li Jesus nab‘eek rik‘ineb‘ lix tzolom li wankeb‘ lix chakach nujenaq rik‘in kaxlan wa

27 marzo–2 abril.

Mateo 14; Markos 6; Jwan 5–6

“Mexxiwak”

Naq taakawresi aawib‘ re xk‘utb‘al li k‘a‘ru wan sa‘ Mateo 14; Markos 6; ut Jwan 5–6, sik‘eb‘ na‘leb‘ li te‘k‘anjelaq choq‘ reheb‘ li komon. Naq yookat chixb’aanunkil, k’oxla chan ru xtenq’ankileb’ li komon sa’ laa tzoleb’aal chixsik’b’al li na’leb’ sa’eb’ li loq’laj hu.

reetalil li wotzok

Xkanab‘ankileb‘ chi wotzok

Jun na‘leb‘ naru nakawoksi re xtikib‘ankil aatinak, a‘an xpatz‘b‘al re junjunq reheb‘ li komon naq te‘xsik‘ junaq ch‘ol li xe‘ril ut te‘chalq chi kawresinb‘il re xk‘utb‘al jun li na‘leb‘ sa‘ li jun ch‘ol a‘an li xwulak chiruheb‘. Naq yookeb’ chi wotzok, li jun ch’ol chik chi komon sa’ li tzoleb’aal te’ruuq chixpatz’b’al li patz’om, malaj chixyeeb’al lix na’leb’eb’ chirix.

reetalil li k‘utuk

Xk‘utb‘al li tzol‘leb‘

Jwan 5:16–47

Li Jesukristo a’an li Ralal li qaChoxahil Yuwa’ li raaro xb’aan.

• Sa’ Jwan 5, li Jesus kixye junjunq li na’leb’ chirix a’an, chirix lix Yuwa’, ut chirix chan ru naq wankeb’ chirib’ileb’ rib’. Re xtenq‘ankileb‘ li komon chixtawb‘aleb‘ li na‘leb‘ a‘in, naru taak‘eheb‘ sa‘ jar ch‘uut ut taak‘e xhoonaleb‘ re naq te‘xtz‘iib‘a jo‘ k‘ihaleb‘ li na‘leb‘ naru neke‘xtaw sa‘eb‘ li raqal 16–47 chirix li Dios ut li Jesukristo ut chan ru naq wankeb‘ chirib‘ileb‘ rib‘. Patz‘ reheb‘ li ch‘uut naq te‘xyaab‘asi li na‘leb‘ xe‘xtz‘iib‘a. Chan ru naq eb’ li yaalil na’leb’ a’in nokohe’xtenq’a chixtawb’al ru li qaChoxahil Yuwa’ ut li Ralal? Chan ru naq nokoru chixb’aanunkil jo’ kixb’aanu li Jesukristo sa’ ab’ink chiru li Yuwa’b’ej?

• Jun li k‘anjel sa‘ li tusleb‘ aatin re li xamaan a‘in sa‘ Kim, Taaqehin—Choq‘ reheb‘ li komon ut li junkab‘al nokoxb‘oq chixk‘eeb‘al reetal rajlal sut naq li Jesus naroksi li aatin inYuwa‘ sa‘ Jwan 5:16–47. Kanab’eb’ junjunq li komon sa’ li tzoleb’aal naq te’xwotz k’a’ru xe’xtzol sa’ xb’aanunkil li k’anjel a’in. Patz‘ reheb‘ naq te‘xwotz xk‘a‘uxleb‘ chirix li qaChoxahil Yuwa‘ ut lix Raarookil Alal.

Mateo 14:15–21Markos 6:33–44Jwan 6:5–14

Li Kolonel naru naxnimob‘resi ru li qakok‘ mayej re taab‘aanumanq lix k‘anjel.

• K’a’ru tixtenq’aheb’ li komon sa’ li tzoleb’aal chixtawb’al li na’leb’ li taak’anjelaq reheb’ rik’in resil li sachb’a-ch’oolej naq li Jesus kixk’e chi wa’ak li oob’ mil? Naru taapatz’ chan ru naq rilb’al resil li sachb’a-ch’oolej a’in naxnimob’resi lix paab’aaleb’ chirix lix wankil li Kolonel chirosob’tesinkil li junjunq reheb’. Naru neke‘aatinak chirix ma xe‘reek‘a jun sutaq naq li Kolonel xnimob‘resi ru malaj xk‘ihob‘resi lix k‘anjeleb‘ re taa‘uxmanq li k‘a‘ru chanchan naq ink‘a‘ naru xb‘aanunkil. Jo‘kan ajwi‘, rub‘elaj li tzolok naru nakapatz‘ reheb‘ li komon naq te‘xk‘am jun jalam-uuch malaj k‘a‘aq re ru li taareetali li k‘a‘ru xe‘xnumsi.

  eb‘ li kaxlan wa ut li kar

  Jo‘ jun sachb‘a-ch‘oolej, li Jesus kixk‘e chi wa‘ak oob‘ mil rik‘in oob‘ kaxlan wa ut wiib‘ kar.

