“13–19 marzo. Mateo 11–12; Lukas 11: “Laa‘in texinhiltasi,” ” Kim, Taaqehin—Choq‘ re li Dominkil Tzoleb‘aal: Li Ak‘ Chaq‘rab‘ 2023 (2022)
“13–19 marzo. Mateo 11–12; Lukas 11,” Kim, Taaqehin—Choq‘ re li Dominkil Tzoleb‘aal: 2023
Matxuwak, xb‘aan laj Michael Malm
13–19 marzo
Mateo 11–12; Lukas 11
“Laa‘in texinhiltasi”
Il Mateo 11–12 ut Lukas 11 chiru li xamaan rub‘elaj li tzolok. Sa‘ li hoonal a‘an tatruuq chixtz‘ilb‘al rix ut chixk‘ulb‘al k‘utb‘esinb‘il na‘leb‘ chirix k‘a‘ru tat-aatinaq wi‘ sa‘ li tzolok.
Xkanab‘ankileb‘ chi wotzok
Aajel ru xk‘eeb‘al chi k‘anjelak sa‘ qayu‘am li na‘leb‘ neke‘qataw sa‘eb‘ li loq‘laj hu re naq taqeek‘a xwankil li raatin li Dios. Waklesi xch‘ooleb‘ li komon chixwotzb‘al li xe‘xtaw sa‘eb‘ li loq‘laj hu naq xe‘tzolok chiru li xamaan a‘in li naru neke‘xk‘e chi k‘anjelak sa‘ xyu‘ameb‘. Xwotzb‘al chan ru naq xak‘e chi k‘anjelak junaq na‘leb‘ re li loq‘laj hu naru naxwaklesi xch‘ooleb‘ li komon chixwotzb‘aleb‘ xna‘leb‘.
Xk‘utb‘al li tzol‘leb‘
Li Jesus tooxk‘e chi hilank naq taqakanab‘ qib‘ sa‘ ruq‘ a‘an.
-
Sa‘ Mateo 11:28–30 li Kolonel kixk‘ut naq tooxtenq‘a chixk‘amb‘al li aalil iiq wi naqak‘ulub‘a lix b‘oqom: “Chek‘ulub‘a lin iiqleb‘ sa‘ eeb‘een” (raqal 29). Re xtenq‘ankileb‘ li komon chixtawb‘al ru li yeechi‘ihom a‘an, naru nakak‘ut xjalam-uuch jun iiqleb‘ chiruheb‘ (chi‘ilmanq li tusleb‘ aatin re li xamaan a‘in sa‘ Kim, Taaqehin—Choq‘ reheb‘ li komon ut li junkab‘al) ut ch‘olob‘eb‘ li kok‘ na‘leb‘ jo‘eb‘ a‘in: jun iiqleb‘ yiib‘anb‘il re naq eb‘ li xul te‘xk‘am aalil iiq malaj re te‘xb‘aanu junaq trab‘aaj, ut yiib‘anb‘il a‘ yaal xnimal li xul. Chan ru naq eb‘ li na‘leb‘ a‘an nokohe‘xtenq‘a chixtawb‘al ru Mateo 11:28–30? K‘a‘ruheb‘ li b‘oqom neke‘qataw sa‘eb‘ li raqal a‘in? K‘a‘ruheb‘ li osob‘tesink yeechi‘inb‘ileb‘ qe? Naru ajwi‘ nakawotz lix yeechi‘ihom li Awa‘b‘ej Russell M. Nelson li natawman sa‘ “Xkomon chik li k‘anjeleb‘aal.”
-
Chiqajunilo wan li qiiq li naru naseeb‘ob‘resiik rik‘in lix wankil li Jesukristo. Re xtikib‘ankil jun aatinak chirix li na‘leb‘ a‘in, naru nakapatz‘ reheb‘ li komon naq‘ te‘ril ut te‘xtz‘il rix Mateo 11:28–30 rochb‘een jun chik komon sa‘ li tzoleb‘aal. Sa‘ li aatinak a‘an naru neke‘oksiman patz‘om jo‘ a‘in: K‘a‘ru junjunq li iiq li maare naxk‘am junaq kristiaan? K‘a‘ru tento taqab‘aanu re chalk rik‘in li Kristo? K‘a‘ru naraj naxye xk‘ulb‘al li riiqleb‘ li Kristo sa‘ qab‘een? Chan ru nakaweek‘a naq li Kolonel naxseeb‘ob‘resi laa wiiq naq nakatnach‘o rik‘in a‘an? Eb‘ li komon naru neke‘xsik‘ xkomon xna‘leb‘eb‘ sa‘ li raatin li Elder David A. Bednar, “Moko ch‘a‘aj ta chiruheb‘ xk‘amb‘al li riiqeb‘ ” (Jolomil ch‘utub‘aj-ib‘ re abril 2014).
Eb‘ li tzolom neke‘xk‘ux li trigo chiru li hilob‘aal kutan, xb‘aan laj James Tissot
Li hilob’aal kutan a’an jun kutan re xb’aanunkil li us.
