a‘ru taamutz‘ob‘resinq li qu chiru li k‘a‘ru re li musiq‘ej. K’a’ru li qab’eresinkil li yooko chixk’ulb’al sa’ li kutan a’in rik’in li Dios ut rik’ineb’ lix moos? Chan ru naru too‘awq sa‘ “chaab‘il ch‘och‘ ” re xk‘ulb‘aleb‘ qana‘leb‘? (raqal 23).

• Naru taab‘oq junjunq reheb‘ li komon re naq kawresinb‘ilaqeb‘ chixk‘utb‘al jun raqal re li raatin li Elder Dallin H. Oaks, “Li jaljookil ru aatin chirix laj awinel,“ (Jolomil ch‘utub‘aj-ib‘ re abril 2015). Chan ru naq li raatin a’an nokoxtenq’a chixtawb’al ru li jaljookil ru aatin?

Mateo 13:24–35, 44–53

Eb’ lix jaljookil ru aatin li Jesus nokohe’xtenq’a chixtawb’al ru lix k’iijik, li k’a’ru tixk’ul, ut lix loq’alil lix Iglees.

• Chan ru taatenq‘aheb‘ li komon chixtawb‘al ru li na‘leb‘ chirix li Iglees li k‘utb‘il sa‘eb‘ lix jaljookil ru aatin li Jesus sa‘ Mateo 13? Naru taatz‘iib‘a junjunq reheb‘ li jaljookil ru aatin chiru li pizarron (chi‘ilmanq li tusleb‘ aatin re li xamaan a‘in sa‘ Kim, Taaqehin—Choq‘ reheb‘ li komon ut li junkab‘al ut Enseñanzas de los Presidentes de la Iglesia: José Smith [2007], 309–322). Eb‘ li komon naru neke‘xtzol jun malaj wiib‘ oxib‘ chi jaljookil ru aatin sa‘ junjunqal malaj sa‘ kok‘ ch‘uut ut te‘xwotz k‘a‘ru te‘xtzol chirix lix k‘iijik ut lix b‘e lix Iglees li Kristo.

jun winq li yoo chi karab’k rik’in yooy

Li awa’b’ejihom re choxa chanchan jun yooy reheb’ laj kar.

• K’a’ru naqatzol chirix xloq’al li wank sa’ li Iglees rik’ineb’ li jaljookil ru aatin chirix li b’ihomal sa’ li ch’och’ ut li lemtz’il q’ol, li neke’tawman sa’ Mateo 13:44–46? Maare wankeb‘ li komon sa‘ laa tzoleb‘aal (malaj li ani nawb‘il ru xb‘aaneb‘) li xe‘xmayeja k‘a‘ruhaq—maare nim malaj ka‘ch‘in—re wank choq‘ komon sa‘ li Iglees. B’oqeb’ li komon sa’ li tzoleb’aal chixwotzb’al li k’a’ru xe’xmayeja eb’ a’an malaj li ani nawb’il ru xb’aaneb’ re wank sa’ li Iglees. K’a’ru li osob’tesink xe’xk’ul xb’aan a’an? Patz‘ reheb‘ li komon naq te‘xk‘oxla k‘a‘ru eek‘asinb‘ileb‘ chixmayejankil sa‘ xk‘ab‘a‘ li Kolonel.

Mateo 13:24–30, 36–43

Sa’ roso’jik li ruchich’och’, li Qaawa’ tixch’utub’eb’ li tiikeb’ xch’ool ut tixsacheb’ laj maak.

• Chan ru naq tatruuq chixtenq’ankileb’ li komon chixtawb’aleb’ xna’leb’ rik’in li jaljookil ru aatin chirix li trigo ut li yib’ aj pim, li taatenq’anq reheb’ chi wank chi tiikeb’ chi paab’ank jo’ aj Santil Paab’anel sa’ Roso’jikeb’ li Kutan? Re xtikib’ankil, naru taapatz’ re jun li komon naq tixye chi k’osb’il ru k’a’ru naxye li jaljookil ru aatin, ut k’a’ru xyaalalil. K’a’ru li na’leb’ naru naqak’ul sa’ li jaljookil ru aatin a’in choq’ re li kutan li wanko wi’? K’a’ut naq aajel ru xnawb’al naq li Qaawa’ naxkanab’eb’ lix santil paab’anel chi “k’iik chixkab’ichaleb’ “ (Mateo 13:30) rik’ineb’ laj maak toj tixtaw xkutankil li q’olok? Chan ru naru nokowan chi kaw qapaab‘aal chirix li Jesukristo naq wan li maa‘usilal yalaq b‘ar sa‘ qasutam? Chan ru naq li Kristo tooxtenq‘a? Tzol‘leb‘ ut Sumwank 86:1–7 ut li raatin li Elder L. Tom Perry sa‘ “Xkomon chik li k‘anjeleb‘aal” naru neke‘xk‘ut xkomon li na‘leb‘ chirix xk‘anjelankil li jaljookil ru aatin a‘an sa‘eb‘ li kutankil a‘in.

reetalil li k‘anjeleb‘aal

Xkomon chik li k‘anjeleb‘aal

Tento taqach’olani li chaab’il.

Li Elder L. Tom Perry kixye, “Li najter aj xik‘ ilonel re chixjunil li winqilal kixtaw k‘iila k‘a‘aq re ru re rawb‘al li yib‘ aj pim yalaq b‘ar. Kixtaw chan ru roksinkileb’ toj sa‘ lix santilal li qochoch. Li yib‘ aj k‘a‘aq re ru re li ruchich‘och‘ kixjek‘i rib‘ chi naab‘al toj reetal naqak‘oxla naq ink‘a‘ tooruuq chirisinkil sa‘ qab‘een. Na‘ok chiru lix k‘amal li kax mu ut li ulul ch‘iich‘ ut li neke‘xnumsi chiru li iq‘ sa‘eb‘ li ch‘iich‘ li qayoob‘ahom re naq taqatzol qib‘ ut re taqataw li sahil ch‘oolejil. Li trigo ut li yib‘ aj pim kik‘iik sa‘ xyanqeb‘. Laj k‘aak‘alanel li yoo chirilb‘al li awimq tento naq tixch‘olani, rik‘in chixjunil lix wankil, li k‘a‘ru us re taakawuq ut taatamq xch‘ina-usil re naq li yib‘ aj pim maak‘a‘aq xchaq‘al ru choq‘ re lix naq‘ li qu chi moko li qaxik” (“Xtawb‘al li tuqtuukilal li nakana ut xwaklesinkileb‘ li junelikil junkab‘al,” Jolomil ch‘utub‘aj-ib‘ re octubre 2014).

Xkawresinkil qib‘ jo‘ aj k‘utunel

K‘e aach‘ool chixk‘utb‘al li tz‘aqal tzol‘leb‘. K’e reetal naq li seraq’ sa’ laa tzoleb’aal taawanq chi kab’lanb’il sa’ xb’eeneb’ li tzol’leb’ li neke’tawman sa’eb’ li loq’laj hu. Naru taab’aanu a’in rik’in xtz’aamankil chiruheb’ li komon naq te’rileb’ ru li loq’laj hu chi rub’elaj, rik’in aatinak sa’ li tzoleb’aal chirixeb’ li loq’laj hu, ut rik’in xpatz’b’al reheb’ li komon sa’ li tzoleb’aal naq te’xwotz lix nawomeb’ xch’ool chirix li tz’aqal tzol’leb’. (Chi‘ilmanq Li k‘utuk jo‘ li Kolonel, 20–21.)