• Li video “La alimentación de los cinco mil” (ChurchofJesusChrist.org) naru naxtenq‘aheb‘ li komon chixk‘oxlankil li sachb‘a-ch‘oolej li yeeb‘il resil sa‘eb‘ li raqal a‘in. K‘a‘ru li na‘leb‘ naqataw sa‘ li seraq‘ a‘in li naxnimob‘resi li qapaab‘aal chirix li Kolonel? Chan ru naru li Kolonel chixk’eeb’al qe li musiq’ejil tzakemq? Jo’q’e xook’ehe’ chi wa’ak ut xooch’olaniik xb’aan li Jesukristo?

Mateo 14:22–33

Li Jesukristo nokoxb’oq chixkanab’ankil li qaxiw ut xkab’il rix qach’ool re naq jwal wi’chik tooruuq chi chalk rik’in a’an.

• Li esil sa’ Mateo 14:22-33 naru chixtenq’ankileb’ li komon sa’ li tzoleb’aal chixnimankil lix paab’aaleb’ chirix li Kolonel, ut li rajomeb’ chixtaaqenkil. Ye reheb’ li komon naq te’ril ru li esil a’in, ut naq te’xk’e reetal li aatin yeeb’il xb’aan li Kristo, xb’aan laj Pedro, ut xb’aaneb’ chik li apostol. Chan ru naq li raatin li Jesus kiru chixtenq’ankil laj Pedro re kiwan xpaab’aal chi elk chaq sa’ li jukub’ ut chi b’eek chiru li ha’? Chan ru naq li raatin li Jesus, “kawaq eech’ool,“ ut “mexxiwak“ (raqal 27) neke’k’anjelak choq’ qe sa’ li kutan a’in? K’a’ru naru naqatzol rik’in laj Pedro chirix li wank choq’ xtzolom li Jesukristo ut xkanab’ankil qib’ chiru? Naru taaye reheb‘ li komon naq te‘xk‘oxla ut te‘xwotz k‘a‘ru xe‘xk‘ul naq xe‘xk‘e xch‘ool chixtaaqenkil li Kolonel, us ta ink‘a‘ xe‘xnaw k‘a‘ru te‘xk‘ul rik‘in xb‘aanunkil. Patz‘ reheb‘ naq te‘xye k‘a‘ru xe‘xtzol rik‘ineb‘ lix numsihom. Chan ru naq li Jesukristo nachal chixkolb‘aleb‘ sa‘ xhoonal li xiw malaj xwiib‘aleb‘ xch‘ool?

Jwan 6:22–71

Jo‘ xtzolom li Kristo, tento taawanq qach‘ool chixpaab‘ankil ut chixk‘ulub‘ankil li yaal, us ta wan naq ch‘a‘aj xb‘aanunkil.

• Li na‘leb‘ yeeb‘il resil sa‘ Jwan 6 naru tooxtenq‘a naq eb‘ li kristiaan neke‘patz‘ok chirix lix tzol‘leb‘ lix Iglees li Kristo, malaj b‘ar xchal chaq, malaj k‘a‘ru nab‘aanuman chi sa‘. Re xtenq‘ankileb‘ li komon chixtawb‘aleb‘ ru li na‘leb‘ a‘an, naru nakatz‘iib‘a chiru li pizarron eb‘ li patz‘om jo‘ a‘in re naq te‘xsume: K‘a‘ru ke‘royb‘eni li kristiaan? (chi‘ilmanq li raqal 26). K‘a‘ru kixyeechi‘i li Kristo sa‘ xna‘aj li ke‘raj? (chi‘ilmanq li raqal 51). K‘a‘ru ink‘a‘ ke‘xtaw ru li kristiaan? (che‘ilmanq li raqal 41–42, 52). Naru ajwi‘ nakawoksiheb‘ patz‘om jo‘eb‘ a‘in re xtenq‘ankileb‘ li komon chixk‘eeb‘al li seraq‘ a‘in chi k‘anjelak sa‘ xyu‘ameb‘: Chan ru naru naqataaqe li Kristo us ta wankeb‘ qapatz‘om malaj xkab‘ rix qach‘ool? (chi‘ilmanq li raqal 66). B‘ar wankeb‘ junjunq li tzol‘leb‘, li k‘ojob‘anb‘il k‘anjel, malaj xkomoneb‘ chik “li aatin nak‘ehok li junelik yu‘am” li ka‘ajwi‘ natawman sa‘ lix Iglees li Kristo li k‘ojob‘anb‘il wi‘chik? (che‘ilmanq li raqal 67–69). Re rilb‘al xk‘utum jun apostol re li qakutankil, chi‘ilmanq li raatin li Awa‘b‘ej M. Russell Ballard, “Ani aj-ik‘in tooxik?,” (Jolomil ch‘utub‘aj-ib‘ re octubre 2016).

Xkawresinkil qib‘ jo‘ aj k‘utunel

Ab‘in. “Li ab‘ink naxk‘utb‘esi li rahok. … Patz‘ re li qaChoxahil Yuwa‘ naq tatxtenq‘a chixtawb‘al ru li k‘a‘ru neke‘xye li komon sa‘ li tzoleb‘aal. Naq nakak‘e reetaleb‘ chi us, us ta ink‘a‘ neke‘aatinak, naru taanaw k‘a‘ru na‘ajman choq‘ reheb‘ ” (Li k‘utuk jo‘ li Kolonel, 34).