-
Sa‘ rajomeb‘ chixsantob‘resinkil li hilob‘aal kutan, eb‘ laj Fariseo ke‘xxaqab‘eb‘ chaq k‘iila raqal chi chaq‘rab‘ ut xna‘leb‘eb‘ li winq, li kixmuhob‘resi chiruheb‘ k‘a‘ru tz‘aqal xyaalalil naq wan li hilob‘aal kutan. Re xtz‘ilb‘al rix k‘a‘ut naq li Qaawa‘ kixk‘e qe li hilob‘aal kutan, naru nakapatz‘ reheb‘ li komon naq te‘ril Mateo 12:1–1312:1–13 ut JJS, Markos 2:26–27. K‘a‘ru neke‘xk‘ut li raqal a‘in chirix li rajom li hilob‘aal kutan? K’a’ru chik li na’leb’ naqak’ul chirix li hilob’aal kutan sa’ Exodo 31:16–17Isaias 58:13–14ut Tzol’leb’ ut Sumwank 59:9–13 Chan ru naq najala li qawanjik rik‘in li Kolonel xb‘aan xsantob‘resinkil lix kutan?
-
Naq eb’ laj Fariseo ke’xk’e xwankil k’iila raqal chi chaq’rab’ chirix li hilob’aal kutan, li Kolonel kixk’ut jun li na’leb’ li moko ch’a’aj ta: “Naru xb’aanunkil li us sa’ li hilob’aal kutan“ (Mateo 12:12 K‘a‘ chik chi na‘leb‘ nokohe‘xtenq‘a chiroxloq‘inkil li hilob‘aal kutan? (chi‘ilmanq li raatin li Awa‘b‘ej Russell M. Nelson sa‘ “Xkomon chik li k‘anjeleb‘aal“). K‘a‘ut naq aajel wi‘chik ru xpaab‘ankileb‘ li na‘leb‘ sa‘ xna‘aj jun siir ramleb‘ re chaab‘ilo‘k sa‘ musiq‘ej?
-
Li raatin li Awa‘b‘ej Russell M. Nelson, “Li hilob‘aal a‘an sahil kutan” (Jolomil ch‘utub‘aj-ib‘ re abril 2015) ut li video wan wi‘ li raatin li Elder Jeffrey R. Holland sa‘ “Xkomon chik li k‘anjeleb‘aal” maare texxtenq‘a sa‘ aatinak chirix li hilob‘aal kutan.
Xkomon chik li k‘anjeleb‘aal
Iiqank rochb‘een li Jesukristo.
Li Awa‘b‘ej Russell M. Nelson kixye: “Nekexchal rik‘in li Kristo re tex‘iiqanq rochb‘een a‘an ut rik‘in lix wankilal, re naq ink‘a‘ eejunes teek‘am li riiq li yu‘am. Wi teek‘am li iiq a‘an eerochb‘een li Kolonel ut laj Kolol re li ruchich‘och‘, teek‘e reetal naq lee ch‘a‘ajkilal, maak‘a‘ naxye k‘a‘ru, neke‘seeb‘o‘ ” (“The Mission and Ministry of the Savior: A Discussion with Elder Russell M. Nelson,” Ensign, junio 2005, 18).
“K‘a‘ chi eetalil nawaj xk‘eeb‘al re li Dios?”
Li Awa‘b‘ej Russell M. Nelson kixye: “Naq nink‘oxla k‘a‘ru us xb‘aanunkil sa‘ li hilob‘aal kutan, ninpatz‘ wib‘, “K‘a‘ chi eetalil nawaj xk‘eeb‘al re li Dios?” Rik‘in a‘an, saqen chik ru li k‘a‘ru us tinb‘aanu sa‘ li hilob‘aal kutan” (“Li hilob‘aal a‘an sahil kutan,” Jolomil ch‘utub‘aj-ib‘ re abril 2015).
Li osob’tesink nachal rik’in roxloq’inkil li hilob’aal kutan.
Sa‘ oxib‘ li video, li Elder Jeffrey R. Holland nak‘utuk chirix li osob‘tesink nachal xb‘aan roxloq‘inkil li hilob‘aal kutan: “En mi día santo—Acercarse más a Dios,” “En mi día santo—Honrar el día de reposo,” ut “En mi día santo—Descansar y renovarse” (ChurchofJesusChrist.org).
Xchaab‘ilob‘resinkil li qak‘utum
Waklesi ch‘oolej chi wotzok. “Rik‘in li junjunq li wan sa‘ laa tzoleb‘aal naru natawman li xnawom ch‘oolej, li chaab‘il na‘leb‘, ut li k‘a‘ru nak‘ulman rik‘in xyu‘aminkil li evangelio. B‘oqeb‘ chi wotzok ut chixwaklesinkil rib‘ chirib‘ileb‘ rib‘ ” (Li k‘utuk jo‘ li Kolonel, 5).